همسات قلبية

أوقات بكون عايزة أرغي حبتين وافضفض وأطلع شوية أفكار بتيجي على بالي، علشان كده قلت نفتح موضوع نرغي فيه على راحتنا ونتكلم من القلب. الحقيقة حقوق الطبع والتوزيع للايم من حق فيري هي اللي اختارته.

يالله كل اللي نفسه يرغي في حاجة ولا يقولنا تأملاته يتفضل يهمس هنا وكله حيوصل من القلب للقلب.

نفسي في دكتور أسنان بيفهم

نفسي كل واحد ينشغل بنفسه ومالوش دعوة بخلق الله ...

أعتقد لو كل واحد انشغل بنفسه وعيوبه عن غيره هينصلح حال الدنيا ..

مش قصدي اننا ما نسألش في بعض وما نهتمش ببعض ...

لكن قصدي ما نقطعش في فروة بعض ولا نطلع إشاعات على بعض ولا تبقى الغيبة والنميمة ونقل الأخبار والأسرار والإشاعات وزرع الأسافين هيه شغلنا الشاغل ..

OSKASAN كتب:نفسي في دكتور أسنان بيفهم

إنت لسة ملقيتش دكتور يا أوسكا!!

أم يوسف كتب:نفسي كل واحد ينشغل بنفسه ومالوش دعوة بخلق الله ...

أعتقد لو كل واحد انشغل بنفسه وعيوبه عن غيره هينصلح حال الدنيا ..

مش قصدي اننا ما نسألش في بعض وما نهتمش ببعض ...

لكن قصدي ما نقطعش في فروة بعض ولا نطلع إشاعات على بعض ولا تبقى الغيبة والنميمة ونقل الأخبار والأسرار والإشاعات وزرع الأسافين هيه شغلنا الشاغل ..

وتبقى دنيا إزاي يا أم يوسف،


الجنة هي اللي كده، ومن كتر ما اللي بتقوليه هو بلاء في الدنيا، ربنا بيوعد أهل الجنة إن الحاجات دي مش موجودة في الجنة يقول تعالى: "لَا يَسْمَعُونَ فِيهَا لَغْوًا وَلَا تَأْثِيمًا - إِلَّا قِيلًا سَلَامًا سَلَامًا" (الواقعة) ويقول أيضا: " لَّا يَسْمَعُونَ فِيهَا لَغْوًا وَلَا كِذَّابًا - جَزَاء مِّن رَّبِّكَ عَطَاء حِسَابًا " (النبأ)، وكل ما يكون في كلام عن الجنة والترغيب فيها، حتلاقي ربنا بيأكد إن مفيهاش البلاء ده.
أما الدنيا متنفعش تكون دنيا من غير تحابيش. ~~~

ربنا يجعلك من أهل الجنة.

جيت اهمس لاحلي صحبة ببعض الهمسات القلبية لفترة عدت
كانت مرهقة نفسيا وجسديا
همسات بتحمل دمعة حزن بيصاحبها احيانا دمعة فرح تاثرا بعطية ربنا

ما هو طبيعتنا نزعل نعيط نفرح نعيط عاطفيين احنا اوي


قضيت فترة صعب جدا قبل ما اعزل خصوصا لما كان اساس البيت بينزل علي مراحل
حاجة غريبة كنت احس بتقلص في معدتي ودموعي تنزل غصب عني
ولما فضي البيت خالص بقيت اتامل الحيطان وارجع معاها بجد لذكريات بعيدة اوي

ليلة الرحيل كان فيه ميعاد بين بنت صاحب العمارة اللي اشترت الشقة
وبين سي السيد ..دخل جوزها وبنتها دكتورة متجوزة ومعاها واحد
ودخلت تفرجه الشقة وانا مذهولة
وموجوعة ..لقتني غصب عني كلمت باباها مع ان ده مش طبعي دايما بخبي مشاعري
وقلتله قدامي ساعات واسيب المكان ده يصح اللي هي بتعمله
وصوتي اتحبس ..هو طبعا راح نزلها
بس اتالمت اوي لانهم زمان كانوا ساكنين قدامنا
وحسيت ان المادة هي اللي طاغية علي النفوس
وناس قليلة اوي اللي بتحتفظ بشعيرات الود والتواصل

تاني يوم الصبح وانا بودع المكان دموعي فضلت تنزل
وركبت العربية يمكن كنت بسوق وانا مش شايفة

وصلت المكان الجديد وطلبت من ربنا يباركه واتفقت مع ابونا انه لازم يصلي فيه
صلاة التبريك اول يوم هننام فيه
وفعلا وضبت بسرعة وجت ماما واخواتي ووقفنا سي السيد وكريم وياسمين
وصلينا مع ابونا ورش البيت مية مصلية
وحسيت بهدوء ..
والحقيقية شكرت ربنا جدا ازاي المكان الجديد مريح نفسيا وانعم عليا بنسمة هوا ترد الروووووووووح
وكل ما تهل النسمة تطيرني بجد
تلقائي بلقاني بقول
احمدك واشكر فضلك يارب اد ايه انت حنين

ودي كانت همساية طويلة شوية
لكن اكيد هنتواصل مع مصرية وبشكرها علي موضوع

همسات قلبية

مصرية كتب:
ربنا يجعلك من أهل الجنة.

آمين يا مصرية ... وكل الحبايب كمان معانا ان شاء الله

مبروك عليكو السكن الجديد يا فريدة وإن شاء الله تكون قدم السعد عليكو وربنا يبارك لكم فيها

تاني يوم الصبح وانا بودع المكان دموعي فضلت تنزل
وركبت العربية يمكن كنت بسوق وانا مش شايفة

بصراحة يا فريدة ..
معاكى حق ..

أنا كل ما افتكر شقتى اللى فى مصر ..
اقول لنفسى .. انا أول ما ح ادخلها ح ابوس الحيطان حيطة حيطة ..

.....


لكن دلوقتى بصراحة ..
انا نفسى ألاقى حلاق كويس فى أمريكا دى ..

دى أهم عندى من الحيطان دلوقتى !!

ام يوسف ازيك وازي يحي وحشتيني

مرسي يا منمن الله يبارك فيكي


سمارت ضحكتني تصدق
ممكن تستعين بالحلاق ده مؤقت ابو شنطة تيك اواي زي زمان
وانت بتحلق فضفض بهمسات مع لمسات مقص عم عبده الحلاق

عادى يا مواضيع.. مانا الموضوع بالنسبة لى مابقاش موضوع تكلفة ..
حتى مابقتش مهتم بإن شعرى يبقى منظره كويس ..

بس الموضوع بقى تحدى جوايا ..
إنى ألاقى فيكى يا أمريكا واحد بيعرف يحلق كويس ..

لدرجة انى اقترحت على أخويا انه هو اللى يحلق لى ..
وقلت له .. أهو على الأقل انا ح اعرف اتخانق معاك لما تبوظ لى شعرى ..
لكن الأمريكان ح اتخانق معاهم ازاى؟؟

قام خاف ..
وقاللى لا .. روح احلق بره احسن !!

مش عارفة ليه حبيت اهمس همسة شاعرية فيها احاسيس غريبة اوي
انتابتني وانا في سيتي ستارز ووقوفي قدام محل اطفال



حسيت بسعادة سرت في كياني بجد
ووقفت اقول يا روحي الله شادي قرب يشرف
وده الاسم اللي كريم وياسمين اختاروه لاول مولود ليهم
ربنا يقومها بالسلامة ويجيب حفيدي العزيز بالسلامة
اد ايه الاحساس بالامتداد بجيل جديد يمكن مش احنا اللي ولدينه
بس الغريب اني حسيت اني هشيل كريم من جديد
احتمال لانه امتداد لكريم مش هيقل عن غلاوته
بس محسسني بفرحة لذيذة جوايا

ده احساسي الحالي اللي حساه مش عارفة لما المسه واقربه مني واخده في حضني
هكتب همسات بنفس الاحساس ولا احساس مختلف

استنوني لاني بين يوم وليلة هزيد لقب جديد من ضمن الالقاب اللي بنحصل عليها
في حياتنا من غير ما نسعي ليها
زي زوجة وام وحماة اي امممممممممممممه
وطنت اي عمتي
وتيتاااا..وده اخر نيشان ممكن احصل عليه اعتقد
هعلقه علي صدري



عموما قربت اهمس هنا بهمسات قلبية بتبث مشاعر غير عادية
اعتقد للحفيد المنتظر واشدو بهمسة قلبية واقولكم
انا وشادي
غنينا سوا
وااااااااااء

أنا عندى موضوع بأتامل فيه و نفسى أوصل لحاجه

أيه اللى بيحصل فى المنتديات ده !
الناس خلصت حرقه الدم فى الحياه و الشغل فقرروا يحرقوا دم بعض فى العالم الافتراضى

و الله عرفت قيمه الهدوء و السكينه اللى عندنا فى المنتدى ..أى نعم احنا 10 انفار بالكتييييييييييييير بس مرتاحين

ربنا يديمها علينا نعمه و يديم المعروف بين الجميع

ده احساسي الحالي اللي حساه مش عارفة لما المسه واقربه مني واخده في حضني
هكتب همسات بنفس الاحساس ولا احساس مختلف

فينك يا تيتة تحكيلنا تاني وتالت عن يومياتك مع شادي؟

أيه اللى بيحصل فى المنتديات ده !
الناس خلصت حرقه الدم فى الحياه و الشغل فقرروا يحرقوا دم بعض فى العالم الافتراضى

لأ يا أنيد المشكلة إن الناس بتحرق دمها برة العالم الافتراضي وبتنفس في العالم الافتراضي.

بمعنى لو واحد مديره مزعله في الشغل، حيسكت ويطلع عصبيته في عالم المنتديات.
ولو واحد معترض على قرار حكومي ولا عنده مشكلة مع قانون معين، مش حيقدر يطلع غله في المسؤل عن القرار أو القانون ده، لكن يقدر يتعصب ويحرق دم اللي موافق على القرار ده.

والله أعلم.





أما عن همساتي القلبية،

الفترة اللي فاتت زي ما حضراتكوا عارفين إني كنت بعاني من ضغط نفسي قاسي جدا، لكن يا ترى إيه أسبابه؟

أسبابه إن المصريين مش هم المصريين، عاداتهم اتغيرت، مفاهيمهم اتغيرت. مفيش نخوة، مفيش مشاعر طيبة.

وبعدين فجأة ألقيها موجودة، في موقف، في كلمة، في لمحة. مجرد بقايا لذكريات طباع جميلة، وشهامة فريدة.

طيب ليه كده؟
الفقر؟
الضغط؟
القوانين؟
الأسعار؟
البطالة؟

كلها حاجات موجودة في كل دول العالم، طيب ليه في مصر حصل كده؟
طيب المصريين عايزين إيه علشان يرجعوا زي ما كانوا؟

عايزين مأوى آدمي
عايزين أكل قليل بس كويس
عايزين هدوم قليلة بس تقيهم حر الصيف وبرد الشتا.
عايزين تعليم كويس
عايزين مدارس محترمة
عايزين مرتب يكفيهم الشهر ولو فضل منه يومين تلاتة حيتقضوا، بس المهم ميطروش يمدوا إيدهم للرشوة والسرقة والمهانة.
عايزين يحبوا الشرطة ويحسوا إنها بتحميهم
عايزين يحبوا الحكومة ويحسوا إنها بتمثلهم وهم وراها.

هل الطلبات دي صعبة أوي؟
عد م تلبيتها جعلت من المصريين شعب غريب،
تفشت الرشاوي
باع الإنسان نفسه ومبادئه ومثله علشان قرش زيادة
مبقاش في احترام لمدرس أو لضابط ما التنين بيمدوا إيدهم وياخدوا فلوس من المواطن.
بقى الغش هو الأساس، ودي بقى كانت القشة التي قسمت ظهر البعير.

امتحانات الثانوية العامة.
اكتشفت إن الأساس بقى الغش، كل الطلبة بيغشوا، وعادي وعيني عينك واللي مش بيغش ده هو اللي معهوش فلوش يرشي المراقب.
وأولياء الأمور زعلانين علشان المراقبين مش سايبين ولادهم يغشوا
والطلبة بيقولوا مش بنغش علشان فقرا
والطلبة بتنتحر مش علشان خايفة من الامتحان، أو خايفة تجيب نتيجة وحشة.

لأ..

خايفين ميعرفوش يغشوا.

حاسين بالمأساة اللي حسيتها.

وبعدين نيجي لممثلي الشعب، قوانين تفرض والشعب مش موافق ومعترض في كل الجرايد لكن مجلس الشعب موافق

تجاوزات مالية وتفارير من الجهاز المركزي للمحاسبات ومفيش حاجة حصلت.
الأسعار زادت، والكل بيصرخ، وبتزيد أكتر.

الضرايب زادت، وبتزيد أكتر.

المرتبات هي هي مبتتغيرش

اضرابات

اعتصامات

ومفيش حاجة بتتغير

القرى السياحية في ازدياد
والمشاريع الاستثمارية أكتر وأكتر

والعشوائيات بتتشال
والناس في الشارع

والحكومة عارفة كل ده، ومش عارفة تتصرف إزاي.
بيعملوا كل اللي النظريات الإدارية بتقوله، بس مفيش فايدة.

طيب الحل فين؟
نعمل إيه؟

يعني هل المشكلة في الحكومة؟
ولا في تغير العادات والقيم؟
ولا في عدم وجود قناة اتصال بين الحكومة والشعب؟

أكتر حاجة أثرت فيا وضغطت على أعصابي هو تأكدي من تغير المصريين بالرغم من وجود بقايا طيبة فيهم.

معلش يا مصرية هاجل همساتي عن قدوم الضيف الغالي

وههمس اني اتاثرت بهمساتك انتي وانيد وسرحت في كلامكم اوي

فعلا وصلنا لحالة غريبة مش في المنتديات او برة المنتديات ده في كل حاجة حوالينا
مش بس في عصبية وخلق ضيق من قريب او من بعيد
حتي الاكل بقي تادية واجب ملوش طعم
مفيش لمة الاسرة زي زمان
احتمال ده سبب متاعبنا ..كل واحد بقي في دنيا تانية
فجمدت المشاعر وبقت صلبة فخلت كل حاجة حواليها كانها قوالب من الطوب
من فكر.. لتعامل.. لتواصل .. محدش راضي يفهم ويتفهم حد

الصلابة خلت الانسان من برة بصورة ..وصورته الاصلية غصب عنه بتتحرك جواه
عايزة تطفو وهو مانعها ..احتمال ده ادي بينا لازدواجية في الشخصية

مش عارفة بس فعلا انا تهت بين الناس
مين جواه زي براه
حتي الاماكن اللي عارفينها بقت غريبة
يمكن شكلها ببساطتها في الاول كان احلي لكن لما زادت زينتها فقدت روحها
معالمها بقت باهتة
اصبحت جمال بدون حياة
زي حالنا فقدنا انسايتنا مع بعض واصبحت الوجوه باهتة ..
مع ان الحياة والفقر عمرهم ما اتمحوا ولا هيتمحوا
لكن حالنا اتغير يا تري طبقة اوزون الانسانية طغي عليه غبار الحقد والكراهية

ياتري السبب ان نسمة المحبة ذهبت مع الريح ولم تعد تسكن القلوب

في النهاية هي مجرد همسات قلبية

اهمس لكم انا شوية بس على الله ماتصدعوش من همسى اصل بصراحة انا مش عايز اهمس انا عايز اصرخ واصوت

والله مانا عارف اهمس على ايه ولا ايه ولا ايه

نقول مثلا
كنت وانا فى مصر مستعجل امتى هسافر امتىه سافر زهقت من البلد زهت زهقت وبصراحة كنت زهقان والوضع كل شوى بيتدهور على اساس كنت فاكر ان سفرى ده هيحل المشكلة
لكن للاسف المشكلة زادت الغربة بجد طعمها وحش جدا علقم

من شغلى على سكنى ومن سكنى عل ىغرفتى ملل فى ملل فى ملل فين وفين لما اخرج
ونظرا لانى معنديش عربية فى الوقت الحالى فمبقدرش اخرج كتير لان الموصلات هنا نار ياحبيبى نار .
المهم جيت الشغل على اسم شركة ضخمة وكبيرة قولت هيا دى الى هترفعنى وتخلينى اكبر واتعلم ومستوايا يزيد ويرتفع لكن للاسف لما جيت لئيت وضع غريب ومتدهور رغم ان الشركة كبير بس انا جيت فى وقت صعب جدا مرحلة خصخصة ورئيس جديد للشركة ويهودى كمان (فى السعودية ) هههههههههههههه. مبهدلنا اخر بهدلة جيت على درجة اقل من الى مفروض اجى عليها بالنسبة لتعليمى وقونين الشركة
المهم انى لحد النهاردة مش حاسس انى اكتسبت حاجة مفيدة ليا غير يمكن شوى مصطلحات انجليزى جديدة عليا .
مستوايا اعلى من كل الموظفيين الى معايا فى المكتب وللاسف لانى مصر واجنبى فى انا اقل واحد فيهم فى الدرجة وانا الى شايل كل الشغل على دماغى واى غلطة تيجى عليا مانا الصغير والاجنبى . المهم ان بجد وضع الغربة صعب جدا ولو فى فرصة فى مصر كويسة ياريت الشاب يتمسك بيها لو فيها امل كويس ليه . والوضع هنا بالسنبة لمصر ميفرقش كتير الاسعار غالية والمعيشة نار وصعبة .
بحاول اتعلم من اى حد ومن اى حاجة علشان اخد خبرة بس للاسف كتير جدا مابيدونيش الفرصة انى اعرف منهم اى حاجة بس ادينى بحاول وخلاص
على فكرة النت جالى فى الشركة بواسطة ويمكن ينشال فى اى وقت يعنى بعد معاناة كبيرة قدرت يوصلولى النت هنا فى الشركة .
وبصراحة القاعدة بين الاهل والاصحاب متتعوضش ولا تتقال باى مال ابدا .
بس خلاص انا اخترت من البداية ولازم اتحمل نتيجة اختيارى مهما كان متعب ليا.

فى همسات جاية اكيد يمكن اصعب من دى بكتير فى العدد القادم من همسات الهرم
يارب بقى الواحد يهمس همسه مفرحة بدل الاكتئاب ده
معلش دوشتكم

طبعا همساتك مش ممكن تدوش يا هرم وياريت تواصل همساتك
ونهمس كلنا بمكنونات قلوبنا لبعضنا
علي الاقل ده هيخلينا ندافع عن التواصل الانساني
ونحس ان لسة فيه امل ان حد ممكن يسمع التاني

لفت نظري كلمة انت كتبتها ولو فاكر كنا بنتناقش فيها كتير قبل سفرك

كنت وانا فى مصر مستعجل امتى هسافر امتىه سافر زهقت من البلد زهت زهقت وبصراحة كنت زهقان والوضع كل شوى بيتدهور على اساس كنت فاكر ان سفرى ده هيحل المشكلة
لكن للاسف المشكلة زادت الغربة بجد طعمها وحش جدا علقم

فعلا احساس الغربة عموما في اي مكان في الدنيا طعمه علقم
احيانا بنكون في بلدنا وبنحسه وبنتوجع اوي منه
يا تري احنا اللي بنخلق غربتنا بايدينا
ولا هي بقت فايروس بينتشر في العالم كله

حتة همساية قلبية

ربنا معاك يا هرومه...مش عايزه ازيد همومك بس فاكر لما قلتك....خليك في مصر الغربه وحشه وهتتعب انت مكنتش مقتنع....وبعد فتره هتبقى مصر والسعوديه واحد غربه في غربه
بس لو ده فيه عزاء لك ...غربة النفس اصعب من غربه المكان

ربنا معاك ومتقلقش انت في البدايه ان شاء الله هتطلع بمجهودك خليك مستمر ومتعرفش يمكن تلاقي احسن من الشركه دي

ربنا يوفقك

نفسي ابقى مريضه بAnorexia ...بس اوصل لمرحله وبعدها اخف مش مشكله :xgfd:

ههمسلكم همسة يمكن كتير هسيتغربها
بس بصراحة مش قادرة اكتم الهمسة دي لانها لمساني اوي من جوة

هبتدي معاكم الهمسة من اول ما بدات
همسة فيها الجو المصري الاصيل

النهاردة كان فيه اجتماع ودي بين مجموعة ضد التمييز الديني
وبما اني منضمة للمجموعة رحت مع مجموعة الاجتماع
وكان في مكان ما علي ضفاف النيل
يمكن النيل صبغ سحر خاص جوايا وخلاني اتاثر اكتر بجو الالفة
بين مجموعة مسلمة ومسيحية وبهائية
كنت بتكلم مع الكل مش عارفة كل واحد منتمي لاي ديانة
قد كده الجو كان اسري فيه الفة وود
ابتدا حوار بيني وبين دكتور محمد منير مجاهد نائب رئيس هيئة المحطات النووية
ومؤسس مجموعة ضد التمييز الديني

حصل حديث مطول بنا وعرفت منه انه قعد 10 سنين في انجلترا ولما قرر يرجع
البروفسير بتاعه حاول يثنيه عن قراره
كان رده :
انا بقالي في انجلترا عشر سنين عمري ما حلمت حلم انجليزي

عجبني اوي رده..
الحقيقة شخصية بنحني احتراما وتقديرا لاخلاقه الراقية في احترام ادمية الانسان

طلب مني امسك مركز اداري في موقع ضد التميز ..اعتذرت
وقلتله انا بكتب علي ادي من جوايا مليش في الادارة
فطلب اكتب كعضوة في المجموعة علي الاقل
استمتعت بحواري معاه حسيت اني قاعدة مع ابويا او اخويا او جاري
حسسني ببساطة علاقات زمن جميل عدي..

بعدها بشوية استاذن وقعدت مكانه جنبي الدكتورة بسمة موسي بهائية
اتكلمت معاها كتير اوي عن مباديء روحية
الحقيقة لمستني جدا باخلاقيات وسمو روحاني لما تؤمن به
قالتلي
انهم لا يؤمنون بطريق الحرب مع انه اسهل واقصر الطرق
لكن نهايته دمار
اما طريق السلام يمكن متعرج ومليان احجار لكن نهايتة حب وسلام
مبادئهم لا تعرف الكره او الحقد او الضغينة

الحقيقة حزنت من ثقافتنا جدا ازاي نحكم علي شخص ونرجمه لمجرد اننا لا نؤمن بما يؤمن به

وزادت قناعتي اني اتمسك بحبي للانسان مهما كانت توجهاته
فهو انسان يحاسبه الله وليس انا الضعيفة مثله
لان قلبه مع الله وهو العالم بدخليات هذا القلب

مرسي يا ادهم لتعليقك علي الاجتمااع الودي

بصراحة حسيت فيه بامانة بمخدروقتي اداني احساس بالهدوء والسكينة
بعيد عن مظاهر العنف اللي تديها ضهرك تلف وترجع لك