مصريات شو

-

ايه رأيك في "طيباس" بتاع الفطير الي في كامب شيزار علي الترام ؟؟

ده اول سؤال حجاوب " لذيد جداّ جداّ بس أنا بحب أشترى من عندة البيتزا لانى مليش فى الحلو على فكرة ده جنب بيتنا لزم انا عند الشارع اللى فيه مكتب البريد

وسلامو عليكوا وبكره حبدء اجاوب على كل الأسئلة وبردو حضرب سئ سئ رصيه  

- جوزك بيقول: تسيبي الشغل وتقعدي في البيت و الموضوع غير قابل للنقاش" ايه رأيك ؟؟

بردو السؤال عايزة اجاوب عليه قبل النوم .

جداّ جداّ انا مطيعة بطبعى وبسمع الكلام فما بالك بكلام زوجى لازم اسمع كلامة وأقعد فى البيت دون مناقشه، لكن لما يلاقى فطارة غداه عشاه فول بالزيت الحارو يسألنى هو مفيش اكل غيره حقوله لو سمحت موضوع الاكل غير قابل للنقاش ولما يسال على قميصه الابيض ليه بقى روز فى فوشيا فى أحمر بعد الغسل حقوله ده من اختصاصى والموضوع غير قابل للمناقشه ولما يلاقى الجيران بيتصلو ا بيه ويبلغوه ان البيت كان فى حريقه والمدام بخير لكن الضيوف كلهم أصابهم الاختناق وألحق شوفهم بالقصر العينى ولو سالنى حقوله لا ناقش يا جنتله ولو كان بيكلم نفسه فى يوم ويقول انا ايه جرالى من أسبوعين بعد شرب الشاى من ايد مراتى ألاقى مخى بيحصله حاجات غريبة حكلم نفسى وأقول بصوت مسموع من دون نقاش كلم نفسك ياللى بتكلم نفسك ولما يسألنى د. الامراض العقليه والعصبية أثناء ما انا بمضى انى أكون وصيه على املاكة  " ليه تعتقدى ان زوجك تدهور بيه الحال للدرجة دى " حرد بكل أسى وقهر " بلييييييززززززز من غير مناقشه لانى منهارة على عبيبى

على فكرة ده جنب بيتنا لزم انا عند الشارع اللى فيه مكتب البريد

أدينا عرفنا العنوان كمان ..
فاضل نعرف انتى ساكنة في اي دور وشقة رقم كام .. :Q/Q:

فين الاجابات علي اسئلتي

فين الاجابات علي اسئلتي

وحدة واحده عليا ما انتى شايفه كل ما أجاوب على سؤال سئ سئ يطلع من تحت السرير يضرب له كام كلمة ويجرى أحسن لو فضل مكانه للفقيد الرحمة والأهل السلوان

مين قالك علي المنتدي ده ؟؟ وايه اول انطباع عن المنتدي والموضوعات الي فيه ؟؟

الحج هشام افندى الله يعمر بيته هو اللى دلنى على سكة المنتدى إلهى ما يسئة ولا يوقعه فى حاجه حدقة

انطباعى " فى الاول دخلت المنتدى مجاملة لهشام " هو هنا
وبدءت اتصفح فى المنتدى وبما انى معرفش اى شخص فيكوا ده غير ان المنتدى كله فى سبات عميق فلم اجد اى تشجيع للكتابه فيه ولكن غصت فى موضوعاته وتقريبا اصبحت افتح الكمبيوتر كل يوم على شئون مصرية فقط لا غير
أمسك موضوع موضوع ومره كنت مضايقة جدا لدرجة العياط فكنت بشكل لا إرادى بفتح المنتدى كالعاده وبالمصادفه حصل لعبكة بالجهاز ففتحت عندى صفحة فكاهة وتسليه فلاقيت شوية نكت " جرعة ضحك من الاخر" ساعتها أنا نسيت الزعل وأنقلب حالى للنقيض اللحظة دى قررت انى ابدء بالكتابه فى المنتدى واتعرف عليكم جميعاّ .

التعديل الاخير حلو و لذيد لكن بما انه منتدى مجانى فمميزاته قليلة بالمقارنه بمنتديات اخرى أقل فى المستوى من حيث الموضوعات، اكتر شيئ فارق معايا انه لا يوجد بالمنتدى دون لود " حدش فيكو يعرف يظبطو عشان يعمل دون لود "

ولو حاتعدلي في البانر ده، تغيري اي

من قال لا اعلم فقد افتى ده مش إختصاصى لكن بصفة عامة ليس لها علاقة بالبانر انا مش عجبانى تقسيمات ابواب المنتدى " هناك ابواب بالمنتدى غير موجوده وبحتار جدا قبل ما ابدء فى كتابة موضوع معين وكل مرة الاقى هشام يقولى ليه الموضوع ده موجود هنا المفروض يكون موجود فى باب غيره " انا سريعه الزهق بصراحة وعايزة ابواب كثيرة ومتنوعه عشان الغشم امثالى لا ينكشوا سيادة المنتدى " ايه رايكم المنتدى يكون ملحق بموقع سئ سئ يعنى مثلا يينى لنا فى حته فاضيه عندة منتدى وينزل فيه إعلانات عشان منكنش موجودين عنده بخسارة " دى فكرة مقتبسه على فكرة مش فكرتى "

"ابدا لم يسلم احد منا من صفعات الزمن، لكن الاقوياء فقط هم الذين امتلكو من الاراده قدرا منعو به ايديهم من تخسس موضع الصفعه فلم يشعر احد بما اصابهم"
احكيلنا واحده من صفعات الزمن الي استفدتي منها كتير

السؤال ده صعب جداّ عليا لانى سريعه البكاء
حلمت يوما ان عمى قال لى " والدك توفى " وبعدها علمنا جميعا ان عمى مريض بالسرطان وفى مرحلة حرجة جداّ تلك وكيف يمكننا التعامل معه وهو يعلم انه يحتضر كيف نتكلم معه كيف انظر فى عينه
أبتسم له وأقول شد حيلك ؟ أم ابكى جواره هذا غير صدمة والدى وانهيارة التام على اخيه وبعدها بشهر واحد علمنا ان والدى هو الاخر أصيب بالمرض وفى بداية المرحلة الرابعه منه فوصل الخبر لعمى الذى فقد وعيه اثر سماعه الخبر " اخفينا على والدى حقيقة مرضه " وعللنا له سبب تناوله للكيماوى انه اصيب بمرض الروماتويد وبدلا من البحث فى الكتب الطبيه وعلى الانترنت على الطرق التى يمكننى ان افعلها لمريض السرطان بجانب المتابعة الطبيه فقد ركزت كل قرأتى على مرض الروماتويد
فأقوم بالحديث معه عن مرضه الذى اصطنعنا خوفا وبكاءا وحزنا وقهرا على والدى ورغبة منا ان تكون أيامه الاخيره ملئية بالأمل
وبعد ان طلب منا الطبيب انه لا فائدة من العلاج الكميائى وانه من الافضل ان يقضى الايام المتبقة بدون تعذيب اكثر " فقلت له يومها " جايبه لك خبر حلو جداّ " خلاص انت خفيت خالص " وخلصت علاجك الكميائى ومفيش اى ادويه حتخدها بعد النهارده " ولما سالنى " طيب ليه انا لسه تعبان " فرديت ده يا والدى من اثار الكيماوى انت دلوقتى فى فترة نقاهة "

توفى عمى ووالدى منذ عام ونصف ومازالت الاحزان معلقه فى حلقى وفى عينى
كنت كل يوم بعد بعد خروجى من المستشفى امشى بالشوارع لا اعرف أى اتجاه انا اسير كنت انظر لوجوه الناس ارغب ان أقول لهم كيف تسيرون كيف تضحكون كيفلا تواسونى وابى يرقد مريضاَ كيف تشكون ان عندكم مصائب ابعد المرض اى مصيبه، ابعد علمى بإحتضاره مصيبة وأبتلاء
فالأب فى البيت نعمة لا يقدرها ولا يشعر بطعمها إلا من مات والده " فقد تعلمت الصبر على البلاء وعزائى اننى يوما سوف الاقيه سوف أجلس على الأرض مقبله ليد عمى التى فى يوماّ صفعنى بها ولو يعود بى الزمان إلى الوراء لطبت منه ان يفعل بى ماشاء دون غضب منى او لوم له  فكلنا اموات يجب ان نسامح وان نتغاضى ولا نظل فى هذه الدنيا محملين بالكرهه والبغض لإناس أعتقدنا انهم قدموا لنا الإساءة.

اجاباتك منتاااااااااااازة يا ايمي
وتمس القلب

بس اتقهرت قهرا من رايك
لا مش معاها تتقلد منصب القضاء

بس نعملوا ايه بنحبووووووكي ومنقدروش نزعلوا من رايك
بس الراي ده مخلي دموعي انهار انهار منهمرة

بس الراي ده مخلي دموعي انهار انهار منهمرة

طب خدى بالك لاحسن اثيوبيا وكينيا وأوغندا يسمعوا ..
ويعملوا معاكي اتفاقية زي اتفاقية نهر النيل الجديدة ..

لو ماردتيش علي باقي الاسئله بتاعتي حاأجر عيل صغيرماسك طوبه كبيرة و اخليه يقف عند مكتب البريد الي جنب طيباس و يبطحك

ايه الكوسه دي

حاجاوب اهو بس مش عشان الواد ابو طوبه خايفه منه احنا حنراعى موضوع الكوسه عشان ازمة الغذاء العالمى

-

قريت انك مهتمه بالاطفال وكده....
لو ابنك في الحضانه وصاحبه ضربه "فرضا يعني"
رجع يعيطلك تقوليله ايه ؟؟
1- اللي يضربك اضربه
2- اللي يضربك قوله الله يسامحك وماتلعبش معاه تاني

شوفى الكلام الصح والمظبوط شيئ ولما اصبحت ام وأبنى يجى من المدرسه مضروب شيئ تانى
كذا مره يرجع من المدرسه واخد شالوت مثلاّ من ولد صديقه " زعلت طبعا ازاى اى حد يضرب أبنى ده ليلة سودا بفينكات واول مره قولت له اللى يضربك اقطعه
فرد عليا ليه يا ماما ده صحبى فاكتشفت أن الولد طيب جدا بفطرته فقررت انى أفكر واتصرف بحكمة واتاكد ان اللى ضربه طفل صغير زيه تمام وهم فى الاخر اطفال بيقلدوا الافلام عندهم طاقه وممكن يكون الولد يبهزر ووضعت اكتر من احتمال وقررت انى اعلمه الصح من الغلط اترك له حريه التصرف حسب طبيعته لكن اكيد فى الاخر عمرى ما حقوله تانى اللى يضربك اضربه .

البحر والنيل ... احساسك ايه تجاه كل منهم
- للالوان انطباعات ... فما هو لونك المفضل ؟؟
- في مقوله بتقول "بالحب لا نعقل.. وبالعقل لا نحب" ما مدي صحه هذه المقوله في نظرك ؟

البحر والنيل الأتنين حلوين الاتنين طعمين بس من الاخر أحنا عندنا بحر نعوم فيه وبردو بنشرب ميه النيل لكن يا عينى اللى عندهم نيل بس ميعرفوش يعومو فيه يغرقوا
" أسكندريه ورأس التين والنور منور على الصفين "



الألوان مممممممممم كل كل الالوان بحبها كلها ممكن افضل فى اللبس الروز والازرق الأسود والأبيض الاحمر بحبه فى الشنط
الاحذيه " أسود وبنى " وفى الصيف جميع الالوان للسابوهات بتكون جميله
طرح الشعر بحب اللوان المتداخله مع انها لا تليق كثيرا مع الملابس وبتكون مقيده فى نوعيه الملبس
فى الطبيعة بحب الازرق فى الخناق " وسع ملك الألوان أسود مع سبق الإصراف والترصف


اما هذه المقوله " الله ينور " الحبيبة باه لما يحبو تلاقى اثنين مع بعض غير متناسقين بالمره يمينى متطرف يسارى متطرف "
او مثلاّ كانهم لون فوشيا فاقع مقلم مع اخضر باهت مشجر " لكن فى النهايه الحب بين شخصين سواء حب عاقل او جنون أياَ كان وصفه فهو يشعر ما يعيش فيه انه ملك توج على رؤس المحبين وأن لا احد يحب ولا احد يملك قلب مثل قلبه

- ماهي حكمتك المفضله ؟؟

من قضا يومه فى غير حق قضاه أو فرض اداه أو مجد بناه أو علم أقتبسه فقد عق يومه وظلم نفسه

احكيلنا موقف كل ماتفتكريه تضحكي ، وموقف كل ماتفتكريه تعاتبي نفسك علي تصرفك

الموقف المضحك بس محدش يضحك ويذلنى عليه
كنت فى يوم رايحه الجامعه ولابسه بدى جديد وفرحانه اوى بنفسى معرفش ليه
وبالمصادقه السودا قابلت أصحاب أختى وسلمت عليهم وانا مازل إحساس الفشخره يمتلنى واثناء طرقى للمنزل وكنت بتفرج على نفسى فى زجاج المحلات اكتشفت انى لابسه بالمقلوب روحت اليوم ده باسرع ما يمكن فوريره شاورت لتاكسى وكانى عيانه بطنى وجعانى وللأسف أصحاب اختى عرفوا وقالو لها هاهاهاها اختك شفناها وكانت لابسه بدى بالمقلوب " اختى قالت لى كسفتينى وسط اصحابى "
إهيئ إهيئ إهيئ

وموقف كل ماتفتكريه تعاتبي نفسك علي تصرفك

بعاتب نفسى على ناس كتير لم اقوم بتعويرهم وأحداث عاهات تتراوح ما بين مستديمه وغير مستديمه
وفى مواقف كتير مش لازم اقولها لما بفتكرها او خلاص افتكرتها بتغاظ جداّ انا حضرب واحد نسكافية من قهوة سئ سئ وراجعه عشان مخى وجعنى
أه يا مخى كفايه أسئلة سلختونى بكره اكمل انا عايزه أقعد على القهوة سمعت ان حيعملوا مولد هناك انا حروح اتفرج

جه دورى فى الاسئلة

ايمى .. خدى نفس عميق وريحيلك شوية فى قهوة المعلم سئ سئ واضربيلك اتنين سحلب .

عشان حسألك شوية اسأله سهلة وبنت حلال .

الاول معاكى حاجة تخدى فيها احسن بعدين الاسئلة تدلدأ .


- اول ما بتسمعى كلمة "طفولة" بيقفز الى ذاكرتك حدثين حدثوا اثناء طفولتك , واحد وحش والتانى كويس , ومش ممكن تنسيهم ابدا . ممكن تحكيلنا عليهم .

- انتى بتعتبرى طفولتك كانت سعيدة والا تعيسة .

- مين الشخصية اللى اثرت على حياتك وحيفضل تأثيرها عليكى طول العمر .

- لو ماكنتيش ايمى , كنتى تتمنى تكونى مين .

- لما بتقفى قدام بحر اسكندرية الجميل بتفكرى فى ايه مباشرة , وتفرق معاكى لو واقفة قدام البحر بالنهار والا بالليل , وياترى بتعرفى تعومى والا لأ .

- انتى بتحبى السفر والا لآ , وهل سافرتى خارج مصر وايه البلاد اللى روحتيها .

- حادثة هددت حياتك بالفعل , احكيلنا عنها .

- لو جتلك 5 مليون جنيه فجأة اول حاجة حتعمليها ايه او اول حاجة حتشتريها ولها الاولوية فى رايك.

- ايه اكتر حاجة ممكن توترك وماتخلكيش تنامى وتجبلك ارق لايام او لغاية ما يظهر لها حل .

- انتى اررروبة فى صرف الفلوس ( يعنى جلده) والا (ايدك فرطه) والا بين البينين.

- اول قرار حتصدريه وله اولوية التنفيذ لو كنتى وزيرة التربية والتعليم فى مصر .

- اول قرار حتصدريه وله اولوية التنفيذ لوكنتى وزير الداخلية فى مصر .

- ولو طلبوا منك تشكيل الوزارة فى مصر , مين اللى حتختاريهم كوزراء ليشغلوا هذه المناصب , وزير الداخلية , الحربية , الصحة , الخارجية , الاعلام , التعليم , محافظ الاسكندرية .

- رأيك ايه فى اللى بيحصل لمصر , وانتى متفائلة والا متشائمة من مستقبل مصر , وياترى اللى احنا فيه ده سببه حكومة وسوء ادارة والا المشكلة فى الشعب والا السبب فى الاحداث والازمات العالمية .



انا حقعد شوية على قهوة المعلم سئ سئ واضربلى واحد شاى فى الخمسين لغاية ماتجاوبى على الاسئلة .

هو انا لسه خلصت الأسئله اللى عليا انا فى أسئلة من هشام ومن لارنو لسه مجوبتش عليها وفى منهم سؤال بعد ما جاوبت عليه الممنتدى عمل شقلاباز والإجابه ضاعت فى غياهب الجب حرااااااا م عليكم كل دى سؤلات أنا بكرهه الواجب اصلاّ
مكنتش بحب أعمله

واضح ان الشغل في قهوة الاستاذ المعلم سئ سئ شغل وقتك كله ومافيش وقت تعملي الواجب

لأ.... المذاكرة اهم علي فكرة
صحيح عامله ايه في شغل القهوة؟؟ مبسوطه طبعا مين أدك .... جالك التعيين بدري بدري و لحد عندك

ممكن اجاوب على أسئلة د. ادهم ولما اتعب او احب اخلع من سؤال أرجع اجاوب على الأسئلة اللى وقعت منى فى النصف من هشام ولا رنو



طيب موافقه بالإجماع

يمى .. خدى نفس عميق وريحيلك شوية فى قهوة المعلم سئ سئ واضربيلك اتنين سحلب

.



اخدنا النفس وضربنا السحلب وألغى يا سئ سئ سندوتشات الكبده

- اول ما بتسمعى كلمة "طفولة" بيقفز الى ذاكرتك حدثين حدثوا اثناء طفولتك , واحد وحش والتانى كويس , ومش ممكن تنسيهم ابدا . ممكن تحكيلنا عليهم .

طيب هو اولاَ سؤالك غير متوقع بالمرة وأستغربت جداّ بالرغم من سهولته لكن حسيت اد أيه انه معقد جداّ وصعب جدأ

الحادث الوحش او الغير سعيد
حادثة تتعلق بالصدق والكذب
المرحلة السنيه خمس سنوات
لى أخت تكبرنى بعام ويربطنى بها رباط كبير معظم وقتى أقضيه معها فى النوم والصحو، فى اللعب وفى ارتكاب وتدبير المصائب والمكائد، وفى نيل العقاب ونيل الإستحسان، كنا تختلف لنتفق نتعارك كى نتصالح نلعب لكى نسعد ونفرح ونجلس فوق الدولاب لكى نقفز .

فى يوم كنت أجلس على الأرض وأختى على الدولاب نلعب بالكرة ولكنها كفت عن اللعب معى وأنشغلت..
بلعبه اخرى " فقد أخفت معجون الأسنان بملابسها وأحضرت فرشاة مكياج وقامت قامت بتلوين سطح الدولاب "
شاهدت مافعلت ولم اعير المشهد أى اهتمام ولم يلفت نظرى أنها تفعل شيئ إن علم به والدى غضب كثيراّ "

بعد مرور عدة ساعات سألنى والدى بغضب شديد بخصوص هذا الحدث
وعلمت على الفور من نبرة صوته إن قلت أختى هى التى فعلت هذا سوف تنال عقاب عسير يصل إلى الضرب المبرح فخفت عليها وقلت له لا اعرف شيئ
ثم قال لى ليس غيرك ما فعل هذا وأن قلت الصدق واعترفتى بإنك الفاعلة فلم أعاقبك
قلت " انا لم أفعل شيئ "
ثم كرر كلامة
قلت " والله العظيم لم أفعل هذا الشيئ ولم اعترف أننى فعلت وأنا لا اكذب فما كان جزائى إلا الضرب الشديد جداّ جداّ بالأقلام على وجهى وانا التى أسمع من والدى دائماّ ان الرسول صلى الله عليه وسلم ينهى الضرب على الوجهه
فصعبت على جدتى التى اخذتنى فى حضنها وقالت لى فى أذنى .. قولى
انك فعلت هذا حتى يكف عن ضربك فسمعت كلامها وقلت نعم انا التى فعلت هذا ثم كرر ضربه لاننى فى البداية كذبت ثم تراجعت عن نصيحتها التى لم تجلب لى إلا المزيد من الضرب
ثم كررت من جديد اننى لم اكذب واننى قلت ما قلته مثل ما قالت جدتى حتى أتخلص من الضرب ولكن ..... لا فائدة والدى اقتنع من تلقاء نفسه اننى فعلت هذا واننى كاذبة وقام بضربى بحجة أنه يعلمنى الصدق وأنا الخامسه من عمرى
ذات الفهم المحدود الذى كان همى فى البداية ان لا تنال اختى عقاب رأيت من وجهه نظرى انها لا تستحقه لان مافعلته شيئ لا يستحق هذا العقاب الصارم
فى نهاية الأمر قررت الصمت قررت ان لا أرد عليه مهما فعل مهما ثار مهما وجهه لى الاوامر مهما اعطانى دروس عن الصدق او الكذب فإن لم يسمعنى ويصدقنى فلما العناء حتى أسمعه
ظل هذا الحادث يشعرنى بالتعاسة كلما تذكرته مهما مرت الأيام والعمر

...........................................................