ايامنا الحلوة

عمال أفكر فى ذكرياتى من أول ما بدأت الموضوع يا مشاعر .. ومن كثرها، محتار أحكى إيه والا إيه، وده اللى أخرنى .. مش كسل زى ما أنت فاكره :face:


ذكرياتك الأخيرة عن سفرك لأسكندرية مع أهلك .. ساعدتنى على الإختيار



كنا متعودين نصيف بدءً من ليلة العيد .. سواء الصغير أو الكبير حسب ميعادهم كل سنة .. يعنى اللى ييجى فى الصيف، يكون هو ميعادنا
ومن صغرى، كنت بأقعد جنب الباب اليمين ورا، فى العربية، واخواتى جنبى، وأفضل طول الوقت أراقب بابا وهو سايق، علشان أعرف بيسوق إزاى، وأراقب عداد السرعة، وأنبهر جداً وأزأطط لما العداد يضرب الرفم القياسى .. اللى كان أيامها 90 كيلو متر/ الساعة
كان بابا غاوى ياخدنا لأماكن بعيدة وخالية من الناس والزحمة .. فكنا غالباً بتروح مرسى مطروح، اللى وقتها كانت فاضيـــــــــــــــــــــــــــــــــــــــــــــــــــة عالآخر .. وخصوصاً فى العيد .. فلكونها بعيدة، وصعب الوصول ليها، ولكونها فاضية ومافيهاش مغريات اسكندرية، فماحدش كان بيروحها إلا نادراً.

كانت متعتى ومتعتنا كلنا فى "الكاريتة" .. نركن العربية أمام اللوكاندة، ويتفق بابا مع أى واحد من أصحاب الكاريتات، علشان يفضل معانا طول فترة وجودنا هناك .. وكانوا كلهم من ناس طيبين جداً بستحيل أنساهم، من قبيلة اسمها قبيلة أولاد على، هى أصل سكان مرسى مطروح وما حولها.

واحد منهم، كان شاب رائع فى كل شئ، لدرجة أنه كان ينتظرنا كل سنة فى نفس الميعاد، ويفرغ نفسه تماماً علشانا .. كان الحمار بتاع كاريتته اسمه بلبل كنت بأسوقه أنا وساعات أختى وهو جنبنا بيراقب، ومرة أخذته وسقته لوحدى وأخذت أختى التانية الصغيرة جنبى، وخليت بلبل يجرى بسرعة جداً، وأنا فرحان عالآخر .. وهوب .. لقيت أختى طارت من جنبى، وكان عمرها وقتها حوالى 5 سنين، ووقعت عالأرض وركبتها غرقانة دم :cyclops: لسه لحد النهاردة سايبة أثر بسيط طبعاً مش محتاج أحكى اللى حصلى من بابا ساعتها .. أكيد مفهوم

بس رغم اللى حصلى .. كنت سعيد جداً بالمغامرة اللى حسستنى كأنى أحمس وهو سايق العجلة الحربية وبيحارب الهكسوس :face:




فى سنة أخرى .. بعد ما كبرت شوية وبقيت فى سن المراهقة .. عداد السرعة زاد، والعربية كانت جديدة وسريعة جداً وأول مرة نسافر بيها، ويومها روحنا العريش .. وأنا لسه قاعد ورا على اليمين وعينى على بابا وهو بيسوق وعلى عداد السرعة. وبالمناسبة؛ بابا الله يرحمه كان بياخد المسافة من القاهرة لأى مكان، بدون توقف، غير فى محطة البنزين .. وأنا طالعله على فكرة فبعد حوالى ست أو سبع ساعات سواقة متواصلة، وبدون نوم بالليل قبل السفر، لأننا كنا بنتحرك بعد آذان الفجر مباشرةً .. وكان خلاص كبر شوية فى السن وما يقدرش يواصل اليوم بدون نوم، فبمجرد ما وصلنا، نام فوراً نوم عميق جداً.
بس .. دى كانت غلطته هو نام من هنا .. ومحسوبك إتش العجيب، راح متسحب وواخد مفاتيح العربية .. وواخد معايا أخويا الصغير خالص، وحاولت ولأول مرة فى حياتى انى أسوق الظروف كلها كانت مغرية جداً .. العربية جديدة وبتطير مش بتجرى .. يعنى عز الطلب والطريق فاضى خالص فى المنطقة لأنها كانت أول سنة بعد عودة العريش من الإحتلال .. واتش يدوس بنزين ويبص على العداد عاوز يقفله، يعنى يوصل لآخره .. وهوبااااااااااااااااا ... فجأة وبدون إنذار .. ألاقى واحد بدوى طلعلى ما أعرفش منين .. فأحرك الديريكسيون إلى اليمين بسرعة ... أتارى أم الديريكسيون كان باور استيرينج وأنا ما أعرفش .. فتلف العربية دورة كاملة، وأتلخبط أنا وأرتبك .. وأخويا جنبى بيصوت ومرعوب وبيقولى: حأقول لبابا .. وأنا عاوز أتفادى الراجل، وعاوز أوقف العربية، وملبوخ لبخة مهببة بستين هبابة، والعربية عمالى تلف حوالين نفسها بسرعة، وفيـــــــــــــــــــــــــــــــن على ما أبتديت أركز وأعدل الديريكسيون وأمشى فى خط مستقيم .. بس من اللخبطة، بدل ما أدوس فرامل .. دست بنزين فتزيد السرعة، أقوم أدوس أكثر .. فاكره الفرامل .. لحد ما لقيت نفسى فى ثوانى .. قصاد عربية فيورا صغيرة راكنة لوحدها فى الصحرا، والناحية التانية فيه منحنى، لو نزلت فيه .. معناها موت .. فاخترت الفيورا :) عنها .. وقمت داخل فيها من ورا .. والعربية أخيراً وقفت خرجت أخويا الأول، وبعدين أنا خرجت .. لقيتنا جنب ديريكسيون الفيورا اتعجنت يعنى من الآخر .. وعربيتنا اتشلفطت بس من قدام.

ضميرى طبعاً ما سابنيش فى حالى .. الله يخرب بيته .. قال إيه .. رحت أدور على أصحاب الفيورا .. علشان أعتذر لهم، وأعرض عليهم التعويض المناسب .. من جيب أبويا طبعاً وياريتنى ما عملت كده .. ياريتنى أخدت العربية ومشيت وركنتها، واستهبلت فيها، ولا من شاف ولا من درى، وكأن حد خبط عربيتنا وجرى .. لأنهم طلعوا ناس ولاد 60 فى 70 .. جزم بصراحة .. قال أنا رايح أعتذر وأتحمل المسئولية الكاملة وأعرض التعويض قال .. لقيتهم ناس صعب يتوصفوا .. بجد صعب .. قمة فى السفالة اللى صعب تتحكى .. قمة فى الإنتهازية .. قمة فى كل حاجة شاذة .. لحد النهاردة مش فاهم كانوا بيعملوا كده ليه؟ واحد جاى يعتذر ويعرض التعويض الكامل عن الأضرار اللى تسبب فيها .. يعنى لا هرب ولا أنكر المسئولية ولا فاصل معاهم فى أى حاجة .. بالعكس خالص .. طيب يقلوا أدبهم ليه؟ ويهددوا ليه؟ ويطالبوا بأكثر من حقهم ليه؟ وما يبطلوش كلام ليه؟ بجد عينة غريبة من البشر .. بس ما علينا .. صلحنالهم العربية طبعاً، ورجعناهالهم أحسن مما كانت بكثير.

أما بابا .. فما فيش داعى أحكيلكم اللى عمله فيا يعنى .. عشان بريستيجى معاكم وكده

يالها من ذكريات
:farao:

اية يا هشام التهور اللى كنت فية دة
دة عمايل تعملها يا راجل
بصراحة اللة يكون فى عون مامتك وباباك
دة انا قلبى وجعنى من مجرد ما قريت الحكاية والمخاطر اللى كنت بتعرض نفسك ليها
بصراحة بصراحة ومن غير زعل
انت لو ابنى كنت عذبتك واديتك حتة دين علقة سخنة

اللللللع يا مشاعر الموضوع ده بجد بيرجعنا بالقوة الجبرية لايام وذكريات حتي بمشاكلها لذيذة
وسحرها في الشقاوة التلقائية البسيطة مش زي اطفال دلوقت اكيد ذكرياتنا بالنسبة ليهم
كاننا قدماء المصريين

بمناسبة شقاوة الصبيان بس كان ابن عمتي كان غاوي يعمل زي هشام

كان دايما العيلة تتجمع عندنا ليلة العيد
وكان عمي عنده القلب فلما وصل عندنا لقي الاسانسير بايظ واحنا في الدور السادس
فكان صعب يطلع
وهو راجع يركب العربية وكانت مركونة بعيد شوية لقي فيها واحد قاعد لما قرب اكتشف انه ابنه
كان بيراقب باباه وعارف طبعا ان السهرة مطولة فقال ياخد لفة..
يظهر عدوي ولادي ..

افتكرت رحلة عملناها عند خالتي في الزقازيق كان وقتها جوز خالتي مهندس في وزارة الري
وكان فيه هناك مستعمرة ساكن فيها مهندسين الري
وجمعتنا خالتي بنات واولاد خالة واخدتنا يومين فسحة
طبعا كنا مبسوطين جدا وكانت وسيلة المواصلات هي الحنطور
كنا بنحب نمشي بيه علي الزراعية وجنبنا الترعة وكنا بنحب نغني خصوصا اخويا وابن خالتي
ومرة من المرات قلنا مين الشاطر اللي ينط والحنطور ماشي
طبعا البنات عايزة تعمل جدعة قدام الصبيان
بنت خالتي نطت وانا وقعت علي ركبتي البنطلون عمل خرم وركبتي بقت حمراااااااا من الدم
طبعا اخدنا زعيق من جوز خالتي :lol: بس جابلنا بعد كده حلويات موز وعسلية
كان طيب اوي

اياااااااااااااااااام وذكرياااات

هعصر مخي يا مشاعر وارجعلك عندي منها كتير

جميل يا فريدة انك بداتى تفتكرى وتشاركينا ذكريتنا
واضح انك كنت بنوتة شقية
يلة اعصرى مخك وكملى
انا معاكى ومتبعاكى

لا يا مشاعر انا كنت هادية صدقيني بس حبيت اجرب زي ما بنت خالتي نطت

كان دايما اسمي يتكتب علي السابورة من البنات الهادية في الفصل :lol:

بمناسبة المدرسة افتكرت مرة لقينا هيصة في المدرسة وزومبليطة
جرينا نشوف فيه ايه طلعت نادية الجندي وكاست كبير جاي يصور في مدرستنا
ناسية اسم الفيلم دلوقت بس اللي فاكراه ان دورها كان ام وكانت جاية تزور بنتها في المدرسة

وكانت الراهبة بتنقي كام بنت علشان يطلعوا كومبارس مع بنت نادية الجندي
وجت الراهبة تختارني بس انا وشي جاب الوان وطبعا كان صعب

مش كلن زماني يا مشاعر دلوقت مشهورة

امبارح كلمتنى واحدة من اصحابى فى التليفون
وفكرتنى ببلوة من بلاوينا ايام الكلية
وقعدنا نضحك لما موتنا من الضحك
قلت لازم احكيهالكوابالرغم من انها من الاسرار الحربية برضة
يعنى الموضوع بينا
مفهوم بينا ومش عايزين نطورة كلام

وخصوصا ان الولاد فى التدريب
وهشام نايم

زمان ايام الكلية كنا 3 اصدقاء مع بعض علطول
وكنا دايما بنحب نفرفش نفسنا اوى
يعنى ممكن نتفق ونروح سينما التحرير
او نروح كازينو الامم بتاع صفاء ابو السعود
او ناخد جولة فى سميراميس وبعد كدة نقعد نشرب حاجة
وممكن نتمشى على كوبرى الجامعة ونشرب حمص الشام ونحلى بايس كريم من لارين المنيل
بس احلى فسحة كنا بنحبها تكا المهندسين
مش علشان الفراخ المشوية اللى تجنن
لااااااااااااااا
علشان السلطات والعيش البورى
مش هطول عليكوا
فى مرة واحدة فيهم جت وزفت لنا خبرمهم ان فى مكان حلو اوى فى ماريوت بتقدم مشروبات وسلطات
اوبة سلطات
عينى على السلطات وكمان اوبن بوفية
عقدنا النية
وحوشنا القرشنتين
ورحنا على هناك
فعلا المكان جميل جدا
قاعة اخر شياكة
مكان هادى وجو رومانسى
موسيقى ناعمة وكلها احساس
وشموع مالية المكان
وطبعا اكيد اكيد حبيبة كل واحد عايش فى ملكوت لوحدة
طبعا احنا مش فى دماغنا كل دة
ولا فارق معانا الجو دة خااااااااااااااااالص
احنا رايحين ومحددين هدفنا
السلطات
اختارنا ترابيزة قريبة من البوفية
وقعدنا نعاين المكان الفظيع دة ونتفرج على الحبيبة
طلبت كل واحدة منا مشروب غريب
وكان عبارة عن كوكتيل من فواكهة الغابات الافريقية
حاجة ارف ومالهاش طعم
بس مش مهم
المهم السلطات
جالنا المشروب فى مج كبببببببببببببببببببببببببببببببير زى بتاع الكفاربالضبط
بصينا لبعض وضحكنا
هنشيل ونشرب البلوة دة ازاى
لازم نمسكة بايدينا الاتنين
سحبت كل واحدة طبق
وتوجهنا للهدف
ملينا الاطباق
وكان من ضمن السلطات عيش صغنن ابيض وناشف اسمة محلب لذيذ اوى وانا بحبة
قعدنا نتكلم ونضحك وناكل فى السلطة والمحلب
وكانت فضيحة وحوسة
لان المحلب بيعمل صوت مسموع وقوى
وطبعا مبوظ الجو الرومانسى ومغطى على صوت الموسيقى
يعنى من الاخر وطرنا الجو وعملنا قلق فى المنطقة وارفنا الحبيبة فى عيشتهم
دة غير الفتافيت ودهولة التربيزة
كل دة مش مهم
المهم انا احنا كنا مبسوطين والجو جديد عليناوالفسحة مختلفة
متهيالى لحد كدة كويس وعادى
3 بنات قمرات فى ريعان الشباب راحوا مكان ظريف وشربوا كوكتيل فى مج الكفار وكلوا سلطة وانبسطوا
فى اى اعتراض ؟
روحنا البيت
وقعدت احكيلهم عن اليوم وعلى الفسحة وانا مبسوطة جدا
وجة الدور احكى لخطيبى اللى هو ابو العيال دلوقتى
وانا بسلامة نية بحكى ومبسوطة اوى وهو قاعد مركز فى كل التفاصيل صغيرة وكبيرة
خد الكلام من بقى وجرى على قاعة اوجنى لمعاينة المكان على الطبيعة ورفع البصمات

وكانت المفاجاة
انا عن نفسى اتخضيت

جاتلى حالا فكرة انما اية
انا مش هكمل
وهسيبكوا انتوا تتوقعواانا اتخضيت لية
وماذا وجد خطيبى
بعد معرفتكم المفاجاة
اتصلوا على 77214 اذاعة
وسيب اسمك وعنوانك
والفائز لية جائزة مالية

مشاعر علقتينيييييييييييييييييييييييي بس هااااااااايلة بجد :lol:

علي فكرة النمرة ادتني خارج نطاق الخدمة

كملي بقي عايزة علي نار علي نار علي نار :#~€:

مشاعر مفهمتش

قوليلي المفاجاة بسرعة أحسن الفضول حيموتني خلاص

علي فكرة النمرة ادتني خارج نطاق الخدمة

فريدة ضيفى 2قبل الرقم

قوليلي المفاجاة بسرعة أحسن الفضول حيموتني خلاص

يا سلام يا سلام
بالساهل كدة
لااااااااااا
اسمع الاول فكرتى فى اية

اسمع الاول فكرتى فى اية

تصدقي مفكرتش في أي حاجة!!!

قعدت عاملة زي الصعيدي المحتاس كإني بفكر في لوغاريتمات.


قوللي بقى الله يخليكي
شوقتيني

الا الجماعة هنا معندهاش تليفونات تتصل ولا اية

انا مش هقول
عايزة حد مصحصح معايا يقول توقعاتة

يعنى من شهر فبراير و الى الان ماعرفناش ايه اللى حصل لمشاعر
و انا من ساعة ما قريت الموضوع و انا حتجن من الفضول :humer:

خطيبك اتخض ليه و انت اتخضيتى لماذا؟؟

ايه ؟؟؟ طلع عليكو فلوس و المطعم بيدور عليكو من زمان ؟؟؟

سيسامى
لارنو
فكرتونى دة انا كنت نسيت الموضوع خاااااااالص
دخلت بالصدفة لاقيتكم متابعين
هقولكم بس بشرط
كل واحد يحكلنا حاجة عن ذكرياتة اللى دايما فاكرها ومش ممكن ينساها
موافقين؟
سمعاكم بتقولوا موافقين

خطيبك اتخض ليه و انت اتخضيتى لماذا؟؟

اما خطيبى اتخض من عملتى
وانا اتخضيت
اولا: من غضب ربنا اللى كان على وش خطيبى
وثانيا:لان القاعة اللى دخلتها انا واصحابى طلعت بار
والسلطات والمحلب طلع مذة
والحبيبة دول ناس مش كويسة

بجد انا اول ما سمعت الخبر اتخضيت اوى اوى
بس بعدها وانا بحكى لاصحابى كنت هموت من الضحك
بقى انا ادخل بار وامذ : :-*/+./*-: :mahalil
وقال فرحانة قال انى بشرب عصيرفى مج الكفار وباكل سلطة

وقال فرحانة قال انى بشرب عصيرفى مج الكفار وباكل سلطة

يعني ايه مذة

؟؟؟

يعني ايه مذة

شوفي يا جاتي
المذه دي علي حسب معلوماتي يعني
بتبقي فاكهه او نوع معين من الكافيار او اي حاجه بتتاكل مع الخمور علشان تبين طعم الخمور
وكل نوع خمرة بيبقاله المذه الخاصه بيه
والفراوله تعتبر مذه لنوع بس مش فاكرة انهي
اصل انا معلوماتي في الحاجات دي ضحله :xgfd:

حسيت اني نفسي اتكلم عن ايام حلوة وذكريات محفورة
وانا برحل عن مكان قضيت فيه ذكريات متنوعة اكيد اسعدتني احيانا ووجعتني اوقات تانية
لكنها ذكريات ايام طويلة ..يعني ذخيرة
واجمل حاجة في حياة الانسان انه يمتلك مخزن لا ينضب من ذكريات تاخده بعيد
وده اللي حاصل معايا الفترة دي بفتكر الشقة لما كانت صغيرة قبل ما نشتري اللي قدامها ونكبرها بعد سنين
بفتكر كريم وهو صغير وازاي كان بيفضل رايح جاي ورايا وانا بذاكر في البلكونة
ايام الجامعة ورايحة جاية احفظ وهو بيقلدني
واعياد ميلاده اللي كانت بتضم العيلتين في الشقة الصغيرة
كانها قصر كبير كبر بحب الناس
افتكرت ازاي كنت بكون سعيدة لما القي عربية بابا وماما
تحت البيت خصوصا مكانش لسة عندي تليفون
وكانت بتبقي احلي مفاجاة
بفتكر حمايا وحماتي لما كانوا بيجوا من السفر وبيقيموا عندنا
وهم مسافرين كنت بفضل اتحايل علي حمايا يقعد يوم كمان
ويقولي انه وراه عمليات ..ولازم يرجع البلد
بس كنت بتفق مع حماتي عليه
وكان بيرضيني وبيفضل يوم كمان

يااااااااااه حقيقي متاثرة وكل الذكريات عمالة تعدي قدامي كانها شريط سينما

بفتكر مشاركات التهاني والعزاء مع جيراني والجيرة الحلوة
اد ايه دوبوني الفترة دي
من مكالمات وزيارات ودموع للفراق

لقيت نفسي بنقل الزرع اللي كنت حطاه قدام باب الشقة ونزلت اوزعه قدام شققهم

اتاثرت بمكالماتهم خصوصا مكالمة دكتور مصطفي ومراته
بكيت بعدها اوي
وزيارة مراته ليا النهاردة مع بوكيه ورد
بامانة لمست محبة جيراني بشكل عميق مخليني تعبانة ودايبة

حارس العمارة ومراته واولاده ودموع مرات عم سعد في الطالعة والنازلة
وهي بتقولي هتوحشينا ..وجعت قلبي
خصوصا اني بقاوم وجعي لفراقهم

مش متخيلة لحظة الفراق
فراق عشرة وذكريات عمر ..

يا تري اللي جاي هيبقي فيه ايام وذكريات تتحفر زي اللي عدت

حقيقي الايام الحلوة بتحلي مع الذكريات الحلوة
والعين مش بتشوف غير كل محبة بتغلف ذكريات عمرنا

الموضوع ده أنا بحبه جدا و داخل مزاجى جدا و قررت انا سيسامى الأول انى ارفعه

مين فيكو يا حلوين حيحكلنا ذكرياته مع خروف العيد و اى عيد؟؟

sesame كتب: الموضوع ده أنا بحبه جدا و داخل مزاجى جدا و قررت انا سيسامى الأول انى ارفعه

مين فيكو يا حلوين حيحكلنا ذكرياته مع خروف العيد و اى عيد؟؟

يا سيسامى الأول أفندى
أقترح انك تنادى على مشاعر، صاحبة الموضوع ومؤسسه وشركاؤه وأولاده
فهى خير من يمثلنا فى هذوها المسائل

ايه الغش ده؟ ماتحولش تتملص من ذكرياتك..
ازاى يعنى مشاعر حتمثلنا كلنا فى الموضوع ده؟
هى عايزه كل واحد و واحده يكتبو ذكرياتهم.

اتفضل قول لحد ما تيجى مشاعر :)

سيسامي هبقي احكي عن ذكرياتي وايامي الحلوة مع جدتي
وحشتني اوي

مدرستي الحلوة مدرستي الزينة اتربيت فيها و تغلمت فيها

وأنا صغير .. كان فيه دكانة مكوجى سطوحها تحت بلكونة أوضتى بحوالى متر ونص.
قبل العيد بيومين تلاتة وبالإتفاق مع المكوجى، كنا بنحط الخروف على السطوح المذكور، إلى أن تحين ساعته يوم العيد.
فى سنة من السنين، فضل الخروف يمأمأ طول الليل، وخرقان الجيران يردوا عليه، بهارمونية رائعة، ولا أعظم كونشيرتو لحد النهار ما طلع، ورحنا كلنا نصلى كالعادة، وجايبين معانا واحد من الجزارين اللى بيمشوا الصبح ينادوا: جزاااااااااااار.
ما لاقناش الخروف
يمين شمال فوق تحت .. مفيش خروف
نسأل الجيران، العجلاتى، كشك السجاير .. ضاع الخروف
فضلنا ندور لحد الضهر .. الأطفال تبكى .. والنساء تولول .. والسائل والمسكين وابن السبيل واقفين طوابير ~/~~
بابا صعب عليه الوضع .. نزل ياعينى جاب واحد تانى وجاب معاه الجزار.
دخلوا بالخروف عالحمام .. مكان ما بندبح كل سنة .. "بسم الله الله أكبر" .. خلص عليه فى ثانية .. واستمر فى العملية لحد الآخر، قطعه ووضبه وقسمه وكله تمام ..
أخذ حسابه .. ومشيت معاه للباب أوصله .. فتحت الباب .. لفيت أخينا الخروف المفقود، واقفلى عالباب وبيبصلى بنظرة كلها حنان، وبيقولى بصوت كله شجن: مـــــــاء

كنت فين؟؟ جيت هنا إزاى؟ (ده أنا اللى بأقول)
ما ردش عليا وما عرفتش الإجابة لحد النهاردة

اتاخد طبعاً عالحمام سريعاً مارش .. ونال مصيره .. اللى يستاهله بصراحة على اللى عمله فينا

دخلوا بالخروف عالحمام .. مكان ما بندبح كل سنة

هو انتي بتدبحو في الحمام هههههههههههههههههههههههههههههههههههههههه
هاهاهاهاهاهاهاهاهاهاهاهاهاهاهاهاهاهاهاهاهاهاهاهاههاهها


اصلي عمري ما شفت حد بيدبح في الحمام