ايامنا الحلوة

هاى شلة
ازيكم
انهاردة كنت مارة من ادام بتنا اللى اتولدت واتربيت فية
لاقيتنى سرحت و افتكرت حاجات لذيذة اوى مرت عليا زى شريط سينما
بجد لاقيتنى ببتسم من قلبى وباخد نفس عميق وبحكى لابنى عن حاجات كتير اوى اوى
بحبها وفاكراها زى ما تكون امبارح
اد اية كنت مبسوطة وانا برجع بالذاكرة و بفتكر
وحسيت انى رجعت 60 سنة لورا

كل واحد فينا اكيد لية ذكريات حلوة مش ممكن ينساها فى طفولتة وشبابة
وهو فى بيت اهلة قبل ما نشيل المسئولية
بيفتكرها من وقت للتانى وفى مواقف معينة
تعرفوا انى لما بعد مع ولاد خالتى او اصدقائى فى المدرسة والكلية
دايما بنفتكر مواقف حلوة عشناها
وذكريات لطيفة
حقيقى بيكون وقت حلو بحس بعدة بمتعة وبهجة داخلية
اية رأيكم
لو قعدنا مع بعض
وعشنا وقت لذيذ مع ايامنا الحلوة
كل واحد يسرح ويرجع الزمن لورا ويفتكر احلى ذكرياتة ويحكيهالنا

هااااااااااا
مين الشطور اللى هيبتدى

على فكرة يا جاتى الايقونات الموجودة بايخة اوى وما فيش ولا حاجة مناسبة واقدر احطها
سيبك من الالوان اللى بتلعبى بها
وارسملنا كام ايقونة لطيفة نعرف نحطهم فى موضوعاتنا ومداخلاتنا[/size]

زمان وانا صغيرة ومازلت
بحب و بموت فى الورد
كان تحت البيت جنينة حلوة اوى وكانت مليانة بالفل الهندى والبلدى وغيرة
المهم
انا كنت عاملة دبارة مخصوص
وكنت متصاحبة على عم مصطفى الجانينى
اول ما اشوفة
اجرى واجيب الدبارة بتاعتى من درجى
وانزلها لعم مصطفى من البلكونة
يربطلى فيهم الورد والفل الهندى
اشكرة
واطلع الدبارة وانا فى منتهى السعادة اللى فى الدنيا :flower:

افتكرت كمان
كنا دايما فى الاجازة الصيفية
ماما كانت تاخدنا انا واخويا بعد الضهر منعا للخناق مع بعض وللترفيهة
وناخد الشارع بتاعنا لحد الاخر مشى وكل واحد معاةbox كنا بنحط فى الساندويتشات فى المدرسة
ونمشى على الرصيف نقطف الياسمين من على الشجر اللى مالى اسوار البيوت على الصافين
ونملى الصندوق لاخرة يا سمين
وفى اخر الشارع عم رشاد البقال
نجيب منة شيكولاتة كورونا ونرجع على الصف التانى
نكمل قطف الياسمين
لحد ما نوصل البيت
نعد فى البلكونة ونفضى الياسمين
ونعد نعمل منة عقود وغوايش
ولازم اسيب شوية علشان احطهم لبابا على الكومودينو اوعلى المخدة

تصورى لحد دلوقتى كل ما امر فى الشارع دة
احس بنفس النسمة واشم ريحة الياسمين اللى مالى المكان
وافتكر وانا بتنطط من الشجرة دة للشجرة دة بسرعة علشان الم اكترقبل اخويا

هاااااااااااااااااا
ذكريات

لية يا ربى كدة
خلتنى اشترك فى منتدى كل اعضاؤة عندهم زهايمر
ولا واحد فيهم عندة حتة ذكرررراية صغننة من ايام زمان
يا رب اديهم الصحة كلهم
ورجعلهم ذاكرتهم وذكرياتهم
آآآآآآآآآآآمين

افتكرت حكاية انما اية
هحكيها بس خدوا بالكم الحاجات دة بينى وبينكم بس
اصلها من الاسرار الحربية اللى محدش يعرفها
مرحشى الاقى الموضوع متنطور هنا وهناك
اتفقنا
زمان واحنا اطفال
كان كل الاولاد بتوع المنطقة بيتلموا بعد الضهر ويعدوا مع بعض اولاد وبنات
فى جنينة بيت اى واحد فيهم
ماعدا انا واخويا
كان ممنوع مانعا باتا نعد معاهم
باعتبارهم قاعدين فى جنينة
والجنينة فى الشارع
يعنى هما قاعدين فى الشارع
ودة ما يصحش
وكانت كلمة ماما اليومية
نادى اة
شارع لا
بعد اسطوانة محايلات منى انا واخويا
وانا بصراحة ما كنتش عايزة اى حاجة غير انى العب مع حمادة
وحمادة دة كان ولد مكلبظ وشعرة ناعم واصفروخدودة احمرة
وحمادة كان فى نادى تانى غيرالنادى بتاعنا
يعنى ولا لعبت مع حمادة فى الجنينة ولا فى النادى
ولا حتى فى الشارع
عينى عليا



الذ حاجة
انى شفت واحدة صاحبتى ومن جيرانى فى النادى قريب
واعدنا نحكى عن زمان وذكريات زمان
ولا قتنى بقولها تتصورى انى كنت بتغاظ منك اوى يا عبير زمان
البنية اتخضت
والموضوع قلب جد
و قالتلى لية ؟
انا عملت فيك اية؟
وانا بمنتهى الجدية و البراءة وقمة الحسرة
قولتلها
اصلك لعبتى مع حمادة وانا لا
كان نفسى نفسى العب مع حمادة
لاقيت صاحبتى ماتت من الضحك
وانا كمان فوقت من ذكرياتى واعدت اضحك
ولحد انهاردة ذلانى
كل ما تشفنى نبص لبعض ونضحك
ومحدش عارف بنضحك لية

اممممممممممممممم
برضة محدش عايز ينفعنا
شكلى بقى وحش خالص مالص
وانا مسكانى كل يوم وعمالة احكيلى ذكرياتى

يا مشاعر بجد بحس إني مبسوطة وأنا بقرا ذكرياتك.

وعد جاية قريب أدلي بدلوي عن ذكرياتي وأيام حلوة.

الحمد للة ان ذكرياتى مش مملة
طمنتينى يا مصرية
ربنا يخليكى
ومنتظراكى
ومتشوقة اسمع ذكرياتك

فكرتينى يا مشاعر بذكريات طفولتى ..
كنت فى ابتدائى فى فصول أول تالت ومن بعدها تانية تالت .. وهكذا إلى خمسة تالت ..
ولما جينا فى سنة ستة ابتدائى راحوا ضموا شوية من فصول خمسة تالت على فصول خمسة رابع ..
وبقينا احنا الاتنين فى ستة تالت مع بعض ..

وكان فى الفصل معايا واحد اسمه محمد ابوسريع ..
كان زميلى من فصول خمسة تالت ..
وأما المنافس له فكان واحد اسمه أمجد .. وكان من فصول خمسة رابع ..

وكان لكل واحد منهم شلته وأتباعه ..
وكنا متعودين نتقابل كل يوم الصبح قبل المدرسة ونلعب كورة ..

يعنى كنا نتقابل ونلعب فريق خمسة تالت ضد خمسة رابع ..
أو خمسة تانى .. أو خمسة أول .. وهكذا ..

وكان على مستوى الدراسة فيه منافسة شديدة بين أمجد ومحمد لدرجة التحزب والخصام والخناقات ..

وكانت معانا بنت اسمها عبير صلاح الدين ..
وكانت بنت جدعة :lol:
وكانت بتحب الكورة ..

وكنت دايما أتكلم معاها ..
وفاكر مرة ان ماما جت تاخدنى من المدرسة ..
وكانت عبير واقفة .. وعملت لها باى باى .. وهى كمان رديت عليا ..
وكانت بيننا نظرات معبرة ..

حتى ماما أخدت بالها ..
وغمزت لى ..

بس من ساعة مانتهت الدراسة ..
وأنا دخلت اعدادية فى مدرسة تانية ..
ومعرفش حاجة عن عبير ..

محدش يعرف هى فين دلوقتى؟

مشاعر .. انت طلعت مشكلة


المواهب دى ما كانتش باينة قبل كده ليه؟؟

كملى يا بتاعة حمادة .. كملى



خدى الوش الغتت ده مؤقتاً لحد ما أجيب غيره

بتسأل عن عبير يا سمارت؟؟

أنا عارف هى فين

تدفع كام وأقولك؟


هشام
مادى ومستغل بعد الضهر

انا بأملأ الجردل أهو
وهادلقه

بس لما يتملي

كملى يا بتاعة حمادة .. كملى

ماشى يا هشام
مسيرك هتيجى هنا برجليك
وسا عتها مش هنسيبك كلنا

محدش يعرف هى فين دلوقتى؟

الست عبيرهانم بتلعب مع حمادة بية
وانا وانت هنا بنبكى على الاطلال

انا بأملأ الجردل أهو
وهادلقه

اية يا حج اوسكا اية
كل دة بتملى الجردل
على كدة هنعد نسمع ذكرياتك اربعين ليلة بالتمام والكمال

مشاعيريرو ياهوووو

انتي فين


اولا اهنيك على الموضوع لانه جميل


ثانيا لانك طلبتي تيقونات

و انا حجيبها بس مءقتا عندك ايوقنات المووضع بتاع ايوقنات جاتيتو تاوكي

انا بقى ححكيلكو علي ايامي الحلوة


من زمان كنت بكون كثير مع جدتي الله يرحمها


و قدام بيتها كان عندهم جيران طبعا زي كل الناس عندها جيران

سمات عندك جيران؟

فرفر عندا و انتي اكيد يا مشاعيريرو عندك جيران و كلكم اكيد المهم

كان عندا جار

ابن جار حنها كلن طفل زي بس مش زي اي طفل

كان سمين و واسع عامل زي البرميل

و لما بيشوفني كان دايما بيشتمني

و انا مش عارفة اعمل ايه

اروح اعيط عند ماما طبعا لا

اعمل ايه اعمل ايه


مرة كانت جدتي مريضة و عمللوها حقنة

فرحت اخدت الابرة اللي ببتحقن دي بعد ما استعملوها


رحت خرجت برة و شفتو هناك عامل زي الكلب
pitbull
فرحت جري عنده و دخلت الابرة في داعه و لما طلعتها طلعت متعوجة

و هربت بسرعة دخلت البيت و قفلت الباب و طلعت السطوح علشان اخفي اداة الجريمة بقيت اكسرها حتت


و اخفي كل طرف في مكان


هههههههههههه


كانت حكاية

جاتي انت عملتي كده بجد طب وكعبورة حصلوا ايه
أمان يا ربي أمان :face:

ايوة و الله عملت

هههههههههههه

ده انا عملت حاجات :albino:

جاتى
دة انتى كنت شريرة اوى

طب عايزينك تعملى كدة مع مين مين مين؟
افتكرت
مع هشام
علشان بيقولى يبتاعة حمادة
ومع اوسكا
علشان كسلان ومش بيشارك معانا
ومع سمارت
علشان يبطل زهق وضيق

افتكرت انهاردة حكاية لذيذة
دايما بفتكرها كل ما اروح اسكندرية

واحنا صغيرين كنا بنسافر اسكندرية باستمرار
ودايما كنا بنخرج مع خالتى واولادها واصحابهم بحكم انهم من سكان اسكندرية
وطبعا كانت التعليمات ان احنا مالناش دعوة بحد
ولازم نكون مربوطين بالحبال بايد ماما وبابا
الكلام دة مش وانا طفلة
توءتوءتوء
دة انا كنت عروسة حلوة اطول منى دلوقتى
المهم مرة كنا خارجين كلنا
وعلى الباب
لاقينا ضيوف جايين لخالتى علشان يسلموا على ماما وبابا
طبعا مينفعشى ماما وبابا وخالتى ينزلوا
واحنا الصغيرين اليوم باظ علينا
بس حد من ولاد خالتى اللة يكرمة اتحايل على بابا ان احنا نخرج لوحدنا
وان احنا هنلتزم بالقواعد والقوانين
ومش هنعدى الكورنيش
ومش هنتخانق ونسيب بعض
وبعد الموافقة
كلمنا اصحابنا بالتليفون
وطيرررررررررررنا على المكان المحدد
بحقيقى كان احلى مرة اخرج فيها واحس انى حرة ومش متكتفة


ورحنا كلنا كافيتريا على البحر لحد دلوقتى موجودة
طلع كل واحد الفلوس اللى معاة
واديناها لكبيرنا
وكل واحد طلب مشروب
وقعدنا نلعب شطرنج وكوتشينة
ونضحك من قلبنا
واتبقى معانا فلوس
اعدنا نحسب من تااااااانى
وطلبنا كل واحد مشروب تانى اقل فى السعر
وفضلنا طول القاعدة نضحك من قلبنا ونحسب فاضل كام من الفلوس
لحد ما تبقى معانا مبلغ قليل جدا
وبعد مشاورات ومداولات وخناقات طبعا
اتفقنا
واشترينا بة ساندويش واحد
وفى المحل والكل اكيد بيتفرج علينا
اتلمينا كلنا على الساندويتش
ولف علينا الغلبان
كل واحد اخد قضمة

بس بجد بجد
كان احلى سا ندويتش
و احلى فسحة
واحلى ضحكة طالعة من القلب


سبب ما افتكرت الحكاية دة
ان الاستاذ ابنى جالى يستأذن منى على خروجة مع اصحابة
ولما استفسرت منة عن المكان
قالى فى كا فية مشهورة اوى
وطبعا لما لاقانى فاتحة بقى ومش مستوعبة
اعد فهمنى ان كل اصحابة وكل المدرسة بيتقابلوا فية
وان الموضوع عادى
تتصوروا عيال بلية وبيتقابلوا فى كافية
وانا كنت عروسة ومتشعبطة فى ايد بابا
او ديل فستان ماما

عينى عليا

مشاعر كتب:جاتى
دة انتى كنت شريرة اوى

طب عايزينك تعملى كدة مع مين مين مين؟
افتكرت
مع هشام
علشان بيقولى يبتاعة حمادة
ومع اوسكا
علشان كسلان ومش بيشارك معانا
ومع سمارت
علشان يبطل زهق وضيق

لا مكنتش شغيغة خالص

ده انا كنت قطقوط صغي

بمنشار كبيييييييييييييير

مشاعر

اتأخرت عليكي عارفة
معلش من ساعة ما فتحتي الموضوع بحاول أفتش في ذكرياتي القديمة علشان أشاركوا فيها؛ الغريب إني مش لاقية.

المهم امبارح بس عرفت حقولك إيه.

أيام إعدادي اتنقل شغل ببايا لإسكندرية وطبعا أنا كمان اتنقلت لمدرسة جديدة في اسكندرية؛ اتعرفت هناك على أصدقاء العمر. ابتدينا سبعة في إعدادي، على آخر سنوي وبداية الجامعة كنا بقينا ستة، بعد الجامعة وصلنا خمسة، دلوقتي بقينا تلاتة من أصل سبعة؛ عوامل التعرية بقى

الإسبوع اللي فات وبعد ست سنين أخيرا اتفقت مع صديقتا العمر إننا نتقابل؛ حددنا مليون ميعاد واتفاقات لغاية ما أخيرا اتقابلنا امبارح.

ضحكنا وهزرنا وحكينا الجديد لكل واحدة وافتكرنا أيام زمان وناس كانوا موجودين وبقوا ذكريات رجعوا يطفوا على الذاكرة بسبب الفيس بوك والماسينجر.

وبعد ساعتين تقريبا في لقاء أشبه بالحلم رجعنا سنين وسنين لورا سيبنا بعض على اتفاق بتكرار اللقاء؛ أتمنى يكون قبل مرور ست سنين تانيين.

لما رجعت حسيت إن اليوم ده فعلا من أيامي الحلوة اللي كان لازم أشاركوا فيه.

ضحكنا وهزرنا وحكينا الجديد لكل واحدة وافتكرنا أيام زمان

القاعدة والضحك والهزار مع الاصدقاء
وانعاش الذاكرة بحكايات حلوة وذكريات جميلة
ليها تاثير هايل على الحالة المزاجية
والسعادة الداخلية لفترة طويلة

بس انت محكتيش يا شقية عن ذكرياتك

فكرتينى يا مصرية بحكاية ايام الكلية
هقولها بس مش دلوقتى
لما انيم الاولاد
وكمان لما هشام ينام
علشان ما تتمسكشى عليا

بس انت محكتيش يا شقية عن ذكرياتك

لازم الفضايح دي.

مفيش ذكريات

كلها لما كنا بنخرج بعد المدرسة ونتمشى في محطة الرمل؛ ناكل سندويتشات من عند محمد أحمد. ونحوش طول الشهر علشان نخرج يوم نروح السينما ونتغدى في بيتزا هت ولا كنتاكي وبعدين نتمشى لغاية سلطانة بتاع الأيس كريم وفي الآخر كل واحد يروح بيته.

جمال الذكريات إننا كنا مش شايلين هم حاجة وبنضحك من قلبنا. ده اللي بفتكره كل ما أفكر في أيام زمان.