مشكلات العام الدراسى الجديد

مشكلات بداية العام الدراسى الجديد مختلفه ومتنوعة فى كل بيت وتعانى منه الأسر كل عام منها ما يختفى ومنها ما هو جديد يظهر ويطفو على سطح الحياة

هناك من الآباء والأمهات من يتعذر عليه حل مشكلات ابنه التى يأتى بها من المدرسه إعتقاداّ منهم أنها مشكلات بسيطة غير

معقدة لاتستدعى الإهتمام مقارنة بما لديهم من مشكلات أخرى تتعلق بتوفير النفقات لجعل أبنائهم فى مستوى حياة أفضل

وكان هذا فى الماضى القريب، ولكن ..

الأن مع ظهور ثقافات جديده تهتم بالطب النفسى للأطفال بدءت الأسر أخيراّ تنصت لابنائها

ففى حالة وجود مشكلات فأن الإنصات فى حد ذاته بدايه حل أكثر من نصف المشكلة فيتشكل عند الطفل أنه عضو مهم بالأسرة وان مشكلاته،اهتماماته، أفكاره، محور إهتمام من الأخرين

اما حين يفقد الطفل هذا المعنى فيبدء فى الانعزال بمشكلاته عن الاخرين ويفضل كبتها والتعبير عنها بطرق أخرى كلها فى النهايه

تؤدى إلى مشكلات نفسيه وعقد

ومنذ شهر قال لى : د. ادهم ( أن الطفل المصرى هو طفل حزين جداّ )  

وشرح لى تلك الجمله بالتفصيل وارغب من الـ د. أدهم ان يشرح لى تلك المقوله من جديد من خلال المنتدى حيث ان أبنى يوسف

يرجع من المدرسه ويدخلنى فى اكثر من موضوع وأرد عليه وأحاول أن اشعره بمشاركتنى الفعاله فى كل ما يقول ولكن فى نفس

الوقت أخاف جداّ أن يكون ردى عليه وطريقه حلى لمشكلاته تؤدى إلى مزيد من التعقيد للمشكله وليس حلها من ناحية اخرى احياناّ

كثيرة المدرس لا ينصت للطفل ولا يوليه اعى إهتمام وفقط يعتقد ان على عاتقه التعليم بالرغم من أن عنوان الوزارة هو

( التربية والتعليم )

مثلاّ : يوم الخميس جاء يوسف من المدرسه (( أنـــــفه بها دماء ويده اليسرى معضوضه جامد ورأسه تؤلمه
وقال يوسف : الولد حماده اللى جنبى وضع رجله على راسى كلما احضرت كراسه من الشنطه ثم ضربنى ولكننى انا
ايضاّ قمت بضربه ولكن هو اللى ضربنى الاول ولما زهقت من كتر ما ضربنى فضربته انا كمان
كان ردى عليه بالحرف الواحد
متزعلش يا حبيبى تعرف انا حروح المدرسه يوم الاحد القادم واكلك دراعة وليله سودا ومهببه .
طبعاّ يوسف ضحك لانه عارف انى بهزر وقالى انا مش عايز اخلاقى تبقى وحشه ومكنتش عايز اضربه
هو انا كده ربنا يزعل منى ولا لأ

سألته : ليه مقلتشس للمدرسه
رد : قلت لها بس هى لم ترد ففضلت اضربه يمكن يبطل اللى بيعمله

مواقف بتحصل كل يوم فى كل بيت لكن ايه رد الفعل لاولياء الامور ايه موقف المدرسين من فترة طويله فى المنتدى كانت " لارنو "

عامله موضوع اسئله معينه لو انت ابنك فى يوم قالك يا ماما الولد ده ضربنى حتقوله ايه وكتبت عده اختيارت فعلاّ سؤال محير؟

ولكن انا عايزة اتصرف مع المواقف دى بحكمة اعمل أيه ؟؟؟؟؟؟؟؟؟
ومن الاخر يوسف ان المنتدى وأبنى اتعض يا جدعان وانا ليا واجب فى كل صفحات المنتدى وعيزاه يترد لى النهارده

ومن الاخر يوسف ان المنتدى وأبنى اتعض يا جدعان وانا ليا واجب فى كل صفحات المنتدى وعيزاه يترد لى النهارده

ازاي ده يحصل ؟؟؟ انتي بس قولي هو في مدرسه ايه و فصل ايه ... واحنا نلم الشله بتاعه بحري و ايووووووه علي الي حايحصل في الواد حماده ده

قال يعض يوسف قال ... ده الدنيا باظت يا جدعان

أوسكا ... ازيك ...وعاش من شافك ... و الله يكون في عونك وعون ام العيال

طب سؤال .... تعرفو ايه عن فصول ال "VIP"
حد سمع عنها ؟؟

OSKASAN كتب:

انا مشكلتى كبيرة جدا
انا عندي عيلين ( هما 3 فى الحقيقة لو اعتبرنا الزوجة عيلة قصدي احد ابنائي

دي كلمة جوزي يقعد يقولي أنا عندي ولدين وبنت ، طبعا أنا بنته

مشكلنى تتلخص في حاجتين الحقيقة
قبلها باسبوع نفضل نلف على الشنط للعيال
ودي تنفع ودي ماتنفعش
ودي جبناها السنة اللى فاتت واصحابنا حفظوا شكلها
يابورررررررى من العيال وامهم
يوم استلام الكتب بافضل اسهر طول الليل فى تجليد الكتب ووضع التيكيت وكتابة الأسماء
وتاني يوم لما المدرسين العظماء يفضلوا يطلوبوا كل واحد طلباته
اشي كراية صفحة وصفحة 40 ورقة
واشي كراسة صفحة وصفحة 60 ورقة
واشيى كراسة مربعات
واشي كراسة مش مربعات
ده غير الاقلام والاساتيك والبرايات والبلاوي السودة
افضل الف على الاسواق يومين لغاية لما الم كل حاجة
وافضل افصل دي بتاعة البنت ودي بتاعة الولد
وياليلي وياسواد ليلي لو جبت كراسة للبنت عليها بات مان ولا كراسة للواد لونها روز
ارجع الف عليهم انا اشتريتهم من اي حتة علشان ابدلهم
وبعدين اتنيل تاني علشان اجلدهم

ونيجي بقى للزي المدرسي
ده طويل نروح نقصره عند الترزي
وده واسع ناخده سمكتين
والشوز يابابا

يخرب بيت كده
ده غير مصاريف المدارس واقساطها

انت لخصت الموضوع يا أوسكا

خدو عندكو الطلبات اللي طلبوها من ابني اللي في ( كي جي تو ) في أول يوم في المدرسة :

اللغة الإنجليزية :

عبوة 9 بكرة مناديل أو عبوة 500 منديل
مطهر ديتول سائل
6 قلم رصاص
أستيكة
براية
3 جلو برايت ==== ممكن حد يشرحلي إيه دة ؟؟
ألوان خشب ( 12 لون )
1 كوب بلاستيك
1 طبق بلاستيك
فوطة يد صغيرة
2 جلاد أخضر لكراسات الإنجلش
2 جلاد أزرق لكراسات math
20 ملف بلاستيك يمكن غلقه ( أخضر وأزرق )
فرشاة أسنان و أنبوب معجون أسنان

اللغة العربية :

قصة من قصص الأطفال
اسكتش كانسون 1\8 ألوان ==== ( مش دة بيستخدموه في كلية الهندسة )
بكرة سلوتيب
2 اسكتش رسم
لاصق ( 6 pritt ) ===== يعني إيه الكلمة اللي بالإنجليزي دي
2 فرخ كانسون ====== تاااااااااني !!!
ملف ( يمكن غلقه )
2 جلاد أحمر

الرسم :

1 اسكتش أبيض 1\8 ======= تااااااني !!! ما يقولوا طلباتهم مرة واحدة !!!
1 اسكتش ألوان 1\8 !!!!!!!!!
2 طيق فايبر
2 لصق pritt =========
علبة ألوان خشب 24 لون (faber castell ) ====== مش كان فيه علبة ألوان فوق !!! مش تبقى علبة ألوان واحدة الولد يلون بيها في كل المواد ؟؟؟
ورق كوريشة
زجاجة برونز كبيرة ==== إيه دة كمان ؟؟؟؟
2 رول مناديل فاضي
2 لصق أوهو
صلصال
ملف
3 علبة كبريت فارغة
زراير ملونة

معلش يا إيمي رديت على أوسكا الأول بس كان دمي محروق من طلبات المدارس !!!!!

قبل ما أرد عليكي عايزة أسألك ابنك عنده كام سنة ؟؟

بالنسبة لموضوع مشكلة ابنك

أنا لو مكانك مكنتش هقوله هاجي المدرسة أضربلك الولد !!!

كنت هشجعه وأقوله انه اتصرف صح ... هوه الحمد لله محصلش معاه حاجة لحد دلوقت ... هوه لسه امبارح كان أول يوم في المدرسة ولسه ما كوّنش أي صداقات ولا أي عداءات مع حد

بس من قبل ما يروح المدرسة وأنا بنبه عليه إنه ما يخليش حد يضربه ولو حد ضربه يضربه وما يخافش ولا يسكت عن حقه ، وقلتله يضربه الأول وبعدين يقول للميس ، لأنه لو قال للميس وما ضربش الولد الولد ممكن يستضعفه ويفتكر إنه خاف منه وساعتها ممكن إبني يخاف منه فعلا ، انما لازم يرد عليه من أولها ويضربه زي ما ضربه وبعدين يروح يقول للميس ويقولها إن هوه كمان ضربه دفاعا عن نفسه ...

في الزمن اللي إحنا فيه ده لازم الطفل يعرف ياخد حقه بدراعه ، مش قصدي يطلع عدواني أو يبتدي بالعدوان لكن يعرف يدافع عن نفسه ضد أي اعتداء يحصل عليه ...

الأطفال اليومين دول أغلبهم بيميلوا للعنف بسبب التلفزيون وحتى الكارتون اللي أصبح لا يخلوا من العنف بتاتا والأطفال اتعلموا أساليب الضرب المدروس من اللي بيتفرجوا عليه ، والله العظيم شفت ولدين بيضربوا بعض في مرة ضرب مدروس في أماكن معينه زي ما بيشوفوا في الأفلام !!! طيبشوف موقف زي دة وأقول لإبني لما حد يضربك روح قول للميس ؟؟؟؟؟؟؟ لأ طبعا ... أنا عرّفته إنه ما يضربش حد لكن لو حد ضربه يضربه هوه كمان الأول زي ما ضربه وبعدين يروح يقول للميس ، لأن محدش ح ياخدله حقه ، وعشان محدش يستضعفه ...

مشكلتي بأه مع إبني الأصغر ( أصغر من أخوه بسنه ) مساااااااالم بطريقة بشعة بشعة

بينضرب من العيال كلها وبيجري منهم ويعيط ... ولو حد أخد منه اللعبة اللي كان بيلعب بيها يقعد في ركن لوحده ويعيط ، حتى ما بيحاولش ياخد اللعبة تاني ، ومهما آخده من إيده وأقوله أضربه زي ما ضربك ( سواء أخوه أو ابن أختي أو أي طفل من العيله ) ما بيرضاش يضرب ، وبقوله ما تخافش انت في حمايتي اضربه وهوه مش هيقدر يعملك حاجة ، برضه ما بيضربش ، واللي يغيظ أكتر ان لما حد يضربه ( من عيال العيلة ) وأقوله ما ضربتوش ليه ؟ يقولي دة أخونا العيال كلهم اخواته

في الحضانة كان بيعتمد على أخوه ياخدله حقه ، لأن أخوه الكبير لما بيلاقيه بيعيط بياخدله بتاره من اللي زعله أو ضربه ... ومكن هوه دة اللي خلاه مش عارف ياخد حقه اعتماده على أخوه في كل حاجة ...

لكن أملي السنادي أنه يعتمد على نفسه ويكون لنفسه شخصية مستقله لأنه هيكون لوحده مش مع أخوه وربنا يسهل

مشكلتي بأه مع إبني الأصغر

تعرفى يا سمسيه ابنى بالظبط فى شبهه كبير من ابنك يقولى ديما لايا ماما ده صاحبى مش حضربه، وكل اللى بتحكيه كأنك بتحكى عن يوسف ابنى بس هو دولقتى فى سنه تانيه ابتدائى بدء شويه من الصيف اللى فات ياخد حقه الى حدا ما بعد ما غلبت فيه من طيبته اللى بتضيع له حقه وتخليه اضعف من اصحابه واضعف من اولاد العيله ( اخصائى نفسى قريبى نصحنى فى ان يوسف يلعب رياضه مستمرة صيف شتا ) وبكده حتزيد ثقته بنفسه حتى لو ملجأش للضرب فى تعامله مع الاطفال هو حيبدع اساليب مختلفه ياخد بيها حقه وفعلا اشترك فى سباحه طول فتره الصيف ودلوقتى انا حشترك له فى الكارتيه

مشكلتك يا اوسكا مع الكراسات واللذى منه وما ادرانا بالذى منه انا بكون مسئوله فيه لوحدى عبئ كل الفيلم ده فوق راسى من الالف للياء وفعلا شيئ مرهق ومتعب ويجيب إكتئاب غير طبيعى وخلاص الواحد بعد ما يتم استنزافه واستنزاف طاقته تيجى الاولاد من المدرسه تشتكى بصراحه انا عايزة استجم بحس ان مخى فى سلكين لفو على بعض وبيعملو شراره كل ثانيتن وممكن فى اى وقت يحصل انفجار

شفتى يا لارنو اللى حصل لابنى بس الحمد الله و
مشكرين يا ام الواجب يا حبيبشتى نردهالك يا ختيشى فى خناقه تكون معتبره هى دى الجدعنه الاسكندرنيه انا رحت مع خالتى مسعده على المدرسه مع جارتى حميده زيند السبع وقامو ياختيشى بالواجب نشيلك فى عوزه ونخدموكى يوم شربات نجاحك يا شابه