مصريات شو

الحقيقية فيه ناس كتير من مشاهدينا فيه اسئلة في راسهم بدور
عايزين يسالوها لمدرستهم علشان يصالحوها لانهم بيغيبوا عن الكلاس بتاعها

هحاول مع التلامذة الشطار نتوغل بالاسئلة ديب انسايد اور تيتشر فيوليت



-سئل الفنان فان جوخ عن اعظم فنان في العالم فكان رده

الانسان الذي يفكر بقلبه فينعكس ذلك علي وجهه وتصرفاته
وطريقة معاملته للناس

تفتكري يا فيوليت ان ازمة الاخلاق اللي احنا فيها نتيجة اننا بطلنا نفكر بقلبنا-
ايه رايك انت ..تفتكري ان سلاح غاندي اللي كان اقوي الاسلحة بقي خيال وبس

-ايه رايك في المراة العنيدة ويا تري بتخسر ايه بعندها؟

- اتقابلت مع ام اشتكتلي انه فيه عريس لبنتها رفضاه لان قوامه رفيع
وقالتلها الناس هتقول ايه لو اتخطبت له ..
ياتري يفرق معاكي بنسبة اد ايه المظهر الخارجي لعريسك لو افترضنا مثلا انه يتمتع بالسمنة؟
ولو رايت دموع رجل هتقولي ايه عليه بينك وبين نفسك؟

-ياريت توصفي الفرق في احساسك وانتي بتتمشي علي كورنيش اسكندرية في فصل الشتا وفي فصل الصيف؟

-نفسي اشاغب بسؤال علشان نجدد في مصريات شو
هو مشاغبة لسؤال ساله الهرم ليكي
عن طبيعة لبس ولد وطريقة لبس بنت
من وجهة نظرك بغض النظر عن طبيعة اللبس
هل الحكم علي االاخرين من وجهة نظرك يدخل تحت بند ادانة الغير؟
فيه حاجات بنطالب فيها بالحريات والديمقراطية المطلقة
وفيه حاجات بنقف قدامها ونقول ايه اللي عاملينه ده
ده مش من حقهم؟..
تفتكري يا فيوليت ان الحرية تتجزا
بغض النظر عن ان ممارسها صح او غلط
لان منظور كل واحد بيختلف بالطبع..؟

-ايه اكتر شيء ممكن يستفزك ؟وماذا يكون رد فعلك؟

-تقولي لمين:

ان جيت للحق انا زعلانة
واخدة علي خاطري وغضبانة
ده انا قلب وروح ده انا انسانة

زعلانة ..زعلانة ..زعلاااانة

- وبما اننا بنسال مدرستنا
نقلد المدرسين في طريقة السؤال

صف وصفا تفصيليا احاسيك مع هذه الكلمات

-عقد الفل والياسمين
-موج البحر
-عروسة البحور
-الرمال
-صفارة باخرة
-جرس الحصة
-اشارة مرور
-وجه بشوش علي الصبح
-الحب والرومانسية
-القلب الاسود
-الاهلي والزمالك

بصي علشان خاطر انت مدرسة الانجليزي بتاعتنا
انا كنت حنينة خااااااااااالص في الاسئلة
نورتي الشو يا فيوليت

-سئل الفنان فان جوخ عن اعظم فنان في العالم فكان رده

الانسان الذي يفكر بقلبه فينعكس ذلك علي وجهه وتصرفاته
وطريقة معاملته للناس

تفتكري يا فيوليت ان ازمة الاخلاق اللي احنا فيها نتيجة اننا بطلنا نفكر بقلبنا-
ايه رايك انت ..تفتكري ان سلاح غاندي اللي كان اقوي الاسلحة بقي خيال وبس

افتكر ان ازمة الاخلاق ابتدت بان الناس بعدت عن ربنا و ناس كتير لغت قلبها او لغت عقلها و في الحالتين و صلوا لنوع من انعدام الاخلاق..يعني فيه ناس بقت بتفكر بعقلها بس و تحسب هتكسب ايه و هتخسر ايه و الناس التانيه تولع عادي...او ناس معندهاش عقل بتفكر بقلبها بس و تمشي مع مغريات كتير تقابلها في الحياه و بالتالي برده تاهوا في السكه..الصح اننا نفكر بقلبنا و نحب بعقلنا و طبعا عمر مالاخلاق تبطل و زي ما الرسول عليه الصلاه و السلام قال "الخير في امتي الي يوم الدين"
اهه كل حد بيحاول بطريقته و الكمال لله وحده

-ايه رايك في المراة العنيدة ويا تري بتخسر ايه بعندها؟
ايه راي في الانسان العنيد سواء راجل او ست..التصميم علي حاجه ساعات كتير بيكون ايجابي علشان نوصل اللي عايزينه بس العند و الدماغ الناشفه كده و خلاص عمرها متوصل لاي حاجه و لا الشخص ده هيتغير و لا يبقي احسن..السلاح الاقوي من العند بالذات للمراه هو الذكاء مش العند
- اتقابلت مع ام اشتكتلي انه فيه عريس لبنتها رفضاه لان قوامه رفيع
وقالتلها الناس هتقول ايه لو اتخطبت له ..
ياتري يفرق معاكي بنسبة اد ايه المظهر الخارجي لعريسك لو افترضنا مثلا انه يتمتع بالسمنة؟
بصي هو عموما المظهر عمره ما يكون اساس للحكم علي شخص بس عموما و بصراحه انا من الناس اللي بحب اهتم بمظهري و اللي ارتبط بيه احب انه برده شكله العام يكون بالنسبالي مريح بس لو كل حاجه تانيه كويسه و محترم اكيد ده مش هيكون سبب منطقي للرفض لان المظهر ميعملش شخصيه انسان رغم انه بيدل علي حاجات برده
ولو رايت دموع رجل هتقولي ايه عليه بينك وبين نفسك؟
عادي واحد او واحده الدموع مش ضعف ..هقول انه الحمد لله لسه في ناس بتحس..علي الرغم من اني مفضلش ان حد يشوفني ببكي الا لو حد قريب مني قوي
-ياريت توصفي الفرق في احساسك وانتي بتتمشي علي كورنيش اسكندرية في فصل الشتا وفي فصل الصيف؟
انا مش بمشي علي الكورنيش كتير بس ممكن اقولك في الصيف ببقي عايزه اخلص علشان مش بحب امشي في الشمس
في الشتا ببص علي البحر و افكر في حاجات كتتتتيييييييير
-

عن طبيعة لبس ولد وطريقة لبس بنت
من وجهة نظرك بغض النظر عن طبيعة اللبس
هل الحكم علي االاخرين من وجهة نظرك يدخل تحت بند ادانة الغير؟
النفد و الادانه حاجه و الحكم علي الناس حاجه اللي انا شايفاه ان سواء اردنا او لا لما بنقابل ناس بناخد فكره مبدئيا ممكن توصل لفكره مش هنسميها حكم بقه ..عادي و بناء علي كده بنتعامل معاهم ..الادانه بقه و اننا نرذل علي الناس من غير سبب ديه حاجه تانيه و اللي يعمل كده غالبا بيكون شخص مهزوز او غيور من نجاج اللي حواليه
فيه حاجات بنطالب فيها بالحريات والديمقراطية المطلقة
وفيه حاجات بنقف قدامها ونقول ايه اللي عاملينه ده
ده مش من حقهم؟..
اكيد مفيش حاجه مطلقه الحريه المطلقه هتتحول لفوضي بس برده لازم يكون فيه بعض الحريه للناس تشوف لنفسها ايه الصح و ايه الغلط و الديمقراطيه المطلقه كمان ممكن تكون سلاح ذو حدين لان كل انسان له افكاره و اللي عايز يحققوا ازاي كل الناس ديه تشعر بالرضا لو فيه ديمقراطيه مطلقه ..ساعات لازم حد واحد ياخد قرار في الاخر
تفتكري يا فيوليت ان الحرية تتجزا
بغض النظر عن ان ممارسها صح او غلط
لان منظور كل واحد بيختلف بالطبع..؟
اللي بيحس بيها مش هتتجزا بالنسباله لانه عارف بيعمل ايه بس عموما اه ممكن تتجزا لان فيه حاجات ممكن تكون فيها نسب الحريه متفاوته
-ايه اكتر شيء ممكن يستفزك ؟وماذا يكون رد فعلك؟
ان حد يستغباني..بغلس عليه او عليها
-تقولي لمين:

ان جيت للحق انا زعلانة
واخدة علي خاطري وغضبانة
ده انا قلب وروح ده انا انسانة

زعلانة ..زعلانة ..زعلاااانة
حاليا ولا حد..الحمد لله انا مش زعلانه انا فرحانه فرحانه فرحانه

- وبما اننا بنسال مدرستنا
نقلد المدرسين في طريقة السؤال

صف وصفا تفصيليا احاسيك مع هذه الكلمات

-عقد الفل والياسمين
بحس ان فيه حاجات كتبر حلوه في الدنيا و افتكر ماجده الرومي
-موج البحر
بحس بالغموض و ان الاحوال علي طول بتتغير
-عروسة البحور
خيال الناس وااااااااسع
-الرمال
بحس بالهدوء
-صفارة باخرة
صدااااااااااع و حد مسافر
-جرس الحصة
ضرب ضرب..احس باني مستعجله :humer:
-اشارة مرور
ملل
-وجه بشوش علي الصبح
بحس اليوم هيكون كويس ان شاء الله
-الحب والرومانسية
احلي مشاعر في الدنيا لما تكون صادقه
-القلب الاسود
عقل اسود
-الاهلي والزمالك
احمر..ابيض و لا اكتر و لا ااقل

طب سؤال فى السريع كدة ..
لكل انسان قائمة List بمواصفات شريك الحياة ..
ياترى .. ايه أول خمس حاجات بالترتيب فى قائمتك .. (يمكن أشوف لك عريس) ..

وإيه الحاجات الأساسية التى لا يمكن التنازل عنها ..
وايه الحاجات اللى ممكن التنازل عنها ..

1- متدين من غير تشدد
2- بيحترمني و يحبني او علي الاقل فارقه معاه مش عروسه و خلاص
3- كريم(مش بس ماديا..عاطفيا و اخلاقيا كمان
4- طموح و مجتهد
5- صريح و مستمع جيد

وإيه الحاجات الأساسية التى لا يمكن التنازل عنها
نفس الخمسه دول صعب اتنازل عنهم

وايه الحاجات اللى ممكن التنازل عنها

لما يكون فيه الخمسه الاساسيين اكيد ممكن لو فيه حاجات تانيه محبهاش ممكن اتنازل عنها
بس اكيد مش الكذب

فيوليت سؤال خطر علي بالي

ايه السؤال اللي نفسك تساليه للدنيا

الوردة دي ليكي يا فيوليت

االسؤال

اعتبر ده وعد؟؟؟؟


الوردة دي ليكي

ربنا يكملكم بعلقكم

وايه مرزعة الورد الى عملينها دى بس

افتكر انا كده براءهههههههههههههههههه

فريده يالا نزلي اسم الضحيه اللي ورايا

افتكر الناس جاهزين يسالوا

هشااااااااااااااااااااااااااااااااااااااااااااام..مبروك يا فندم الدور عليك

فيوليت كنتي منورة الكرسي بجد
ومرحبا بعدساوي اعتقد هطلع كل طاقتي معاه في الاسئلة

عودة لبرنامج مصريات شو نلتقي بضيف يتمتع بشخصية معملية
واخدنا كل الاحتياطات ضد الزوابع والاعاصير علشان لو السماء اصبحت ملبدة بالغيوم
وجبنا شمسية تحمي من الاجواء الرعدية اللي ممكن تهب علي الاستوديو


علشان نتمتع بحلقة هادئة مع ضيفنا وضيفكم
هشام الشهير بعدساوي
تصقيف


1-حياتنا لا تخلو من لحظات ندم
ايه اكتر فترة مرت في حياتك تتمني تتمحي باستيكة لانك ندمان عليها؟

2-امتي بتقف قدام مراية نفسك وتتعاتب معاها وتقولها انت غلط في كذا وكذا
ولا بتتعامل مع نفسك علي انك لا تخطيء

3-ما هي الرحلة الطويلة التي تتمني ان تذهب اليها وتقول اتمني ان ابقي ولا اعود من حيث اتيت

4-لكل انسان عقل يترجم مبادئه وتبريراته وتاملاته
لان ربنا خلق لكل واحد عقل يريحه
ليه من وجهة نظرك بنرفض احنا كبشر عقول بعض ومش بنحترم مباديء بعض

5-بتعتبر نفسك شخصية عنيدة ولا بتتمتع بالمرونة

6-ايه رايك في مقولة فؤاد المهندس ان انوثة المراة بتبدا من حذاءها
وعبد الوهاب كمان كان بيشوف كده ان الكعب العالي اساس الانوثة

7-ما هو مفهومك لحرية الاديان؟

8-ايه تعقيبك اول ما تقرا الجملة دي

اذا خرج بعض الناس عن الوحدة الوطنية
فهذا لا يسيء اليها انما الخارجين عليها

9-احكيلنا عن طقوسك اليومية اول ما بتفتح عينك يعني
وتقول اصطبحنا واصطبح الملك لله

10-لما بسمع سعاد حسني وهي بتغني الجزء ده بحس بغصة في قلبي
ياتري تاثيرها بيكون ايه عليك وبتفكر في ايه ساعتها

شيكا بيكا وبولوتيكا زمقالب انتيكا
ولا تحزن ولا تزعل زاضحك برضه يا ويكا
انا ضاع مني حاجة كبيرة..اكبر من اني اجيبلها سيرة

11-كل انسان بيحمل في داخله صورا كثيرة موقع عليها من جميع الاشخاص الذين اثروا في حياته
وكان لهم علاقة خاصة به ودور هام في شخصيته
يعني كل واحد اضاف بعدا جديدا ولونا فريدا في حياته

مين يا تري الاشخاص اللي ساهموا في رسم اللوحة دي جواك وسابوا بصمة مميزة؟

12-برتراند راس قال

لا يستطيع المرء ان يكون في سلام مع الاخرين
ما لم يتعلم ان يكون في سلام مع نفسه

فيه عامل مهم بسببه بنفقد السلام الداخلي وهي بعض المباديء والمعايير
اللي بنحيا داخلها
تفتكر من وجهة نظرك ورؤيتك من وراء النضارة :idea: لما بنكسر قواعد بتكون محددة بمجموعة اخلاقيات في المجتمع
ده بيسبب انهيار لشخصية الفرد وانهيار لمعيار القيم لديه
وتفتكر ده من اسباب ازمة افتقادنا للسلام النفسي اللي احنا عايشينه

13-صف احساسك مع هذه الكلمات

-الفضيلة بالحكمة
-السطح والعمق
-الحب والخوف
-الصمت
-النملة
-الصلح والتصفية
-الخيال والواقع
-غربة الروح
-كن نسيما ولا تكن عاصفة

مين هيصفيه بعدي بالاسئلة

فيييييييييييين الضيييييييييييييييييييييييييييف هو لازم يعني نبعت نجيبه علي يد محضر

فيوليت وفرافيرو .. إختارتوا وقت صعب جداً جداً جداً علشان تجيبونى هنا
فمعلهش عالتأخير، بس فعلاً ولا كنت حأعرف انى مطلوب على إيد محضر، لولا فرفر ربنا يعمر بيتها

ولضيق الوقت، نخش فى الموضوع علطول:



1-حياتنا لا تخلو من لحظات ندم
ايه اكتر فترة مرت في حياتك تتمني تتمحي باستيكة لانك ندمان عليها؟

ج ـ فترة المراهقة.


2-امتي بتقف قدام مراية نفسك وتتعاتب معاها وتقولها انت غلط في كذا وكذا
ولا بتتعامل مع نفسك علي انك لا تخطيء

ج ـ لما اكتشفت انى ورطت نفسي فى موضوع كان تفاديه أفضل.


3-ما هي الرحلة الطويلة التي تتمني ان تذهب اليها وتقول اتمني ان ابقي ولا اعود من حيث اتيت

ج ـ مفيش، ما أتمناش ..
بأعرف أتكيف مع كل الظروف وفى كل الأماكن، وبأعرف أشوف حسنات وعيوب كل مكان، وجاهز لتنفيذ كل المهام القتالية فى كل الظروف يا فندم (هق هق هق).
أساساً وأصلاً، بأعتبر نفسى عايش فى رحلة، مسيرها حتنتهى إن عاجلاً أو آجلاً، وكل ساعة بتمر فيها جديد، حتى لو كان مكرر، برضو جديد ..... فمفيش.


4-لكل انسان عقل يترجم مبادئه وتبريراته وتاملاته
لان ربنا خلق لكل واحد عقل يريحه
ليه من وجهة نظرك بنرفض احنا كبشر عقول بعض ومش بنحترم مباديء بعض

ج ـ أختلف مع السؤال من أساسه.
ربنا خلق للناس كلها (الطبيعيين وليس المتخلفين عقلياً) عقل واحد .. يعرف يميز بين الصح والغلط، ووضح لنا (على سبيل المثال) إن الحلال بين والحرام بين .. يعنى جعلنا مخيرين مش مسيرين .. بس بعد ما وضع بين أيادينا وأمام أعيننا، كل الحقائق ..
المشكلة تكون نتيجة للجهل .. بمعنى، أن كل ما يتقابل اثنين، واحد عارف شوية والتانى مش عارف، فيحدث الصدام، خصوصاً لما اللى مش عارف تأخده الكرامة، فيصر على موقفه علشان شكله ما يبقاش وحش، ويعجز عن إثبات رأيه بأى برهان سليم، فيبتدى "يلوش" بأى كلام .. مرة يعيط، ومرة يشتكى، ومرة يتخانق، ومرة يتعالى، ومرة يطنش، إلى آخره .. ولأن كرامته وكبرياءه بيوجعوه، فغالباً ما بيسكتش، وغالباً بيرفض الإعتراف بأنه كان غلطان بسبب جهله، فبيعند أكثر، ويبدأ فى البحث عن أى شئ حتى ولو كان وهمى لا علاقة له بأى حقيقة ولا أى منطق عقلي، علشان يستخدمه كسلاح مضاد .. وفى أغلب الأحيان حتلاقيه بيمثل دور الضحية لكسب عطف الآخرين.
مع أن الحلال بين والحرام بين .. بس لأ .. كبرياؤه وكرامته أهم عنده من معرفة الحقيقة والإعتراف بها.

فى المقابل .. لما تشوفى اتنين "عارفين" فعلاً .. تكتشفى ان خلافاتهما تكون فى وسيلة الوصول للهدف، وليس فى أصل الموضوع والهدف منه.
وتكتشفى أنهما حتى ولو كانا مختلفان فى المبدأ من الأساس، يكون تقبل كل منهما للآخر كاملاً .. والحوار بينهما متجرداً تماماً من أى نزعات شخصية، لأنهما يدخلان النقاش بهدف "المعرفة"، وليس "إثبات الرأى".

الفرق كبير بين الحالتين.
وبالتالى .. فسؤالك؛ لا أوافق على تعميمه بين البشر، لكن أوافق على حصره بين العارفين والغير عارفين .. وخصوصاً لو تورطت صفة العند بين الطرفين.


5-بتعتبر نفسك شخصية عنيدة ولا بتتمتع بالمرونة

ج ـ حسب الظرف، وحسب تفسيرك لكل صفة منهما. يعنى موضوع نسبي بالنسبة لي.



6-ايه رايك في مقولة فؤاد المهندس ان انوثة المراة بتبدا من حذاءها
وعبد الوهاب كمان كان بيشوف كده ان الكعب العالي اساس الانوثة

ج ـ طبعاً إنت عارفة أن الإثنين كانوا بيهزروا مش بيتكلموا بجد ..
ما كانش فيه كعب بهذا الشكل قبل القرن العشرين، فمش معقول كل النساء قبل القرن العشرين كانوا فاقدات للأنوثة!!!!!
كانوا يقصدوا اللمسات المميزة لأنوثة المرأة والفرق بينها وبين الرجل .. لأن مفيش رجل حيلبس كعب عالي دقيق ورفيع مثلاً ..
والنساء خارج المجتمعات المدنية الحديثة (المحدودة جداً)، لا ترتدى لا حذاء بكعب ولا حتى شبشب .. فنعمل إيه؟ نلغي عنهم صفة الأنوثة!!
يعني لما أشوفك فى صالون أو مكان أنيق بكعب عالي، أقول الله، فرافيرو أنثى عالآخر .. ولما أشوفك فى رحلة سفارى فى الصحرا، أو فى البحر، أقول يع .. سوفاج؟
(هق هق هق)
الأنوثة، شكل، وصوت، ومظهر، وتفكير، وإحساس، وتصرف، وحاجات كثير .. مش جزمة!!



7-ما هو مفهومك لحرية الاديان؟

ج ـ الدين واحد لأن الله واحد.
حاولي كده تترجمي كلمة "دين" لأى لغة فى العالم .. وابحثي فى جذور الكلمة المستخدمة كترجمة لكلمة "دين" .. ولما تعرفي النتيجة "بنفسك"، حتتأكدي من كلامي.
لكن ..
كل إنسان حر فى إعتقاده، كل إنسان حر فى إختياره، كل إنسان حر في مذهبه ..
مش مشكلة أى حد، أياً كان هو مين .. ان غيره على عقيدة كذا أو كذا .. لأن الموضوع شخصي جداً، ويستحيل أن يوجد 2 في العالم كله ومنذ نشأة الخليقة وإلى يوم الدين، متساويان تماماً فى المفاهيم والقناعات والإعتقادات .. فأستغرب جداًاًاًاًاًاًاًاًاً .. ممن يهتموا بموضوع كهذا .. لكن .. هم أحرار .. يهتموا أو ما يهتموش، وأنا مالي.


8-ايه تعقيبك اول ما تقرا الجملة دي

اذا خرج بعض الناس عن الوحدة الوطنية
فهذا لا يسيء اليها انما الخارجين عليها

ج ـ تعقيبي: أنها عبارة تنفع كشعار لمؤتمر أو كمانشيت لمقالة فى جرنال .. لكن فيها كلام طبعاً ولابد من توضيحها ومناقشتها. لأن الموضوع مش سهل أوى كده.
مش بالبساطة دى.



9-احكيلنا عن طقوسك اليومية اول ما بتفتح عينك يعني
وتقول اصطبحنا واصطبح الملك لله

ج ـ بأحط القهوة عالنار، وأدخل أغسل سنانى ووشى، ولو مش مستعجل .. بأشرب القهوة علشان أعرف أفتح عيني، وبعدين أخد دش عشان أفوق .. وبعدين أشرب قهوة تانى علشان أعرف أنا مين وأنا بألعب مع كيرورو .. وبعدين أشرب قهوة لتالت مرة علشان أخذ شحنة الإنطلاق وأنا بأشوف الأخبار ..
وبعدين أنطلق ..
كل يوم غير التانى .. لأن حياتى مش روتينية .. بس المؤكد انها حياة مشغولة جداً أكثر مما تتخيلي بكثير.
بالليل .. بالليل خالص .. بأكون فى البيت طبعاً، وحسب اليوم واللى حصل فيه .. يا بأحتاج أراجعه وأحضر لليوم التالي، يا بأحتاج أعمل disconnection لمخي عن كل حاجة قبل ما أنام .. فبأتصرف .. يا بأشوف فيلم، يا بألعب أى لعبة فى الكومبيوتر، يا بأرغي مع أى حد فى أى حاجة .. كده يعنى


10-لما بسمع سعاد حسني وهي بتغني الجزء ده بحس بغصة في قلبي
ياتري تاثيرها بيكون ايه عليك وبتفكر في ايه ساعتها

شيكا بيكا وبولوتيكا زمقالب انتيكا
ولا تحزن ولا تزعل زاضحك برضه يا ويكا
انا ضاع مني حاجة كبيرة..اكبر من اني اجيبلها سيرة

ج ـ ما بأسمعهاش
طبعاً يا فرافيرو كلام مؤلم جداً ,, صلاح جاهين ما كانش بيلعب .. وأكيد أنا وانت غيرنا مثات الآلاف بيحسوا بنفس الغصة بتاعتك .. نفس غصة جاهين لما قال الكلام ده، والله أعلم لو كان عايش النهاردة .. كان قاله إزاى!! متهيألي ما كانش حيعرف يقول حاجة خالص



11-كل انسان بيحمل في داخله صورا كثيرة موقع عليها من جميع الاشخاص الذين اثروا في حياته
وكان لهم علاقة خاصة به ودور هام في شخصيته
يعني كل واحد اضاف بعدا جديدا ولونا فريدا في حياته

مين يا تري الاشخاص اللي ساهموا في رسم اللوحة دي جواك وسابوا بصمة مميزة؟

ج ـ كل الناس .. كل شخص مر على حياتى، ساب أثر ما .. سواء إيجابى أو سلبي .. سواء كبير أو صغير .. بس ساب.
لو تقصدي أكثر الأشخاص تأثيراً فى تكويني .. فعلى الفور أقولك جدي وأبويا وأمي وكل أهلي أولاُ .. بعدهم فى المرتبة الثانية وبدون ترتيب، يأتى بعض أساتذتى وبعض أصدقائى.
وهلم جرا .. ناس كثير.


12-برتراند راس قال

لا يستطيع المرء ان يكون في سلام مع الاخرين
ما لم يتعلم ان يكون في سلام مع نفسه

فيه عامل مهم بسببه بنفقد السلام الداخلي وهي بعض المباديء والمعايير
اللي بنحيا داخلها
تفتكر من وجهة نظرك ورؤيتك من وراء النضارة لما بنكسر قواعد بتكون محددة بمجموعة اخلاقيات في المجتمع
ده بيسبب انهيار لشخصية الفرد وانهيار لمعيار القيم لديه
وتفتكر ده من اسباب ازمة افتقادنا للسلام النفسي اللي احنا عايشينه

ج ـ مش عارف ليه مش قادر أفهم السؤال كويس، بس على أد ما فهمت حأقولك:
أنه بدايةً "راسل" لما قال هذه العبارة، ما قالهاش لوحدها مستقلة .. لكن كانت وسط كلام كثير محوره وهدفه هو فلسفة الوجود من العدم .. وطبعاً هى مش موضوعنا ولا عاوزانا نتكلم فيها دلوقت ..
لكن وكالعادة، (أخد عبارة من وسط كلام كثير، يغير مغزاها وهدف قائلها منها!!).

فبعيداً عن مقولة "راسل" ..
يعنى إيه قواعد؟؟ ويعنى إيه أخلاقيات المجتمع؟ ويعنى إيه مجتمع أصلاً؟؟
علشان نفهم، نبتدى من الصفر ..
مجموعة من الناس ,, عبارة عن أفراد .. كل فرد منهم له صفاته الخاصة المستقلة .. يتجمعون فى ظروف ما .. يعنى .. الظروف هى التى وحدت بينهم، وكونت العامل المشترك بينهم ..
هذه الظروف، تحتاج لتفسير أيضاً. فما هى الظروف؟
هى الزمان والمكان، بكل ما يؤثر فيهما.
وبالتالى .. لدينا أفراد بينهم فروق فردية .. يتجمعون فى زمان ما ومكان ما، بكل ما يؤثر فيهما .. فتتجمع الجماعة، وتواجه الظروف متحدة بما يتناسب مع مصالحها وفى ظل إمكاناتها، وتنشأ للجماعة بالتبعية وكنتيجة؛ خصائص معينة نسميها عادات وتقاليد ومفاهيم وقيم وأخلاقيات .. تظل هى المميزة لهذا المجتمع .. الذى يتحول إلى "شعب" بعد فترة من الزمان وبعد زيادة عدد أفراده وإنتشاره فى المناطق اللصيقة المحيطة بمكانه. وتستمر تلك العادات والتقاليد والمفاهيم والقيم، طالما استمر "الشعب" فى "ظروفه". وتتغير تدريجياً بتغير الظروف. لكن يبقى عامل المكان .. هو العامل الأقوى تأثيراً على الشعب، لعوامل أخرى تندرج تحته .. وتتحول تلك القيم والعادات .. من مجرد نتيجة لظروف ما فى وقت ما .. إلى خصائص أصيلة متوارثة ومميزة لتلك الجماعة الكبيرة من الأفراد .. يصعب تغييرها، لدرجة أن تغييرها قد يفقدهم ما اصطلح على تسميته بـ "الهوية"، وأيضاً بـ "المخزون الثقافى".
اتفقنا؟؟
لو اتفقنا .. يبقى حنتفق كمان على أن تكسير "بعض" القواعد المحددة لأخلاقيات وقيم المجتمع .. لو تم .. بشكل منهجي ومتفق عليه من أفراد المجتمع .. فلن يضر، بل بالعكس، سيكون بمثابة تطور إيجابي يهدف لمصلحتهم جميعاً .. أما لو تم .. بشكل فردى شاذ، أو بواسطة مجموعة صغيرة منشقة عن الجماعة الكبيرة .. فهنا يحدث الصدام وتبدأ المشاكل العصيبة التى تؤثر سلباً على الشعب كله بطرفيه، أى بأغلبيته التقليدية وبأقليته الشاذة. وبطبيعة الحال .. ووسط هذا الصراع، يتأثر الأفراد، فيفقدون سلامهم الداخلي تدريجياً ... وعيشي بقى .. بهدلة بعيد عنك .. وده اللى احنا عايشينه فى مصر من منتصف السبعينات للأسف، من لحظة ما قرروا ينسفوا سلامنا الإجتماعى ومفاهيمنا وقيمنا بإختراع شيطانى اسمه الإنفتاح الأقتصادى ووراه أتت ثقافة الإستسلام، بكل ما تلاهما من تبعات وعواقب وصلتنا لكل اللى إنت شايفاه النهاردة حواليكي.

وعلى فكرة .. ده مش رأي شخصى وبس .. ده رأي كل اللى "بيعرفوا" .. واللى بأتمنى أكون فتفوتة من أصغر واحد فيهم.


13-صف احساسك مع هذه الكلمات

-الفضيلة بالحكمة ............................ وبدونها وحياتك .. بس اللى يفهم!
-السطح والعمق ............................. الجمال الخادع المزيف .. والحقيقة بكل ما فيها من جمال وقبح!
-الحب والخوف ............................. لأ أنا حبيب سيبك انت مش شفتى جاتيتا بتقولك انى بأحب على روحي بأحب الحب للحب نفسه، أى والله. أما الخوف .. فمن ساعة ما مات بابا .. بصراحة .. ما حستوش
-الصمت ................................... ضرورى أحياناً، وأكبر جريمة أحياناً أخرى.
-النملة ..................................... من كثر إعجابي وإنبهاري بيها .. صورتها عشرات الصور وعشرات الأفلام .. وشوفي انت بقى!
-الصلح والتصفية ........................... الصلح خير يا حاجة فرفر .. بس بين مين ومين؟؟ بين اتنين مختلفين على موضوع ماشى .. لكن بين واحد قاتل أبويا وأمى وطاردنى من بيتى ومعتقلنى ومسببلى عاهات مستديمة .. ما أظنش حأصالحه لا فى دنيا ولا فى آخرة، ومش كده وبس .. واللى حيتعامل معاه كمان .. عدوي ليوم الدين. أما التصفية .. فضرورية جدا جدا جدا .. لازم نصفى كل حاجة علشان نوصل لدرجة النقاء والصفاء ونشوف الأمور على حقيقتها، وساعتها بس .. حنعرف الصح فين والغلط فين .. ونقدر نحكم مظبوط .. ودى أول خطوة تجاه تحقيق العدل، اللى لو اتحقق .. حيتحقق السلام بينا وبين نفسنا، وبعدين بيننا وبين بعض، وبعدين بيننا وبين كل العالم من حولنا.
-الخيال والواقع ........................... الإتنين ممكن يكونوا حلوين، وممكن يكونوا كوابيس.
-غربة الروح ............................. يعانى منها الغير موحدين بالله فقط .. وسيبك من أى كلام تانى تسمعيه .. كله هرطقة وهرتلة فى رأيى .. مع إحترامي لشخص القائلين، وليس لما يقولون.
-كن نسيما ولا تكن عاصفة ................ طبعاً، مع الورد لازم نكون نسيم .. لكن مع الشياطين، ولا العاصفة حتحوق فيهم .. محتاجين نكون زلازل وبراكين معاهم.

عايزين نتفق مع المخبر ده ونديله قرشين زيادة علشان يفضل ماشي وراك ويعرف
يجيبك علشان منهاتيش معاك كتير ونفضل ننده عليك
وحسنا يتنبح مش فاهمة منتدي الجيران ده


طبعا الكلمتيم اللي فوق دول هزار احسن تعملي محضر بسببهم ولا حاجة

علي فكرة عجباني ردودك برغم اختلاف وجهات النظر في بعضها
ده العادي زي ما انت عارف

لكن بحترم رايك وقناعتك اكيد

يس ممكن سؤال فرصة والمخبر هنا
بما انه معجبكش سؤال عقل كل واحد وهو حر فيه

سقراط قال "اعرف نفسك"
وحد تاني قال في القرن التامن عشر

ان الانسان الذي يعرف نفسه يستطيع ان يفهم الاخرين
اما الانسان الذي يجهل ذاته من الصعب عليه جدا ان يكتب محاضرة عميقة
عن فكر الانسان"

وده بيخليني اسالك سؤالين بيتسالوا دائما وابدا

ازاي افهم ذاتي ..وافهم الاخرين

يا تري يا هشام انت شايف نفسك ضليع في قواعد فهم ذاتك
ونفسوية الاخرين


معلش سؤال وانا في حماية المخبر

من وجهة نظرك
ايه رايك في المقولة دي

الضمير يولد في قلب المراة...ويموت في عقل الرجل.

وكمان في مقولة مش عجباني طبعا
لكن ايه راي حضرتك فيها

المراة التي تفكر بعقلها ..وتتامل ليست بنت حواء

خلاويص انااااااااااااا من الاسئلة

أستاذنا الكبير هنا
يا مرحبا يا مرحبا

مش حطول في الأسئلة:

إيه أكتر أكلة بتحبها؟
أكثر ممثل أو ممثلة بيعجبك؟
أكثر مغني بيأثر فيك؟
أجمل أغنية عندك؟

لو حتقول كلمة توصف بها المنتدى حتقول عنه إيه؟

لو حتبعت تلغراف لحد حتبعته لمين وتقوله إيه؟

لأ أنا حبيب سيبك انت مش شفتى جاتيتا بتقولك انى بأحب على روحي بأحب الحب للحب نفسه، أى والله

اعترف وديت جاتي فين؟
ما هو الحب من وجهة نظرك؟
ما هي مواصفات فتاة أحلامك؟
تفتكر ممكن تلاقي فتاة أحلامك على أرض الواقع؟

حتقول إيه لكل من:
جمال عبد الناصر؟
المشير عبد الحكيم عامر؟
أنور السادات؟
حسني مبارك؟
حمدي قنديل؟
عمرو أديب؟
محمد حسنين هيكل؟

شوفت بقى أسئلى صغنونة وسهلة إزاي

هو فين هشام..
عاوز اسأل أنا ..

اسأل طيب علشان تبقى المفاجأة كاملة لما ييجي :xgfd:

ابعتوا هاتوه علي يد محضر طريقة مضمونة

اية دة
هو اتش عليه الدور

يا سلااااااااااااااااااام
استنوا بقى احضر الاسئلة

فين الزبون

حد يجيبة من تحت تقاطيق مضيق جبل طارق

عايزين نتفق مع المخبر ده ونديله قرشين زيادة علشان يفضل ماشي وراك ويعرف
يجيبك علشان منهاتيش معاك كتير ونفضل ننده عليك
وحسنا يتنبح مش فاهمة منتدي الجيران ده


طبعا الكلمتيم اللي فوق دول هزار احسن تعملي محضر بسببهم ولا حاجة

فرافيرو ... إحياة ولادك يا شيخة تدلينى عالمخبر بتاعك، عشان يقولى أنا فين!! أنا نفسى مش لاقينى اليومين دول خالص

ولولا انى شفت رسالتك ما كنتش عرفت انى مطلوب تانى .. (صدق أو لا تصدق)

علي فكرة عجباني ردودك برغم اختلاف وجهات النظر في بعضها
ده العادي زي ما انت عارف

لكن بحترم رايك وقناعتك اكيد

بما إننا حنتكلم دلوقت عن معرفة النفس .. فخدي عندك مثال حي من كلامك المقتبس، عن التناقض اللى بيعيشه بعضنا مع نفسه!!

للتوضيح أقولك .. إنى لو مقتنع بفكرة معينة، أو مبدأ، أو قيمة، أو رأي، أو عقيدة .. فطبيعي انى أتبعها، وطبيعي انى سأختلف مع أى كلام يتناقض معها.
وبما أنى أختلف مع عكسها، فطبيعي أن عكسها يكون في حالة صراع (شئت أو أبيت) مع ما أقتنع به، وإن اختلفت درجة الصراع وصورة التعبير عنه.
وطبيعي أيضاً انى سأرفض هذا النقيض .. ماذا وإلا .. يكون إقتناعي بما أقتنع به غير كاملاً، وعلى غير أساس.
وبالتالي ..
فمقولة: (عجبني رأيك أو ردك رغم إختلافي معه) .. تكون مقولة غير منطقية على الإطلاق ..
ولا يمكن التعامل معها إلا بكونها أسلوب رقيق ومهذب لإبداء الرفض.
لكن لو فعلاً عاجبك كلامي .. فهذا معناه إنك واحدة من إثنين:
ـ يا إما واحدة وجدت منطق أقنعها فيما قرأته أو سمعته، فبدأت في إعادة النظر في أفكارها السابقة. (وهذا حسن).
ـ يا إما واحدة متناقضة مع نفسها، لأنها رأت المنطق فيما سمعت أو قرأت .. لكنها مصممة على رفضه لسبب ما. (وهذا هو قمة الخطأ).

عداني العيب وقزح؟ والا راكبني من فوقي لتحتي؟

يس ممكن سؤال فرصة والمخبر هنا
بما انه معجبكش سؤال عقل كل واحد وهو حر فيه

سقراط قال "اعرف نفسك"
وحد تاني قال في القرن التامن عشر

ان الانسان الذي يعرف نفسه يستطيع ان يفهم الاخرين
اما الانسان الذي يجهل ذاته من الصعب عليه جدا ان يكتب محاضرة عميقة
عن فكر الانسان"

وده بيخليني اسالك سؤالين بيتسالوا دائما وابدا

ازاي افهم ذاتي ..وافهم الاخرين

يا تري يا هشام انت شايف نفسك ضليع في قواعد فهم ذاتك
ونفسوية الاخرين

بدايةً .. أنا ما أقولتش ان السؤال مش عاجبني .. قلت اني أرفضه لتعميمه، وأقبله لو تم تخصيصه وتحديد أطرافه .. (إرجعي لكلامي للتأكد).

أما عن السؤال .. ففي رأيي ..
أن فهم الذات ليس بمشكلة، بل أعتقد أن كل الناس تفهم نفسها جيداً وعلى أكمل وجه .. كل واحد فينا عارف هو مين، وعاوز إيه، وبيحب إيه وبيكره إيه.
المشكلة الأزلية ليست في فهم الذات، لكن فى التعامل معها ..
بمعنى وعلى سبيل المثال ..
ممكن أكون عارف عن نفسي اني فنان في أي مجال من مجالات الفنون، لكن ولظروف التركيبة الإجتماعية المعقدة والمصالح الإقتصادية .. أحرم "نفسي" من متطلباتها الفطرية، وألجأ لدراسة ولوظيفة بعيدة كل البعد عني .. لإرضاء الآخرين، ولتحقيق مكتسبات أخرى .. أحتاجها أيضاً فى الواقع .. لكن النتيجة هي حرمان "نفسي" من مطلبها الأساسي .. فتكون المحصلة هي حالة من التأفف المستمر، وإحساس دائم بالضيق، ينتج عنه صراعات نفسية بيني وبين نفسي، ومن ثم؛ بيني وبين الآخرين.
وأظل في حالة إضطراب إلى الأبد.

وبنفس الأسلوب .. نفعل أشياء كثيرة فى كل تفاصيل حياتنا .. ثم نظن أننا نعاني من فهمنا لأنفسنا .. وهو غير صحيح حسب قناعتي.


أما فهم الآخرين .. فأظن أنه من رابع المستحيلات .. لا أحد يستطيع ولا يملك الوسيلة لفهم الآخر فهماً كاملاً.

قد نقولها مجازاً: (أنا فاهمك) .. لكن الواقع أن المقصود هو: (فاهم كلامك أو فاهم سبب تصرفك) .. وليس (فاهمك تماماً كشخص).
لأننا لو اتفقنا على ما سبق، من أن (سلوكياتنا تتعارض مع طبيعتنا) .. فمنطقي أن الآخر لا يحكم علينا إلا من خلال ما يعرفه عنا، والذي لا يصله إلا من خلال تصرفاتنا التى تظهر له .. وبما أنها تصرفات لا تعبر عنا فعلاً، بل هي الواجهة التى نتعامل من خلالها مع الأخرين، فتكون معرفته بنا هى فى واقعها، معرفةً بالواجهة التي نظهرها له، وليس بنا نحن أنفسنا!!

فمعلهش يعني .. رأيى .. إن الأخ بتاع القرن الـ 18 .. كان بيفتي وما لاقاش حد يقوله: أربط عندك يا أسطى، رايح فين يا حاج؟ هي وكالة من غير بواب؟ arkaban:


ريحي نفسك وما تشغليش بالك بفهم الآخرين .. كفاية أوى "تحاولي" توفقي بين فهمك لنفسك وبين تصرفاتك .. لو وصلتي لهذه النقطة .. تبقى حققتي إنجاز

شخصياً ورداً على سؤالك .. بأحاول أعمل كده .. وآخر شئ يدخل فى دائرة إهتماماتي، هو البحث في نفسية الآخرين وأصلهم وفصلهم .. لو وصلتنى المعلومة ما أرفضهاش، وأستفيد منها لو اضطررت .. لكن لا أسعى إليها مطلقاً. (وأنا مالي).

معلش سؤال وانا في حماية المخبر

من وجهة نظرك
ايه رايك في المقولة دي

الضمير يولد في قلب المراة...ويموت في عقل الرجل.

وكمان في مقولة مش عجباني طبعا
لكن ايه راي حضرتك فيها

المراة التي تفكر بعقلها ..وتتامل ليست بنت حواء

لا أفهم المقولة الأولى .. وأعترض على المقولة الثانية.

قلت رأيى فى موضوع الرجل والمرأة مراراً وتكراراً .. بأنه موضوع مختلق لا معنى ولا سبب حقيقي له .. إخترعوه من ضمن ما اخترعوا من قضايا وهمية أخرى، علشان يشغلونا عن قضايانا الحقيقية ..

البشرية مخلوقة من رجل وإمرأة .. لا يتفوق أحدهما فى الأهمية عن الآخر، ولن تُغني كل المقولات من هذا النوع عن إحتياج كلاهما للآخر ..
الإثنان لهما نفس العقل ونفس القلب .. لا يختلفان إلا فى الشكل الظاهري، وفى الوظيفة الفطرية المنوطة بكل منهما لإستمرار الحياة ..
أي كلام تاني غير هذا .. أراه مضيعة للوقت وللجهد بصراحة.

خلاويص انااااااااااااا من الاسئلة

ليه كده؟؟ ده احنا لسه بنسخن وبنقول يا هادي

أستاذنا الكبير هنا
يا مرحبا يا مرحبا

مش حطول في الأسئلة:

همممممممم ... إيه أستاذكو دي؟؟ جديدة



إيه أكتر أكلة بتحبها؟
ج ـ أى أكلة "حرشة" .. أجي علطول .. إعزميني انت بس وحتلاقيني عندك فريرة.


ـ أكثر ممثل أو ممثلة بيعجبك؟
ج ـ كثير .. معظمهم من أيام السينما الأبيض وأسود.


أكثر مغني بيأثر فيك؟
ج ـ كل فترة لها المغني بتاعها عندي.


أجمل أغنية عندك؟
ج ـ شرحه، كل فترة لها الأغنية بتاعتها عندي.


لو حتقول كلمة توصف بها المنتدى حتقول عنه إيه؟
ج ـ بيتى الإنترنتي .. وأعضاؤه أهلي الإنترنتيين .. مهما حصل، لازم أرجعله وأرجعلهم، وبأحس بضيق طول ما أنا بعيد عنه وعنهم.


لو حتبعت تلغراف لحد حتبعته لمين وتقوله إيه؟
ج ـ لحسني مبارك .. وحأقوله:
فخامة الرئيس "السامي" حاكم مصر .. اعتليت منصبك ومصر تعاني أزمات، لم تستطع حلها وقلتها صراحةً: "أعملكم إيه؟" .. وتسببت بأفكارك وسياساتك التى تمليها على حكوماتك فى تدهور الأزمات وتحويلها إلى كوارث ومصائب لم يشهدها تاريخ مصر من قبل، وسيعجز على حلها من سيخلفك أياً كان اسمه وأياً كانت أفكاره دون تعريض مصر وشعبها لمزيد من المشاكل التى لا مفر منها لتصحيح أخطاءك .. لكنك تصرعلى المكوث فى المنصب، وتصر على الإستمرار في نفس السياسات الهدامة للبلد ولمصالحها .. وأخشى ما أخشى أن تكون مقتنعاً بأن ما تفعله هو الصواب، فحينها تكون المصيبة أعظم.
أذكرك بأن الله موجود .. وأنك ملاقيه عاجلاً أو آجلاً .. ولن تفلت من عقابه، ولن تحميك منه أمريكا ولا إسرائيل أصدقاءك ولا غيرهما ..
فاتقي الله .. واستمع ولو مرة واحدة فى حياتك لنصائح معارضيك علها تنفع، فلطالما استمعت لنصائح حاشيتك وها أنت ترى النتيجة.
لا أنبهك لسقوط اسمك في مزبلة التاريخ، فقد سقط منذ زمن فى مزبلة الحاضر، وأنت تعلم ذلك مثلي ومثل الجميع.
لا أطلب منك تصحيحاً لسياساتك كما كنت أطلب سابقاً .. بل أقول لك: ارحل، اعترف بفشلك ومسئوليتك وتنحى كالرجال ..
فقد يشفع لك هذا ولو قليلاً عند غالبية المصريين المسحوقين على كل الأصعدة فى عهدك.
ولا أختم كلامي بالسلام كي لا أكون منافقاً، بل بتذكيرك بأن الله يمهل ولا يهمل.
اللهم قد بلغت، اللهم فاشهد.


اعترف وديت جاتي فين؟
ج ـ جاتيتا مطحونة اليومين دول ما بين الشغل والدراسة والبيت .. ربنا معاها.


ما هو الحب من وجهة نظرك؟
ج ـ أي حب؟؟ حب ربنا؟ والا حب الوطن؟ والا حب الأهل؟ والا حب شريك الحياة؟ والا حب مين بالضبط؟ كل نوع يفرق عن التانى.


ما هي مواصفات فتاة أحلامك؟
ج ـ تااااااااااااااااااااااااني ~~~
طب وربنا لأعقدك shuriken
الطول: من 170 : 175 سم
الوزن: من 60 : 70 كجم
اللون: قمحاوى فاتح
الملامح: (ممكن نتفاوض فى الموضوع ده) بس أكيد لازم تبقى جميلة، صاروخ
الصوت: واطى .. ناعم .. رقيق.
السن: مش مهم .. المهم تكون جاهزة للحمل والخلفة 5 مرات على الأقل
المستوى الإجتماعي: بنت ناس (حسب مفاهيمنا عن الكلمة زمان مش دلوقت) يعنى من الآخر .. بنات محدثين النعمة يمتنعون ولا مؤاخذة
المستوى الأدبي: متعلمة، ولها اهتمامات فنية وأدبية، وكمان إهتمامات سياسية وعندها معلومات عامة مختلفة.
المظهر: أنيقة جداً بدون أى تكلف، يعنى تعرف تلبس اللبس المناسب فى المكان المناسب (سيدة مجتمعات يعنى حسب المفاهيم بتاعة زمان برضو، مش بتاعة دلوقت)
الأخلاق: مهذبة جداً، مرحة جداً، خجولة جداً فى نفس الوقت .. ومش عصبية. ومستعدة لتقبل الحياة بكل تقلباتها فى أى لحظة .. مش بتاعة مشاكل ونكد يعني.
وقبل وبعد كل الكلام ده ... أن يكون بينا حب وتفاهم متبادلين وبمنتهى القوة.

هـــــــــــــــــا ... اتعقدتي والا لسه؟
لو عرفتي واحدة بالمواصفات دى كلها، شاوريلى انت بس ومالكيش دعوة بالباقى بس اوعى تنسي .. لازم تتوافر فيها كل الشروط .. شرط ينطح شرط


تفتكر ممكن تلاقي فتاة أحلامك على أرض الواقع؟
ج ـ لا حياة مع اليأس ولا يأس مع الحياة يا بُنيتي


حتقول إيه لكل من:
جمال عبد الناصر؟
ج ـ يا ريس، حببتني فيك جداً وبعدين سبتني ومشيت دون عودة وحشتنى يا ريس .. محتاجك يا ريس عشت عمري كله منتظر حد يملأ مكانك يا ريس، ومفيش.

المشير عبد الحكيم عامر؟
ج ـ حششت وسكرت وعربدت لحد ما جبتنا ورا، وبعدين انتحرت .. إلى جهنم الخلد إن شاء الله يا عبده ..
بس بينى وبينك .. انتحارك دليل على ان كان عندك دم وإحساس وكرامة .. مواصفات نادرة النهاردة، جايز يشفعولك .. مين عارف! ربنا كبير.

أنور السادات؟
ج ـ عم أنور .. مبسوط؟؟ شايف من عندك اللى احنا شايفينه؟؟ عرفت وفهمت دلوقت كنا ومازلنا قرفانين منك وكارهينك ليه؟؟
صدقنى بأتمنى ما تكونش شايف من عندك .. علشان أكيد حتبقى بتتعذب فى اليوم مليون مرة من اللى بتشوفه من نتائج أعمالك .. والله صعبان عليا يا فرعون.

حسني مبارك؟
ج ـ ارحل، وأنا مستعد أسامحك أمام الله عن أفعالك كلها، بس ارحل النهاردة قبل بكرة، وما تستناش ملك الموت، علشان باين عليه قرفان يجيلك، أو خايف .. تتصور!!

حمدي قنديل؟
ج ـ أستاذ حمدى .. حضرتك آخر الوجوه وآخر الأصوات المعروفة المتبقية من زمن الكرامة والعزة والأصالة والأخلاق الكريمة والمبادئ والشرف والنخوة والعروبة ..
أرجوك .. حافظلنا على نفسك .. واستمر فى تأدية رسالتك، لأننا محتاجين لها اليوم أكثر من أى وقت سبق.

عمرو أديب؟
ج ـ ساعات بأضحك من تعليقاتك يا عمرو .. بس بأسأل نفسي وأنا بأضحك: هو أنا صحيح بأشوف مذيع فى برنامج تليفزيوني بيدخل كل البيوت؟
ناهيك عن "معظم" آراءك انت ومن معك فى البرنامج، والتى تنم عن جهل شديد لم يسبق له مثيل على شاشات التليفزيون .. يا ريت لو تكتفى بالخبر، وتسيبك من التعليق.

محمد حسنين هيكل؟
ج ـ أستاذ محمد .. مؤخراً بدأت ألاحظ بعض "اللخبطة" فى سياق وترتيب كلام حضرتك المُرسل .. ألا ترى معي، أن تسخير جهدك فى الكتابة التى لا يتقنها أحد مثلك، سيكون أفضل كثيراً من تشتيته فى الأحاديث الشفوية التى ينتج عنها بعض الأخطاء العفوية التى يأخذها عليك الكثيرين مؤخراً؟
تحياتى.


 

Smart كتب:هو فين هشام..
عاوز اسأل أنا ..

خد راحتك يا سمارت .. محسوبك وصل وجاهز يا فندم