يوميات متاخده

((( بسم الله الرحمن الرحيم..
ان شاء الله من بكره هبتدي اكتب عن احداث حياتي
يوميات ..مكتئبه ..عاطلة عن العمل..
والمفروض على وش جواز ...


يمكن بالطريقة دي ارجع اكتب تاني وتخف العقد الي عندي لما الاقي مكان افضفض فيه عن مشاعري واحاسيسي
بس انا مش مسئولة عن اي شخص ممكن يتعقد بسبب عقدي )))




ولا يهمك يامتاخده هانم ..

الناس المتاخده كتير , بس مش كلهم على وش جواز وده سبب يخليكى مش متاخده

اكتبيلنا لماذا ؟ ومتى ؟ والاسباب اللى خليتك متاخده وكلنا اذان صاغية .

دكتور ادهم ..نورت صفحتى وانا مبسوطه انك اول واحد كتبت فيها

نسيت اضيف للبداية ..ويوميات وحده تختينه كمان بتتعامل مع الوزن يوم بيوم

اختنا متاخده أدينا كآبه مترحميناش

تصفيق حااااار

و لتكشف الستار وتنزل لنا متاخده هانم بأول يوميه وياترى اتصرفت أزاى فى الرجيمة اللى بتتبعها بالرغم من الابناء التى وردتنا من مجله ( المستخبى أهو بان ) فى انها بتضرب لوكشه الشاندوشتات باليل بعد كل البيت ينام
عايزين سياتك يا فندم تؤكدى لنا صحة الخبر أو تكذبيه وتقدمى ثلاجه بيتكوا للجنه الفحص والتفتيش دليل على براءتك  

وبالأذن

النهردة يوميات مكتئبة

يوم عادي. صاحية متأخرة مبحبش النوم الملخبط بحس بيضيع اليوم كله
أغلب الناس إلي عرفاني سواء في حياتي الشخصية أو المجتمع الإنترنتي. عارفين
قصة حياتي والتزامي بوالدتي ربنا يخليها لي. حتى وقت قريب انخطبت مرتين ومكملش
الموضوع. وبعد المره الثانية قررت اشيل فكرة الجواز واتفرغ لوالدتي ولاخواتي وفعليا ده إلي حصل
لحد من سنة فاتت. اتعرف على خطيبي الحالي وارتحت له والحمدالله مأشين في موضوع
الجواز. طبعا في مشاكل كل شويه حاجات عبيطه وأحيانا حاجات غريبة. وأحيأنا حاجات جد

مشكلتي نفسي. مش عارفة عايزة ايه. متلخبطه وخايفه ومش عارفة اتعامل معاه أو مع نفسي. صح
حساسه لأي تصرف لأي كلمة لأي رد فعل. دايما متحفزة.

عدم ثقتي في نفسي وخوفي من الفشل بيدفعني اني أختار الطريق السهل هو الهروب
بعترف اني جبأنه مش عايزة اتعب لأني أصلا منهكه مش عأيزة انجرح أو ازعل أو اتضايق
بخاف على مشاعري جدا لأني بعرف نفسي أي حاجه لو كلمة لو نظرة بتفضل معلمه جواإيا

حياه بعرفها بعرف حدودها وطريقي فيها أسهل ليا من علاقة مع طرف بحبه بس بسبب
له الاذى بعقدي ومشاكلي أنا

بس برجع إفكر ليه أنا أنانية حتى مع نفسي. هي ايه الحياة من غير تجارب نعيشها. وأرجع تاني أقول بس
ده عمر في حد يلعب في حياته هي أصلا الحياة كم يوم. سامحوني حبيت إفكر بصوت عالي ولو ان الكلام ملخبط وبرضوا من الموبايل
عشان حاولت أنام ومعرفتش. بحاول أرد على نفسي أنا خأيفة من ايه
من الوحدة وإلا من الهجر وإلا من الألم الحب وإلا الفشل وإلا ان ظني يخيب وأحلامي تتكسر
وإلا خأيفة اسيب نفسي تفرح.

أنا زعلانة. زعلانة من نفسي.


وعلى فكرة يا أيمي أنا التزمت بالرجيم. بس بصراحة مقدرتش أشرب الشاي من غير سكر.

قمورة موضوع بجد هاااايل.
احييكى عليه بشده و عنف حتى تستغيثى :)

حتى الباس وورد بتاعة المنتدى كنت ناسياها و مكسله اعمل أكتيفاشن لواحده تانيه بس عملتها مخصووووص عشان أقولك انى متابعه

سيرى يا نورماندى

المشكلة لها علاقة ببرج الجوزاء يا فندم  

انت اثنين فى بعض .. دكتور جايكل أند مسز هايد .. وده مربط فرس كلامك .. والله أعلم.

كملى .. أتابع باهتمام وعزم وإصرار

بس أنا ميزان و برضو بفكر زى قموره كده..

و من هذا المنطلق...الموضوع مالوش دعوه بالابراج..

وكما قال ريتشارد..اللعنة على الابراج

يا اهلاََ َ وسهلاَ َ بسيسامى الشهيرة بام شمر فينك يا حبيبتى من زمان بتضيعى الباس وورد ليه، انا خايفه لما تبقى ام تنسى ابنك الصغير عند بياع الطماطم وجوزك يقولك أبنك راح فين تقولى له سورى كنت ناسيه

و مكسله اعمل أكتيفاشن

يلاه كملى يا متاخده ............. ها وبعدين بس بعد ما دخلتى علينا بالمقدمه ادخلى علينا بالتفاصيل واحنا محضرين كراتين مناديل

وكما قال ريتشارد..اللعنة على الابراج

ما كانش ريتشارد .. كان حسام أو عيسى .. أى حد، بس مش ريتشارد
ياريت نراجع معلوماتنا الفيلماتية قبل ما نتكلم

لو سمحت مش عايزين غلوشه

على اي اساس ممكن اكون بخير ...علشان مش بشتكي من الم عضوي...ليه بننسى انه في الم نفسي ويمكن يكون مؤلم اكثر من الالم الجسدي بكتير
رجييم ونفسية سيئه ابدا مش مفروض نجمع مابين الاثنين ...

هشام، سيسامي، ايمي، حبيبتي ماما فريدة، والعزيز الدكتور ادهم...

مين من حضراتكم من خلال تجاربه في الحياة بينصح بالمغامرة والانطلاق حتى لو مش متاكدين من النتايج ومين منكم بيفضل ان نفضل ثابتين على الحاجات الي بنعرفها من غير ما نغير ..يعني الطريق الي نعرفه حتى لو كان صعب نمشى فيه حتى لو في طريق تاني يمكن اسهل بس مش عارفينه...

نطلع من مواضيع الغم واقولكم يوم السبت كنت فين

يوم السبت كان اليوم الاخير لمعرض العروس في دبي...المعرض ده يقام كل سنة في شهر ابريل..فيه كل مستلزمات العروس والعروض الخاصه بالفنادق
المقدمة للمقدمين على الجواز...وطبعا في حاجات كتيره للبيع والعرض ومش لازم اقولكم عن الاسعار نار يا حبيبي نار
وفيه طبعا عروض ازياء لفساتين السهرة والاعراس والعبايات الخليجية

شوية صور من المعرض ..من موقع تاني لانه مينفعش التصوير في اقسام كتيره من المعرض













تابع الصور

حلوين صح


وشوية صور من عرض الازياء..






فينك يا جاتيتا







ولو عايزين صور اكثر من المعرض

http://www.yebab.com/blog/

صباح الخير يامتاخده هانم ...


لو اخدتى بالك حتلاقى انك كتبتى مشكلتك كلها فى أول يوم من يومياتك , وكتبت ملخص وافى عن الحالة اللى بتمرى بيها فى الوقت الراهن بصرف النظر عن الاحداث اليومية خلال ساعات النهار والليل والتى تقومين بكتابة تفاصيلها فى يومياتك .

مايحدث لك حاليا هو حالة بسيطة من حالات الاكتئاب , وهى ليست وليدة اليوم ولكنك تعانين منها منذ فترة طويلة وسبب استمرارها هو عدم الاهتمام او عدم درايتك بكيفية الخروج منها .
وللعلم هذه المشكلة يعانى منها الكثير ويختلف تأثيرها من شخص الى اخر تبعا لنوعية الشخصية ولاسباب اخرى اجتماعية .
المشكلة بسيطة كما هو الحل , وخاصة مع شخص مثلك لايكتم شعوره فى محاولة لانهاء الاحساس بالالم , وربما يكون الالم النفسى الذى تحدثتى عنه هو الدافع , فهو بالفعل اكثر ايلاما من الالم الجسدى.

من واقع شرحك سأذكر لكى اعراض الحالة ثم اسبابها ثم علاجها .

الاعراض :

- اضطراب النوم :

من الممكن فشل فى محاولاتك فى الدخول فى نوم هادىء مما يتسبب فى النوم المتأخر بعد ان تكونى قد اصابك الارهاق من الارق والتفكير وبالتالى الاستيقاظ متأخرة _ او حدوث نوم متقطع بمعنى النوم لساعات قليلة والاستيقاظ ثم معاودة النوم مره اخرى _ او حدوث احلام مزعجة او كوابيس تتسبب فى استيقاظك مزعورة _ وفى بعض الحالات يحدث العكس وتحدث زيادة كبيرة فى ساعات النوم , وفى كل الاحوال يكون الاستيقاظ غير نشيط.

-التوتر الدائم : احساسك بالتوتر معظم اوقات اليوم .

- الخوف وعدم الاحساس بالامان .

- الاحساس بالعجز .

- التغير المفاجىء فى الحالة المزاجية

- محاولة الانفراد بالذات والابتعاد بقدر الامكان عن المجموعة .

- التغير فى النمط الغذائى بين الزيادة والنقص فى الشهية تجاه الطعام .


- الاسباب ( من واقع شرحك )

- خوفك الدائم وتوترك يعود غالبا الى حدوث محاولين للزواج سابقا اصابهم الفشل والخوف هنا من تكرار هذا الفشل مع الخطيب الحالى , مما يدفعك لتقديم بعض التنازلات لانجاح هذا الزواج , وهذا يتعارض مع بعض المبادىء التى نشأتى عليها مثل القبول ببعض العيوب سواء فى المظهر او الحالة الاجتماعية او التصرفات الشخصية , وهذا يسبب تنازعات داخلية لديك .

- ربما كان التقدم فى العمر احد اسباب التنازلات والقبول بما كنتى ترفضيه سابقا .

-احساسك بالمسؤولية تجاة والدتك احد اسباب توترك .

- وزنك الزائد يقلل من ثقتك بنفسك ويقوى احساسك بالفشل .

-التعطل عن العمل يعطيكى الوقت الكافى للانفراد بذاتك وجلدها مما يزيد الحالة سوءا , وربما كان سببا فى حدوث ازمات مادية مؤثرة .


اتكلمنا عن الاعراض والاسباب ويتبقى العلاج يامتاخده هانم وده حنتكلم فيه فى الحلقة القادمة .

والله يا دكتور كل الي بتقوله صح طبعا ما اضافات هوضحها واكتبها خلال اليوميات في الايام الجاية ....
ياريت تكمل يا دكتور

قمورة
سلامتك من الإكتئاب يا ماما
انتى لسه صغيره على كده
امال لما تتجوزى وتتغير نوعية الحياة ومشاكلها هاتعملى ايه

ماهو ده جزء من المشكلة...انا اساسا مشغولة في حياتي وشايله مسؤلية اسرة وبحس اني تعبانه ومنهكه بكره هكون مسؤلة كمان عن اسرة تانيه هيحصلي ايه ...اكيد اكيد هتجنن

اختصار لاحداث اليوم .....

لابتوبي الي عاصر سبع سنين ونص من حياتي ...قرر النهرده انه يتوقف عن العمل نهائيا.....مسكين كان حياته صعبه معايا

بعد صلاة الفجر مشيت حوالي كيلومتر على الممشى القريب من بيتي كنت عايزه اكمل كمان شويه بس الشمس طلعت ومحبتش اتعرض للشمس بعالج وجهي بمواد يفضل الابتعاد عن الشمس او تقليل التعرض لها ..

كملت الرجيم على خير بس برضوا كبايه الشاي لازم فيها سكر ...هعوضها بزيادة المشى ...بس قلت هخرج بعد قبل الفجر عشان يكون عندي وقت اطول ..ماهو كده كده مش بعرف انام بلليل ..

كمان عملت رياضة لنص ساعه بحس بتحسن شويه في مزاجي ...بس غربان الهم لاتزال تحلق فوق راسي

امشى يا غربان الهم بعيد احسن ازقللك بالطوب سيبى متاخدة تعمل الرجيمة بتعتها
مش انا قولت لك رجيم السيكو سيكو اللى اتفقنا عليه حيجيب نايج هايلة واحب أدرحج لك نصيحة على الماشى بمناسبة الزواج اللى يا رب يبقى سعيد

زيت الزيتون مهم جداّ لبشرتك وكمان لو تم وضعه على طبق سلطة فهو بيساعد جداّ فى الحفاظ على الصحة

زيت اللوز حول العين بيحارب التجاعيد والإجهاد ويزيد البشرة إشراقاَ وبياضاَ

زيت البابونج مع زيت الزيتون مع اللوز مع إكليل الجبل ماسك رائع للبشرة

إشربى النعناع ليلاَ فهو يهدء الاعصاب وبيساعد على الأسترخاء
مشروب القلق وفعال جدا معايا ( القرفة بالكركدية ) بيساعد على النوم بالنسبة لى ( خلال خمسة دقائق على الاكثر )
واخيراَ أبتعدى نهائيا عن المشوبات الغازية والتى تحتوى على نسبة كافين عالية لانها بتزيد من حبوب البشرة وتساعد على القلق والتوتر بشكل كبير
وأخيراَ لو بتعملى مجهود فى الرياضية جامد لازم تعوضي الماء الذى تفقدية بشرب العصائر والماء بشكل كبير ومش مهم تناول وجبات فيها سكريات عشان الطاقه
ولو بتمشى على البحر بصفه يومية الاحسن تمشى على الرملة بدل الممشى وترتدى ملامس ثقيلة حول البطن او تضعى قطعة قماش من الصوف او اكياس بلاسيتك ويبقى معاكى زجاجة مياة تشربى منها اثناء المشى أو الركض

حبيبتي يا ايمي متقلقيش..الرجيم بتاعنا بعمله حلو تصدقي
بحب استخدم زيت الزيتون واللوز ونتايجهم هايلة اكيد...
بس يا ايمي هانم متقلبيش المواجع عليا ....المشاريب دي كلها محتاجه سكر معرفش اشرب نعناع من غير سكر ولا القرفه

الحاجه الوحيدة الي عودت نفسي اشربها من غير سكر هي الشاي الاخضر ولو انه بسكر بيكون احلى

نسيت اقولكم هببت ايه النهرده..... الناس الي كانت معاصرني خلال شئون مصرية عارفه اني كل ما اكتئب بعمل حاجه في شعري احرقه اولع فيه اقص المهم اي حاجه في اي حاجه...
المهم تقريبا من سنة مغيرتش لون شعري قلت لنفسي يا بنت يا قمر ايه رايك تصبغي شعرك وتعملي نيو لوك نفسيتك يمكن تحلو كانت مشورة مهببه مني لنفسي....

مش هقولكم اللون عامل ازاي ... المهم هستنى يومين وهغير اللون الجميل ده

{وخاصة مع شخص مثلك لايكتم شعوره فى محاولة لانهاء الاحساس بالالم}

كلامك مضبوط يا دكتور أدهم. بس ده في عالم الإنترنت مش في الواقع. واقعي مختلف جدأ
التعبير عن المشاعر من الحاجات المرفوضة عندي خصوصا لو كانت خوف، حزن أو ضعف
قدام الناس أنا بنت قوية مستقلة معتمدة على نفسها ويقدر أي حد يعتمد عليها.

وطبعا في الظروف العادية أنا كده ولو انه بيني وبين نفسي مش بكون كده.
في واحد من كورسات تعليم ازائ تتعامل مع العميل، بيقولك مش لازم تكون شخص جرئ
ممكن تمثل تكون شخص جرئ وهكذا مع كل الصفات إلي مش موجوده فيك.

في الظروف العادية زي ماقلت ده عادي. بس في أوقات زي دلوقتي سيناريو تاني خالص
العزلة لأنه للأسف بيبان في وشي. فاحسن حل اين أكون لوحدي وذه كمان مش صعب
ما أنا البنت الهادئة إلي مش بتحب الدوشة، بتحب تقرأ، تصلي ، تتعبد ، تقعد على الإنترنت
بختصار بنت بتحب الهدوء ومبتحبش الكلام الكتير. والي يساعد على كده وبسبب مرض ماما
الناس هي إلي بتزورنا مش احنا إلي ينزور حد. فالبيت دوشة. فلو قعدت في غرفتي اسبوع من غير مأخرج
إلا للشغل بس محدش هيستغرب أو يسأل.

حاجات كتيرة بتمنعني أعبر عن مشاعري منها تربيتي وخوفي من ان ماما تقلق. لو تعبت أو تذمرت هي بتتعب
وكفاية احساسها انها مشيلاني مسولية ده لوحده كفاية.

إلي بلاحظه زمان كنت ممكن أعبش على المية اسبوع وانعزل فعليا لحد ما مشكلة تخف أو أنا بنفسي اخرج من الحالة
دلوقتي مستحيل. فعليا بحس بالجوع وبالجوع الشديد كمان الحوع إلي بحس هختنق لو ماإ اكلتش حاجة
عشان كده زاد وزني وزاد أكتئابي


ملاحظة على جنب. مشيت النهردة 4 كيلو على ذمة اختى لأن على أرض الممشي وصلت ل2000 متر. فإ رائح ألفين متر وراجع ألفين متر يبقوا أربعه
يارب. أبطل أحب السكريات بأنواعها يارب