مصريات شو

يا سلام يا أنيد
شوفي ربنا مبينساش حد

بالصدفة البحتة والله
أا مسافرة بكرة وراجعة بعد شم النسيم
ومش حينفع أدخل النت

يعني على ما ارجع يكون سمارت فضي ورجع يرد هو كمان.

معلش المرة دي بقى

أنا أرشح أوسكا العزيز

اوسكااااااااااااا
الدور الدور الدور الدور
موعوده ياللى عليكى الدور

مهو انا كمان مش هافضى غير بعد شمو النسيمو
اقفلوا الدكانة على سمارت لغاية لما ييجي وبعديه مصرية

ووراه الباشمهندز اوسكا

بالضبط كده يا دولفي

طيب يظهر حنستنى بعد شم النسيم

بس كويس عاملين ستوك كويس

إزيكم .. وحشتونى ..
معلش اتأخرت على البرنامج ..
كان فيه زحمة مواصلات بس ..

نجاوب بقى على أسئلة الباشمهندسة جاتى ..

انت تعرف ترقص؟\
هل كانو بيضحكو عليك في المدرسة اصحابك و على ايه؟؟

مش بعرف ارقص .. لا بلدى ولا أجنبى ..
بس نفسى اعرف ارقص .. slow وtango بس .. لكن بلدى لأ طبعا ..

اصحابى مكانوش بيضحكوا عليا ..
بصراحة كنت محترم زيادة يعنى .. مش متنشى يعنى .. لكن كنت هادى ومؤدب ..

ما هو اسم الفتاة اللي تحبه ؟؟
كم قصة حب عشتها؟
كم قصة حب اثرت فيك؟

بحب اسماء كتيرة ..
لكن بالأكتر بحب اسم كاترين وماريز ..

عشت قصة حب مرتين ..
والقصة التانية أثرت فيا جامد ..

تعرف تنضف السمك يعني تشيله مصارينه و كله؟
انت فضولي؟
ما هي النكتة اللي ضحكت من قلبك عليها؟
تعرف تلعب شطرنج؟

مش بعرف انضف السمك وبأزعل لأنه مات ..

مش فضولى ولا اتدخل فيما لا يعنينى ..

النكتة اللى ضحكتنى ..
كثيرة ويمكن اللى فى بالى دلوقتى ..

[اتنين متجوزين من عشرين سنة .. قرروا يروحوا يصيفوا
ع البحر بنفس الفندق اللى قضوا فيه شهر العسل زمان
لكن الزوجة كانت مشغولة فاتفقت مع زوجها على إنه يسافر لوحده و هى
ها تحصله بعد يومين
وصل الزوج ع الفندق و دخل الغرفة فوجد كمبيوتر بالغرفة و متوصل بكابل الانترنت فقا م يبعت ايميل لزوجته يطمئنها فيه على أحواله
بعد ماكتب الرسالة و هو بيكتب عنوان البريد الالكترونى لزوجته أخطأ فى كتابة حرف فى العنوان
و بالطبع راح الايميل لشخص تانى تصادف إنه كان لأرملة لسة راجعة من مراسم دفن زوجها اللى توفاه الله بنفس اليوم .. الست الأرملة فتحت الكمبيوتر بتاعها لتقرأ ايميلات التعازى وقعت ع الأرض مغمى عليها بلحظة دخول ابنها اللى حاول يسعفها بكل الطرق و لم يفلح فى إفاقتها
نظر الابن إلى كمبيوتر والدته و قرأ الرسالة التالية
زوجتى العزيزة .. وصلت بخير .. و يمكن تتفاجئى لأنك ح تعرفى أخبارى عن طريق الانترنت لأنه دلوقتى بقى فيه كمبيوتر عندهم و يقدر الواحد يبعت أخباره لأهله و أحبابه يوم بيوم
أنا بقى لى ساعة واصل و تأكدت إنهم جهزوا المكان و كل شىء و مش باقى غير وصولك لعندى هنا بعد يومين
إشتقت لك كتير و مشتاق أشوفك و باتمنى تكون رحلة سريعة زى رحلتى
ملاحظة : مش ضرورى تجيبى ملابس كتيرة معاكى لأن هنا الحر شديد قوى قوى يعنى جهنم !!!]

لو كانت ليك فرصة تعود الى الماضي اي وقت تعود ايه و ليه من حياتك؟؟
لما بتتفرج في الافلام الدراما او العاطفية هل تنزل الدكعة من عينك ؟؟
هل انت حساس؟
ايه الحاجة اللي يقدر يعملها صديقك علشان يقطع صلته بك و تكرهه و ترفض تشوفه و لا تتكلم معاه من جديد؟؟

اعود لوقت ما كان عندى كلاب ..
يا إما ارجعهم تانى لصاحبهم ..
أو انقذ كلبى اللى مات ..

انت بتلعب بحواجبك؟؟
لو اتعرفت على بنت و عشقتها و حبيتها حب ملوش نهاية و لا حجم و في الاخر اكتشفت ان ديانتها غير ديانتك حتغمل ايه؟؟
انت ليك شراب مخروم؟؟

مش بحب العب بحواجبى .. منظرها وحش ..

للأسف دايما بأبص لأبعد من تحت رجليا ..
وبشوف آخر الموضوع قبل أوله ..
ولأن الحب بين الديانات المختلفة هو حب بدون أمل ..
فأكيد مش ح ابتدى فيه لأن عقلى ح يكون شغال من البداية ومش ح اقدر الغيه ..

كنت زمان بأخيط أى الشراب المخروم وألبسه ..
لكن دلوقتى مش بحب .. بأرميه على طول ..

لما بتتفرج في الافلام الدراما او العاطفية هل تنزل الدكعة من عينك ؟؟
هل انت حساس؟
ايه الحاجة اللي يقدر يعملها صديقك علشان يقطع صلته بك و تكرهه و ترفض تشوفه و لا تتكلم معاه من جديد؟؟
لما بتسمع اغنية ماما زمانها جاية..بتغني مع الاغنية و بتحس ايه.؟؟؟

مش اى فيلم دراما أو عاطفى تنزل دمعتى ..
لكن ممكن تنزل دمعتى .. بس لازم يكون فيلم قوى ..

أنا حساس فعلا .. بس مش بالدرجة الكئيبة لمعنى الاحساس ..

الحاجة اللى يعملها صديقى عشان اقطع صلتى بيه هو الكدب عليا ..
وانه يحاول أن يخدعنى وأنا اكتشف دا ..

لما بسمع اغنية ماما زمانها جاية بقفل الراديو ..

معظم لبسك فورمال ولا كاجوال ؟
ايه البلد الي نفسك تروحها ؟
الطماطمايه فيها كام بذرة ؟؟
تفتكر مين الاول البيضه و لا الفرخه ؟
اكتب جمله تتقرا من اليمين للشمال زي من الشمال لليمين
ايه اكثر نوع فاكهه بتحبه ؟

اسئلتك يا لارنو خفيفة فعلا ..

معظم لبسى فورمال .. لكن بحب البس كل الانواع ..
وحاليا معظم لبسى كاجوال لأنى بأكسل أكوى هدوم الفورمال ..
وكمان لسه مابقتش انا عشان اهتم بمظهرى فى أمريكا ..

البلد اللى نفسى اروحها ..
فرنسا .. أم الدنيا بصحيح ..

الطماطماية فيها كام بذرة؟
الطماطماية الكبيرة ولا الصغيرة؟

البيضة ولا الفرخة ..
افتكر الموضوع مش كدة ..
لأن قانون البيضة ولا الفرخة هو قانون أرضى ، يخضع للزمن والبداية والنهاية ..
والقانون الأرضى إلى فناء .. وخارج الأرض لا يوجد بداية ولا نهاية ..
ولا يوجد بيضة ولا فرخة ..

جمله تتقرا من اليمين للشمال زي من الشمال لليمين ..
ارحمينى يا لارنو ..

ايه اكثر نوع فاكهه بتحبه ؟
البطيخ والعنب ..

ليه ؟؟؟
ايه اكثرصفه بتكرهها في الرجال و في السيدات ؟
الحب اعمي ... صح و غلط وليه
موقف حصلك وانت صغير زعلت اوي من نفسك انك اتصرفت كده
انت بتعتذر بكلمه "اسف" ولا بتصلح الغلط وتتعامل بطريقه شيك من غير ماتقول اسف ؟
انت ليه اتأخرت في الرد علي الاسئله يوم ؟

ليه المرأة مابقتش ملائكية فى نظرى ..
لأن عدد النساء اللواتى عرفتهن وفيهن مكر الأنثى أكتر من عدد اللواتى عرفتهن وفيهن البراءة ..

اكتر صفة اكرهها فى الرجل ..
هو الغرور ..

وفى المرأة ..
لؤم الأنثى ..

الحب فعلا أعمى ومجنون ..
وهذه اسطورة يونانية تقول ان اله الجنون ضرب اله الحب على عينيه فأفقده اياهما ..
وذهبا الاثنان إلى المحكمة .. فحكم القاضى بأن يقود اله الجنون اله الحب فى كل مشاويره ..
وهكذا اصبح الحب اعمى يقوده مجنون ..

وهذا صحيح ..
فالحب قد جعل ملوكاً تتنازل عن عرشهم ..
وجعل اشخاص مسالمين يكونون سفاحين وقتالين ..

موقف حصل لى وانا صغير وزعلت اوي من نفسى انى اتصرفت كده ..
كان عندى قطة وأكلت سمك وتقريبا الشوك وقف فى زورها ..
وقعدت تحاول تطلع الشوك ومعرفتش .. وماتت بالبطئ ..
قدام عينى .. وانا كنت خايف اقرب منها ووقفت اراقب الموقف من بعيد ..

وزعلان من نفسى بسبب انى كان ممكن انقذها ..
لكن خفت ..

مش بحب كلمة "آسف" ..
ومش بقولها إلا فى الشديد الأوى ..
وبأفضل انى اعتذر بطريقة شيك ..

لكن بحترم الانسان اللى بيقول كلمة "آسف" ..
ودايما أقول لنفسى .. ياريتنى زيه ..

لكن مش بحب اللى بيقول "آسف" عمال على بطال ..

انت ليه اتأخرت في الرد علي الاسئله يوم ؟
انا مش بس اتأخرت عليكم فى الرد يوم .. دا حوالى عشر أيام ..

بس انشغلت فى الشغل وفترة الأعياد ..

فيه سؤال مهم
كام صوبع محشى فى فدان الكرنب

سؤال مهم فعلا ..
بس انا مش بحب المحشى الكرنب ..

ممكن يكون سؤال فى محشى الورق عنب؟

اسئلتك يا فريدة محتاجة موضوع لوحديها ..

لما بتلعب ماتش كورة في الشارع اللي ورا البيت مع زملاءك
بتتخيل نفسك متقمس اي لاعب كرة
وياتري تخيلت نفسك يوم لاعب كرة في فريق؟

عمرى ما لعبت كورة فى الشارع ..
بس كنت بأروح نادى متواضع وأنا صغير ..

وقبل سفرى كنت بأروح ألعب فى ملعب مدرسة بنأجره ..
كل كام اسبوع ..

وفى الأول كنت بألعب باك شمال ..
وبعدين انتقلت لمركز الوسط المدافع ..
وحالياً بأحب العب وسط مهاجم ..

ولما كنت بأتخيل نفسى لاعب ..
كنت بأتخيل نفسى طاهر الشيخ لاعب الأهلى القديم ..
لأنى كنت بحبه .. وبحب الستايل بتاعه ..

ولعلمك بيشبهونى بزين الدين زيدان .. :xgfd:

ودايما بحلم انى اكون لاعب كرة ..
لغاية دلوقتى ..

وكان نفسى من زمان أكون لاعب كرة ..
أو اكون مدرب كرة ..

وكنت فى الكنيسة ماسك النشاط الرياضى ..
وكنت بأنظم دورة لشباب الكنيسة .. وبنأجر ملعب وبنعمل فرق كورة .. وطبعا بأكون أنا على رأس فريق .. وبنلعب ماتشات دورى بيننا .. تستغرق حوالى تلات أشهر الصيف .. وفى النهاية نوزع جوائز للفرق الثلاثة الأولى مع هداف البطولة ..
وكنت ناوى ادرب فريق ثانوى .. بس موضوع السفر شغلنى .. وابعدنى ..

وأول ما جيت أمريكا اشتريت جزمة كورة ..
والملاعب هنا حلوة .. بس مش لاقى حد ألعب معاه ..

ماتيجوا تلعبوا معايا؟

سمارت افندي اكيد قريت لكاتبنا واديبنا العالمي نجيب محفوظ
عايزينك تقول تاملاتك عن بعض العبارت
التي قيلت علي لسان ابطال رواياته

للأسف يا فيرى ..
مابقراش لنجيب محفوظ عشان اعرف عبارات أبطال رواياته ..

وبحب اسلوب طه حسين أكتر ..

في عبارة ساخرة قال عن الزواج:
لماذا يصر الناس علي الزواج منذ بدء الخليقة ؟
لان الزواج كالموت ..لا ينفع معه التحذير ولا الحذر
..بين القصرين..

هو للأسف ان يكون الزواج بهذه الصورة المريضة ..
لأن الزواج من قانون الحياة التى خلقها الله .. ولكن يبدو أن عبث البشر قد امتد إلي هذا القانون ايضا ليفسده ..
فصار الزواج الذى هو قانون الحياة .. اصبح الموت ..

وهو كالموت فى صفة الموت ..
وكالموت فى صفة القدرية حيث لا ينفع مع القدر الحذر أو التحذير ..

شر لابد منه يعنى ..

وفي اصداء السيرة الذاتية
قال الشيخ عبد ربه التائه:
مع شهيق الكون وزفيره تهيم جميع المسرات والالام..

وأيضاً .. قال جبران خليل جبران أن الحياة هى دمعة وابتسامة ..
ولا تكون الحياة إلا بالدمعة وإلى جانبها الابتسامة ..
ويبدو أنه قانون الحياة ولذاتها أيضاً ..

سئل الشيخ عبد ربه التائه:
هل تحزن الحياة علي احد؟
فاجاب : نعم..اذا كان من عشاقها المخلصين ،
وهل تعتقد ان نجيب محفوظ اد ما حب الحياة الحياة فعلا حزنت علي فراقه؟

الحياة التى نقصدها ليست مجرد حياة الأكل والشرب ..
ولكن حياة الفكر والمعنى ..

والحياة بهذا المفهوم تحزن لموت عشاقها المخلصين ..
لأن مضمون حياتها هى فى حياة هؤلاء العشاق المخلصين ..
اللذين بموتهم تفقد الحياة حياتها .. ومعناه ومضمونها ..

ولو لم يتواجد عشاق الحياة المخلصين ..
فكيف تكون هناك حياة؟

فاهمة حاجة؟

...

أما نجيب محفوظ ..
فاعتقد ان مجرد تأملاتنا اليوم فى كلماته هو معنى لوجوده للأن فى الحياة ..

واعتقد زى ما بيقول صلاح عبد الصبور على لسان صالبى الحلاج ..
[احببنا كلماته اكثر مما احببناه .. فقتلناه لتبقى كلماته] ..
فأعتقد ان نجيب محفوظ لن يكون مرتاحاً إن بقى واختفت كلماته ..
ففى هذا ليس حياة .. ولكن حياة نجيب محفوظ هو فى حياة كلماته ..

ياتري لما بتكون واضح مع نفسك ده بيوضح الرؤية وبيساعدك تتفهم الاخرين؟
وياتري بتعمل تدريبات لتقبل عيوب الاخرين؟

تفهمى للأخرين وتقبلى لعيوبهم أمر حديث بالنسبة لى ..
ولسه فى مرحلة النمو فيه ..

ولكن انى احط نفسى مكانهم دا بيساعدنى كتير على انى اتفهمهم واقبل عيوبهم ..
بس مش دايما بأقبل عيوبهم لأن طاقة احتمالى ضعيفة .. للأسف طبعا ..

عايزين نعرف تامل الباشمهندس في هذه المقولة:
الحياة تتعثر ..ولكنها لا تتوقف

الحياة لا تتوقف .. وزى ما بيقولوا مسيرها تفرج ..

ومكالمة من بنوتة صغننة طلبت انه يشرحلها العبارة دي
الانسان ينظر الي العين اما الله فينظر الي القلب

وبتقوله ليه يا اونكل
الناس بتقفل قلبها عن الناس

الانسان ينظر إلى العين بمعنى انه يحكم حسب الظاهر وتخدعه المظاهر ..
أما الله فينظر إلى الداخل .. ويحكم حكماً عادلاً ..

والانسان ينظر إلى العين لأنه يحكم حسب الجسد ..
وسيرتاح البشر فعلا لو نظروا إلى القلب ..

ولأن هذا أمر صعب ..
فالانسان لكى يقترب من صفة النظر إلى القلب ..
عليه أن يقترب من الله أولاً ..

أما الناس وليه بتقفل قلبها عن الناس ..
لأسباب عديدة .. فيه ناس بتقفل قلبها لغياب الخير عن قلبها ..
وفيه ناس بتقفل قلبها لأنها ساذجة وشبعت خداع من البشر فقررت تقفل قلبها ..

النساء اربعة انواع
امراة جميلة ..وهذه تعجب الرجل
وامراة ذكية ..وهذه تلهم الرجل
وامراة فاتنة ..وهذه تاسر الرجل
وامراة طيبة ..وهذه تتزوج الرجل

ومع اغنية عبد الوهاب
يا زهرة في خيالي
ما هي مواصفات هذه الزهرة اللي تتمنها وتكون نصك الحلو في المستقبل

انا ح اقولك بطريقة تانية ..
المرأة لو جميلة وطيبة .. فهذه يتزوجها الرجل ..
والمرأة لو ذكية وفاتنة .. وفهذه تعجب الرجل ..
والمرأة لو جميلة وذكية .. فهذه تلهم الرجل ..
والمرأة الطيبة والفاتنة .. تأسر الرجل ..

أما مواصفات زهرتى التى أتمناها ..
ف .. جميلة الشكل .. بس انا ليا نظرة فى جمال الشكل مالوش دعوة بمقاييس الجمال المعروفة ..
وأن تكون لها شخصية وفكر ..
وأن تكون حرة .. وليس متحررة ..
مع عناد خفيف .. لكن مع حكمة أيضاً ..
وأن تكون متمسكة بالتعاليم الدينية ..

جايبالى عروسة ولا ايه؟

انتا يا سمارت انتا
اسمك سنك رقم جلوسك

اسمى .. مش مصرى .. هو يونانى أو تركى ..
سنى .. فوق العشرين بحوالى 19 سنة ..
رقم جلوسى .. أنا قلت من الأول انك عاوزة نمرة تلفونى ..

برضه مش ح اديهولك ..

عايز اية من الحياه
وهل ياترى عارف هيا عايزة ايه منك
ياترى بتشتغل بمؤهلك
يا ترى بتروح الفرن ولا زى حلاتنا
يا ترى بتفكر فى بكره كل يوم ولا سايبها زى ما تيجى

عايز ماكونش زى عم عباس البقال اللى محدش يعرف عنه حاجة ..
ولكن مش عاوز اكون مشهور وخلاص يعنى ..

لكن عاوز اعيش فى الحياة وأؤثر فيها ..
زى ما كتير ماعاشوا وأثروا فيها ..

تفتكرى دا طلب كبير؟

هاااااااال انت ثورجى
هااااااااااااااااال ليك مشاركات دولية

انا ثورجى ..
لكن مش بمعنى انى متمرد ..
لكن بمعنى انى ايجابى ..

أما عن المشاركات الدولية ..
فنفسى يكون ليا مشاركات لكن ماليش لغاية دلوقتى ..

هاااااااااااااااااال
لا بلاش دى عشان الرقابة بقة
وربنا يستر

كنتى ح تطلبى نمرة تلفونى ..
برضه مش ح اديهولك ..

....

تصدقوا بقى ..
عشان "هااااال" بتاعة دولفين دى ..

ف معلش يا جماعة ..
مع الاعتذار لأوسكا ولمصرية ..

انا عاوز دولفين تقعد على الكرسى ..
عشان عندى ليها اسئلة من نوعية "هااااااال" دى ..

لا لا لا لا لا لا لا

مش اخرة صبرى يا عم سمارت

وبعدين الالتزام الالتزام الالتزام

يعنى نلتزم بالدور يعنى

مصرية الاول
وبعدين اوسكا

ولو فى حد عايز مكانى بعديهم انا ممكن اتنازل عنه يعنى

و الله يا سمارت يا زين ما أخترت

دولفين ..معلش ..الحق احق ان يتبع ..القاعده بتقول ان الضيف هو اللى بيختار اللى وراه :xgfd: ..احنا قلنا مصريه استثناء...انما طالما سمارت اختار ..يبقى لازم تلبى الندا

يا سلام ياختى
يا خسارة الاخوية البرمجية
يا خسارة البى اتش بى والسكوال سرفر

دى نقره و دى نقره

دولفيييييييييييييييين
يادي النور يادي النور
مع اني شايفه ان سمارت قام بدري بدري .. :xgfd:
هافكرلك فوكيرات حلوة و اجيلك

احمم لارنو خليكى رحيمة ماشى

واعملى حساب يوما ممكن تتحطى فيه فى هذا الموقف

:l2a:

احمم لارنو خليكى رحيمة ماشى

واعملى حساب يوما ممكن تتحطى فيه فى هذا الموقف

اخليني رحيمه ليه ؟ هو انتو كنتو رحمتوني ~~~
الشو ده فيه كوسه علي فكرة .... علشان سمارت مالحقش يتعذب
بس ملحوقه.... دولفي جت

المجموعه الاولي
نبذه مختصرة عن نفسك
اختاري رمز يعبر عنك... غير الدرفيل
اللون المفضل و الاكله المفضله... وكمان اللي بتكرهيهم
حلمك لبكرة ؟
حاجه عملتيها و انتي صغيرة و كل ما حد يفكرك بيها تضحكي علي نفسك
موقف حصلك مع طفل و مش ممكن تنسيه
صفات فارس احلامك
اكتر ماده كنتي شاطره فيها في المدرسه واكتر ماده كنتي خيبانه فيها
لو مخنوقه و متضايقه و مش عارفه مالك.... ترفهي عن نفسك ازاي
البحر و الصراء.... كلمينا عنهم
بتعرفي تطبخي ؟؟ لو اه.. ايه اكتر حاجه بتعمليها كويس
ايه رد فعلك لما تبقي متنرفزة ؟؟ اوصفيلنا نفسك و انتي بتتخانقي مع حد
كلمه اسفه .... سهله عليكي و لا الاسهل انك تتعاملي كويس ؟
اني متسامحه لاي درجه ؟

فاصل و نواصل

دولفييييييييييييين ..اهلا بيكى

ايه اهم الحاجات اللى بتعمليها فى حياتك غير الشغل
أوصفى نفسك و قوليلنا بتحبيها و لا لأ
ليكى حد بتعتبريه مرايه صادقه ليكى بيعرف يقراكى من غير ما تتكلمى
أنتى عشريه (عشان البرمجه بتعمل نسبه توّحد)
ليه بتحبى الدولفين بالتحديد
بتحبى تقرى ايه و لمين و بتسمعى ايه لما تكونى رايقه
ليكى فى السياسه



ناقشى الجمل الاتيه..مع الشرح
كن جميلا ترى الوجود جميلا
الحب فى الارض بعض من تخيلنا لو لم نجده عليها لاخترعناه
اذا مات الامل علينا ان نعاشر اليأس معاشره حسنه
أعجز ما فى الكتابه انها تريق مناجاتنا و مشاعرنا على الورق(هل بتحسى ان الكتابه عاجزه عن انها توصل اللى جواكى)
أن احبك نعم أن اموت من اجلك هذا كثير جدا

عايزه شرح وافى لحد ما ارجعلك

دولفييييييييييي

أهلا أهلا
لارنو وأنيد سألوا كتير أوي مش عارفة أسأل إيه

حفكر في فكيرة حلوة وأرجع
إوعي تمشي

aniD كتب:
ايه اهم الحاجات اللى بتعمليها فى حياتك غير الشغل

انى بشترك فى اعمال خدمة المجتمع زى انى بدى كورسات فى جمعية خيرية

aniD كتب:
أوصفى نفسك و قوليلنا بتحبيها و لا لأ

مبحبش اوصف نفسى لانى مش حعرف اولا
بحبها طبعا جدا بس ساعات بكرهها عشان بتبقى طيبة زيادة عن اللزوم

aniD كتب:
ليكى حد بتعتبريه مرايه صادقه ليكى بيعرف يقراكى من غير ما تتكلمى

امى

aniD كتب:
أنتى عشريه (عشان البرمجه بتعمل نسبه توّحد)

لا بالعكس ودة لانى مش قاعدة للبرمجة بس لكن بعمل جنبها حاجات تانية

aniD كتب:
ليه بتحبى الدولفين بالتحديد

لانه غامض وبحس انه حنين جدا ووفى

aniD كتب:
بتحبى تقرى ايه و لمين و بتسمعى ايه لما تكونى رايقه

مبقراش لحد دلوقتى خالص بس ساعات احب اقرا الشعر
لما ببقى رايقة بسمع اغانى وفى الغالب كله اجنبى

aniD كتب:ليكى فى السياسه

مين فى مصر ملوش يا حبيبتى

aniD كتب:ناقشى الجمل الاتيه..مع الشرح
كن جميلا ترى الوجود جميلا

انيييييييييييد انتى محسسانى انى فى امتحااااااااااااااااان

الجملة دى بحبها جدا وتلاقى دايما اللى بيشوف الدنيا وحشة مش بيعرف يعيش فيها

aniD كتب:الحب فى الارض بعض من تخيلنا لو لم نجده عليها لاخترعناه

فعلا دة شىء حقيقى
وتلاقى دايما الواحد بيدور على الحب فى كل شىء
والكلمة نفسها بتتكرر معانا فى اى شىء
الاكل بحب كذا
بحب البس كذا

aniD كتب:اذا مات الامل علينا ان نعاشر اليأس معاشره حسنه

دة اكيد والا قضى الياس على الانسان

aniD كتب:أعجز ما فى الكتابه انها تريق مناجاتنا و مشاعرنا على الورق(هل بتحسى ان الكتابه عاجزه عن انها توصل اللى جواكى)

ساعات كتير لو اللى بكتبله حد قريب جدا منى
لكن لو حد بعيد منى بتبقى الكتابة اكتر طريق سليم عشان اقدر اوصل اللى انا عايزاه

aniD كتب:أن احبك نعم أن اموت من اجلك هذا كثير جدا

لا دة ممكن جدا لو ان الانسان اللى بتحبه فعلا يستاهل دة
بس هل فى انسان دلوقتى على ضهر الارض يستاهل دة
متهيالى دة كان زمان لكن لا يتحقق دلوقتى الا نادرا جدا

مصرية كتب:دولفييييييييييي

أهلا أهلا
لارنو وأنيد سألوا كتير أوي مش عارفة أسأل إيه

حفكر في فكيرة حلوة وأرجع
إوعي تمشي

اية الدوخة دى
دة انا مخلصتش من الامتحانات بتاعة لارنو وانيد

طيب لما تسالى ابقى رنيلى وانا اجى جرى
ههههههههههههه