همسات قلبية

كل شيئ ممكن ويجوز فى الزمان ده بس بلاش والنبى موضوع حرارة الجو اللى بيرفعوها دى ده الواحد بيستنى الصيف من السنه للسنه
واللى حيقرب جنب الجو بتعنا إحنا معلش يعنى حنقطعو

على فكره رز بلبن صاااااااابر أى كلام

أصلاّ أصلاّ أيه يعنى رز بلبن ده أزاى الناس تقدر تاكل الرز وهو حلو مش حادق وعليه فلف اسود يعنى مثلاّ تتخيلو ان ممكن ناكل مكرونه باللبن ولا باميه بالشيكولاته

انا مش بحب الرز بالبن لكن ممكن اكل جيلاتى مانجو من عند صابر من عند عزة من عند مالكى انا راضيه انا قنوعه

مين عزه دى ؟؟

أسكندرانى ازاى يعنى وعمال تفنط المحلات المالكى وصابر وانت متعرفش جيلاتى عزة ده حتى مشهور وطلع فى فيلم للعبله كامل " أسمة بلطية العايمة "
يبقى انت مش ايس كريمى ولا عندش معلومات بالمكسرات كفايه عن أشهر محلات إسكندرية فينك يا لارنو تعالى قولى له مين جيلاتى عزة

العزيز اولد مااااااان ازيييييييييك كده تروح عند صابر ومتاكلش رز بلبن
علي فكرة زمان ايام اسكندرية لما كانت اسكندرية كنت بحب صابر الاصلي اللي في البلد
محل صغنن والعربيات بالطوابير لكن كانت له نكهة خاصة مميزة زي كل حاجة زمان

ااااااااه لو كتبت همساتي عن اسكندرية هكتب بعشق اكتر من الاسكندرانية نفسهم

علي فكرة يا ايمي انا اكلت ايس كريم عند عزة وكتبت عنها في شئون مصرية

واحد صاحبى عزمنى هناك وقال إنه 100 % طلع ملوخيه المالكى وبس

فينك يا لارنو تعالى قولى له مين جيلاتى عزة

في الحقيقه والواقع يعني ... اذا اتكلمنا عن الجيلاتي في اسكندريه
فلا نقول المالكي ولا صابر ولا عزه حتي

هو "النظامي" الي في بحري
و جيلاتي "ريجيوليتو" الي في شارع المعسكر الروماني

"ريجيوليتو"

أيه ده انا معروفش ده أنا حتى مش عارفه اقول اأيمه ده يعنى بيتاكل

أيه ده انا معروفش ده أنا حتى مش عارفه اقول اأيمه ده يعنى بيتاكل

لااااااا
احنا نتخاصم بأه لحد ماتاكلي جيلاتي من عنده

لارنو وايمي انتوا بتقولوا كلام عجيب فين اسكندرية بتاعتي ايام الطفولة والشباب
ايام ما كنا بننزل بلاج سيدي بشر والمندرة ولعب الراكت والشمس تحرق جلدنا
ونفضل بالليل نعيط ويحطولنا مرهم مبرد ونقول مش هننزل ونجري تاني يوم علي البحر
فين ايام كباين ستانلي ولمة العيلة والفرجة علي الرايح والجاي
ومن حوالينا رمي الزهر والشيش بيش ولعب الكوتشينة والبصرة والشايب
فين ايام التمشية في المنتزة والمعمورة بالليل وريحة الفشار تشد والوان غزل البنات تنده علي البنات الرايحة والجاية
فين ايام نتيجة الامتحات والواقفة طابور علي باب السنترال وصوت هنا وهناك مجموعي كام
وفيه اللي بيقول مبروك وناس بتقول معلش ملحق ملحق كله بيعدي
فين ايام نزولنا وسط البلد علشان نشرب شوكولا جلاسيه

فين التمشية علي الكورنيش وقت العصاري واكل الترمس والفريسكا والرايح والجاي يرمي السلام
مش مهم مين يعرف مين لكن دايما نقابل وجوه وشها بشوش تدخل للقلب السرورمع نغمات موج البحر

كان فيه بساطة ومرح ونفوس صافية والاستمتاع باقل الاشياء
كانت القلوب مليانة بالرضا

عايزة فصلة في حياتي تخليني ارجع اعيش ايام ما كانت العيشة هنية مفيهاش احداث نكدية

فيرى فيرى دى لارنو مش انا هى روحى اضريها اللى بتروج للساحل الشمالى
لكن انا بموووووووووت فى اسكنرية وكنت فى ستانلى لانى بعشقه جدا وليا فيه اجمل ذكريات وكانت لينا كابيه هناك لكن راحت فى الوبا لما وسعو الشارع وعملو كوبرى
وعشان كده لما لاقيت فى زباله كتير زى مزعلتش ومشتمتش فى الشاطيئ واللى زبلو الشاطيئ والعمال اللى مسئولين عن نظافة الشاطيئ مفيش وقت عايزة الحق استمتع باليوم كله اشتغلت زباله وكلى فخر عشان انظف المكان اللى بحس انى جزء منه
وتعرفى بعد ما عملت كده دخلت الحمام هناك وعيطت كنت مبسوطة اوى بس كان وشى سخن جدا من الإحراج وانا بنظف الزباله لكن لما لاقيت الكل مشارك
قلبى دق جدا لأول مرة فى التاريخ بحس أنى مفيده مره واحده فى حياتى
طبعاّ انا حكيت فى كل مكان عن الموضوع ده ناقص انزله فى نشرة الساعه 9
بس أعزرونى على النشرة دى لانى فرحانه جداّ

نسيت كمان أخر كلمة لو سمحتم
فى ولد كان معدى ورمى علبة كانز فاضيه على الرمله وفجاة لاقى حوالى 10 افراد اللى شافوه وكانو له منظفين " بصوت اشبه بالكرباج أيه اللى انت عملته ده "
الولد زهل جدا ووطى على الارض وشالها سكتم بكتم

انا فخورة بيكي ايمي وسعيدة جدا حقيقي لما نحب ونخاف علي بلدنا
هي كمان هتحتوينا وتخاف علي زعلنا
لكن للاسف احنا طول النهار عمالين نضرب فيها
مش مخلينها ترفع راسها ولا سايبن لها مساحة تقف علي رجلها

لما بكون ماشية في الشارع وعايزة ارمي حاجة في ايدي وملقاش سلة مهملات بحطها في شنطة ايدي
صعب ضميري يسمحلي ارميها علي الارض وخارج مصر بعمل نفس الحاجة
زي ما انا قدوة لبلدي في الخارج بالاولي اكون فيها قدوة لنفسي ولغيري
كتير لما اكون مع حد في العربية ويفتح الشباك يرمي حاجة بجد بتخانق حتي لو كان سي السيد
اقوله تقدر تعمل كده برة مصر

من حقك يا ايمي تعبري عن فرحتك بالدموع لانك بتصرفك كنتي قدوة لغيرك
الكره بيعدي والحب بيعدي
وياريت كلنا نعمل زيك