استشارة....الكل يحضر حتى انتي يا ايمي

الف مبروك ياقمر ..

اخيرا قررتى تدخلى القفص الذهبى

بس انتى ما وضحتيش اسباب رفضك لحفل الزواج , وهل هو فقط بسبب توترك وقلقك اثناء الحفل كما ذكرتى , والا فيه اسباب اخرى ؟

اذا كان ده السبب الوحيد .. فى رأيى انك تعملى حفل زواج وتعزمى كل الاقارب والاصدقاء , واعتقد ان احساسك بالرهبة ده احساس طبيعى بتشعر بيه كل بنت مقبلة على الزواج وسيزول بمجرد ماتلبسى الثوب الابيض وتصبحى عروسة ووردة الحفل , وعلى فكرة عريسك برضه حيحس بالرهبة وبنفس الاحساس وخصوصا اذا كان موافقك على رأيك فى عدم اقامة حفل , يعنى مش انتى بس اللى حتكونى لوحدك خايفة ومتوتره

دى ليلة العمر ياقمر , ودى اللى حتفضلى فاكراها طول حياتك الزوجية , وحتفرجى اولادك ان شاء الله على صور امهم وهى واقفه وحاطه ايدها فى ايد سي السيد ابوهم , يبقى لازم تكون ذكرى جميلة لحفل رائع وعروسة قمر .

حزمونى


رأيى مختلف عن رأى أدهم يا قمر .. وانت صاحبة القرار فى النهاية.

أولاً .. من الناحية الدينية ..
مش مطلوب منكم غير الإشهار. والفرح مقصود منه الإشهار، لكنه ليس الوسيلة الوحيدة للإشهار.
إبلاع الناس بأى وسيلة يؤدى الغرض .. مثلاً: إعلان فى الصحف، أو الإكتفاء بإبلاغ الأقارب والجيران .. هو إشهار.
ومظاهر البذخ مهما قلت تكاليفها للتحايل على الدين، أفتى جمهور العلماء كلهم بحرمانيتها أو بكونها مكروهة على أقل تقدير، لأنكم أولى بها لتحسين أحوالكم، وإن كنتم لا تحتاجونها، فأحرى بكم أن تنفقونها فى سبيل الله، وأوجه هذا النوع من التصدق عديدة، خصوصاً فى أيامنا هذه.

ثانياً .. من الناحية الشخصية ..
لو أنت وهو متفقين .. إذن .. طظ فى الناس وكلامهم ..
افتكرى قصة جحا وابنه وحماره دائماً .. مهما تعملوا .. ستجدان من ينتقدكما ..
مهما تعملوا!!!!!

أما إعطاء الفرح قيمة لكونها ليلة العمر ,, فتأكدى انها ستكون ليلة العمر سواء عملتوا فرح أو ما عملتوش ..
اتصوروا وانتم بتلبسوا بعض الدبل .. ووأنتم سهرانين مع من يحضر من أفراد الأسرتين أو أقرب الأصدقاء أثناء إتمام الإجراءات .. ووأنتم تكتبون عقد القران .. إلخ
كلها لحظات جميلة وسعيدة يمكنكم تسجيلها بالصوت والصورة تسجيلاً أبدياً ..

ولو متفقين على عدم إقامة الفرح .. وبفرض ان معاكم فلوس .. وبفرض ان بيتكم جاهز وكله تمام ومش ناقصكم أى شئ .. سافروا .. اعملوا شهر عسل لكم انتم الإتنين وبس فى أماكن تحبوا تزوروها .. وسجلوا سغركم بالصوت والصورة للتاريخ.


كده عندك وجهتين نظر من أدهم ومن اتش .. الإثنين صح .. شوفى الأنسب لكم منها، وبالشفا

صباح الخير يا قمراية
انا دخلت مخصوص والله عشان الموضوع دة بجد ومينفعش اسيبك كدة لايصة لانك اختى وحبيبتى
اولا: مبروك يا احلى امورة ويا رب يتمملك بخير ان شاء الله حبيبتى
ثانيا : رايي فى هذا الموضوع

بصى بقى يا ستى تعالى اقعدى هنا وخدى كوباية شاى وتعالى افهمك القصة
انتى دلوقتى احسنلك بالمنظر دة انك تمسكى العصاية من النص
يعنى تعملى فرح ايوة
بمعازيم وكل الدنيا دى
بس بشكل راقى مش بالشكل الاهبل اللى بيحصل كتير اوى اليومين دول
بالرغم انى عارفة انى مش حعرف اطبق اللى انا بقوله مع نفسى بس قولت اقولك الفكره يمكن حد ياخدها وتتعمل بقى لحسن زهقت
الفكره ان الحفلة تكون فى مكان بسيط مش لازم يكون مكلف ويكون المعازيم بشكل جلوس على طرابيزات متصلة بشكل على حرف
u
او حرف
T
والعروسة والعريس معاهم على راس الترابيزة
والعروسة تلبس الزى الرسمى للفرح الا وهو الفستان الابيض والتصوير والدنيا دى عادى
بس مفيش بقى الهيصة ولا الرقص اللى بنشوفه

وطبعا
بالنسبة للموسيقى انتى على حسب ما تتفقى مع اللى حيشغل الدى جى انه يشغل موسيقى هادية وبس ولا اغانى غير راقصة ولا زى ما انتى تحبى

بمعنى ان الفرح يكون فى شكل حفلة عشااااااااااااء

الميزة فى الموضوع دة

اولا:ان العروسة مش بتحس انها فى مسرح والناس قاعدة بتبص عليها
وحاسة انها وسط اهلها وحبايبها مش بتعمل تمثيلية ولا بتصور فيديو كليب

ثانيا :المعازيم ساعتها حيضطروا انهم يقعدوا ويبقوا هاديين لان اللى حيتصرف اى تصرف انتى حتحدفيه بالطبق اللى قدامك او الكوباية اللى جنبك

ثالثا: المعازيم والعروسة حيحكونوا متفاعلين اكتر بشكل راقى يعنى كل حبة عمالين يتكلموا مع بعض وبس مفيش حد عمال يرقص ولا حد عمال يغنى بصوت نشاذ فى الميكروفون

وربنا يتمملك بخير حبيبتى وابقى اعزمينى على الفرح دة بالذات عشان احذو حزوك ان شاء الله

لوووووووووووى لوووووووووووووووى

الف مبروك يا قمورة ...... ربنا يبارك لك فرحته وتعيشى حياة سعيدة مع زوجك إن شاء الله ..

أنا احب أقولك مالكيش دعوة بكلام الناس لو انتى مش حابة تعملى فرح
وبعتقد انك بتاخدى راينا عشان تتاكدى ان قرارك شيئ طبيعى فى عدم الألتزام بالتقاليد المتعارف عليها لأقامة الأفراح

لو ده رايك انتى فعلاّ ومحدش اثر عليكى فى القرار ده " زى مثلا خطيبك "
لتوفير النفقات يبقى توكلى على الله و نفذى قرارك

لكن احب اقولك نصيحة من كل قلبى عن عروسة من حوالى 8 سنوات
قررت ان لا تقيم فرح واكتفت بحفل " كتب الكتاب " بحجة انها لا ترغب فى البهرجة و لاتفرق معاها الافراح يهمها سعادتها مع زوجها وتوفير النفقات من اجله
وعدم إرهاقة بمصروفات اكثر من ذلك .... وووو إلى اخره من حجج

ولكن مع كل ما يقال لها من انها ليلة فى العمر لن تتكرر ، او قومى بعمل حفلة بأقل التكاليف حتى ...
لن تستمع لكل هذا فهى شخصية عنيدة جدا وإن ظهر للجميع انها تحب المشورة وتحب ان تدخل الجميع من حولها وتشركهم فى تفاصيل حياتها .

ولكن ظلت تلك الفرحة التى كلما تذكرت أنها مرت بهدوء تام هدوء قاتل لا ذكرى قبله لا فستان فرح قبله لا بهجة ولا تهانى يوم الزفاف ...... لا اى شيئ
فانعكس هذا بالأثر السيئ على مشاعرها وظلت نادمة انها ضربت بالنصائح ضرب الحائط ولم توازن بين رأيها وراى الاخرين

وعن راى الشخصى لك ( قومى بإعداد حفلة بسيطة حتى ولو خروجه ولسيت حجز قاعة افراح وارتدى فستان الفرح ولا تنسى الصور والفديو التذكراى لتلك الليلة ) حتى وغن لم تكن مصاريف تلك الليلة موجودة انتظرى القليل من الوقت واجمعى المبلغ المطلوب بعد عمل حسبة باقل التكاليف ) وسوف تشعرين بالفرق

ومن اللحظه دى تقام الافراح وتعلق الزينات وتفرق الشربات على اهالى المنتدى الكرام و التورتات الحلويات

بس دولفن لا

ولا حته تورته حتكلها ولا فتفوته حتى

اية يا ايمى
شكلك كدة عايزة تتخانقى
يا فتاح يا عليم يا رزاق يا كريم على الصبح
انا اية اللى دخلنى هنا اصلا

أيوة انا عيزة اتخانق تعاللللللى بره أزاى مش بتكتبى فى المنتدى من فترة طويله
ومش معبرانا اقولى اعترافتك حالا

حيكون ليه يعنى
اكيد مشغوله يا باشا
وربنا يديم المعروف
واللى عنده كلمة يلمها
والبنت داخلة على فرح وعايزين نزقططلها

ماشى يا فندم علم وحينفذ
وصلى صلى وبيب بيب وليدو ليدوووووووو ليدووووووووو
وعروستنا اهيا يا هو وووو يا هوووووو
لوووووووووووى لوووووووى لوووووووووى

هههههههههه
ايييييييييييييوة كدة
اخيرا فهمت يا وديييييييييييييع

انا مفهومية وأعجبك

والله يا قمورة الحيره دى أنا عشتها مع ناس صحابى و حتى مع نفسى لما كنت مخطوبة

ومن الاخر أنا مع رأى دولفين الجميلة...ليه؟

أولا, لأن الفرح الكبير زيادة عن اللزوم و الدوشه و الهيصة الزيادة عن اللزوم دى مش حتبسط حد...و انت أولهم
و زى هشام ما قال...مهما عملتى فى الفرح برضو الناس حتطلع تتكلم عليكى و على العريس و المعازيم و الفرح و مش حترضيهم ابدا..
غير طبعا ان الاسراف فى أى شىء مكروه دينيا..

ثانيا, لو الفرح صغير زيادة عن اللزوم ,ده حيزعل ناس كتير...أولهم مامتك اللى أكيد عايزه تشوف بنتها بفستان الفرح و أهلها و صحابها بيهيصوا لها و أكيد انت عايزه تفرحيها
غير انك فى الفرح الصغير أوى ده, حتضطرى تعزمى أصغر عدد ممكن و ده ممكن يزعل ناس كتير منك و حيفضلوا شايلنهالك...أنا ماكنتش مصدقة ان ده ممكن يحصل غير لما شفته بنفسى
كمان ممكن ده يسيب عندك الاحساس انك ممكن بعد كده تندمى على قرارك ده
و لو عملتيه فى البيت..و اسألينى أنا...مش عملى خااااالص
و حتتلخمى فى تجهيز البيت و تشغلى مامتك و كل اللى حيساعدوكى فى تجهيز البيت
و انت فى اليوم ده عايزه تبقى براحتك و مرتاحه و مامتك مرتاحه و عايشه لحظات جميله من غير لخمه و اجهاد


و أخيرا بقه, الفرح الوسط و خير الأمور الوسط
زى دولفين ما وصفته كده بالضبط...تلبسى فستان أبيض طبعا و يكون فستان بسيط و انيق و محتشم ..هو يوم فى العمر..ليه تفوتى الجزء ده؟؟بلاش تلبسى أبيض بعد كده فى حياتك يا ستى
المعازيم حيقتصروا على عائلتك و عائلة سى السيد طبعا فى الأول و بعدين الناس اللى فعلا عايزين تشاركوا معاهم فرحتكوا فى اليوم ده..يعنى الناس الحلوه اه..و الشريرين لأ و سلام مربع يا جدع
المكان...ممكن قاعة صغيره و الترابيزات زى ما دولفين قالت كده
الموسيقى رقيقه و لذيذه و بيبقى حلو قوى لو فى حد تعرفوه بيعزف على عود أو جيتار أو بيغنى أو بيقول شعر و يعملكوا جو لذيذ

و فعلا أحلى أفراح حضرتها كانت كده...أجملهم كانوا عروسين على قد حالهم
واحده صاحبتنا اديتهم جنينة فيله بتاعتهم يعملوا فيها الفرح
و البوفيه واحد يعرفوه عمله لهم بسعر بسيط و البوفيه كان بسيط لكن رائع و ممكن كمان تعملوا أطباق
و جابوا سماعات و عملوا مجموعة الأغانى اللى بيحبوها و شغلناها
و بعد البوفيه طلع واحد بيعزف جيتار و واحده بتغنى أغانى اجنبى و عربى كلاسيكيه و بقينا نغنى معاهم و نعمل موسيقى بالشوك و السكاكين و الكوبايات
و العروسه كان فستانها أبيض و بسيط و كلنا كان لبسنا بسيط ..و كان فى ترابيزه على شكل حرف يو للعريس و العروسه و أهلهم و احنا كنا على ترابيزات مدوره عاديه
و طبعا اخدوا صور الفرح فى الأول و بقيت الفرح كنا احنا اللى بنصور

الفرح ابتدا تقريبا بعد العصر لحد الساعه 12 و كان احلى فرح حضرته فى حياتى

و فى الاخر نصيحه اخويه...مالكيش دعوه بالناس بما فيهم أنا...انا سمعت كلام الناس و ندمت أشد الندم
أعملى اللى انت حاسه انه حيبسطك و تبقى راضيه ربك عنه و راضيه مامتك و راضيه نفسك و سى السيد طبعا غير كده مالكيش دعوه
.. مش همه اللى حيقولولك تتبسطى ازاى و ده فرحك انت مش حد تانى
و طالما اتبسطى و كنت مرتاحه يبقى مش حيفرق معاكى كلام الناس بعد كده..و طالما انت مبسوطه يبقى ماظنش حيتكلموا
بالعكس أغلب الظن انهم حيتبسطوا جدا كمان

يارب أكون قدرت اساعدك شويه و برضو صلى استخاره
و الله المستعان يا احلى عروسه

والله اولا مبرووووووووووووووووك من هنا لغايه يوم الفرح وربنا يتمم بخير والاقي الاولاد صورهم على المنتدى هنا
ثانيا وهو الاهم ليه تدفع اكتر مادام ممكن تدفع اقل (ايه يا عم هوه تليفزيون)

شوفي انا بالنسبه لي مقدرش اقول اكتر من اللي قالوه الشباب هنا ابدا وكل الاراء احسن من بعضها وانا مع رأي سمسمه تقريبا ومحدش قاللك ترقصي الناس حتتكفل بكل حاجه اصلا الناس بتكون جايه علشان الاكل في الفرح عموما
واخيرا ربنا يتمم بخير
وبالمناسبه انا مش بشارك كتير في المنتدى لأني بره مصر من اكتر من سنه وسلامي لكل اعضاء المنتدى وحابلغكم برجوعي اول ما اجي وانا اللي حعمل فرح
كلكم معزومين فيه لأني بفكر انزل ادور على عروسه واتجوز بقى واخلص

ربنا يخليكي يا سمسه يا حبيبتي ...باذن الله النهرده هصلى الاستخارة وربنا يتمم على خير ..بس يعني لازم فستان ابيض يا سيسامي مينفعش اسود يعني عشان ابان ارفع شويه ههههههه بجد ربنا يخليكم ليا حقيقي ما خاب من استشار

aymon2009 كتب:والله اولا مبرووووووووووووووووك من هنا لغايه يوم الفرح وربنا يتمم بخير والاقي الاولاد صورهم على المنتدى هنا
ثانيا وهو الاهم ليه تدفع اكتر مادام ممكن تدفع اقل (ايه يا عم هوه تليفزيون)

شوفي انا بالنسبه لي مقدرش اقول اكتر من اللي قالوه الشباب هنا ابدا وكل الاراء احسن من بعضها وانا مع رأي سمسمه تقريبا ومحدش قاللك ترقصي الناس حتتكفل بكل حاجه اصلا الناس بتكون جايه علشان الاكل في الفرح عموما
واخيرا ربنا يتمم بخير
وبالمناسبه انا مش بشارك كتير في المنتدى لأني بره مصر من اكتر من سنه وسلامي لكل اعضاء المنتدى وحابلغكم برجوعي اول ما اجي وانا اللي حعمل فرح
كلكم معزومين فيه لأني بفكر انزل ادور على عروسه واتجوز بقى واخلص

وانا بقول انت مختفى فين؟؟؟ ربنا يوفقكم وان شاء الله ترجع بالسلامه وتلاقى العروسه الي انت عايزها

لازمان و حتما يكون أبيض يا ست العرايس
علما بأن الأبيض ده درجات...واخدالى بالك انت؟؟
و الرك على الموديل يا مزمازيل

ثم ان انت اساسا سمباتيك يا بنتى و زى القمر ..سيبك بقه من الهس هس اللى عندنا ده
شوية المشى اللى بتعمليهم دول و الهده بتاعة التجهيز حتظبتك..لا تقلقى بتاتا

يوم الجمعة ان شاء الله هقولكم هيحصل ايه بالضبط... ولو معملتش فرح هعمله هنا معاكم ايه رايكم

قمورة بصراحة بكل صراحة انا مش مبسوطة من الناحية النفسية اللي انتي مقدمة بيها علي يوم خاص جدا في حياة كل بنت
حتي لو كان الجواز هيتم بطريقة تقليدية


اولا موضوع ان الفستان يكون الوان ده صعب جداااااا
كده صفة العروسة اصبح مش موجود
واكيد هحط نفسي مكان والدتك اللي بتحلم تشوف زهرتها باللون الابيض

وهحط نفسي مكان والدتك اللي عايزة تفرح وتقول للدنيا ده فرح بنتي افرحوا معايا
وعايزة اقولك اني مريت بنفس الشعور يوم فرح كريم عن نفسي عزمت الدنيا
وحسيت اد ايه الناس فرحانة معانا ولينا


يا قمورة الطبيعي بتاع الناس هي الرغي
في جميع الحالات هيكون فيه قيل وقال سواء اتعمل فرح كبير او صغير او علي الضيق
والنقطة دي هي اخر حاجة ممكن تفكري فيها
لانه عمره ما هينتهي

فيه مثل فرنساوي انا بحبه اوي
بيقول البساطة تصنع الجمال
ممكن يكون فستانك وتسريحتك ومكياجك فيهم رقة مع بساطة
مع فرحة جواكي ودي اهم ما في الموضوع لانها هتخليكي شايفة ان فرحك اجمل فرح
وهتفرحي بعريسك وتفرحوا انتوا الاتنين بفرحة الاهل والاصدقاء حواليكم




بالعكس يا قمر خجلك وخجل عريسك هيدوب مع فرحة الناس بيكم وحواليكم
وبالعكس هيقرب ما بينكم في اليوم ده بشعور خاص وانتوا وسط الناس

ممكن لو الليلة مرت بهدوء زيادة عن اللزوم يكون اثرها مش محبب بقية ايام العمر
اعتقد هيكون فيه احساس بالوحدة يتحس بيها بعدين

جميل ان العروسة اليوم ده بفستانهاالابيض تحس وسط حبايبها وقدام عريسها انها ملكة

قمورة اوعي تنسي انك بايدك وبقلبك وبعقلك هتصنعي فرحتك مش بعندك

طبعا انا بقولك الكلام ده لانك بنوتي ويهمني جدا انك تفرحي وتفرحي عريسك وتفرحي والدتك
كل شيء بالمعقول جميل
لكن موضوع انك تعملي اللي انتي عايزاه وملكيش دعوة بحد انا مش معاه
احنا مش عايشين لوحدنا يعني لازم نرضي جميع الاطراف
حتي لو جينا علي نفسنا شوية

ربنا يوفقك ويفرح قلبك يا عروستنا وعقبال كل عرايس وعرسان المنتدي

قمر انا زى فيرى بالظبط نفس الإحساس اللى وصلنى من كلامك عن يوم فرحك
ليه زعلانة اوى كده ... يا بنتى اصحى كل يوم زغرتى وصقفى وطبلى واعملى انتى من دلوقتى ليالى افراح ... فعلا لما من جواكى حتحسى بالفرحه حتظهر على بشرتك وتخليكى اجمل واجمل .. وكمان هو احنا كتفناكى وغصبنا عليكى لازما ولا بد تتجوزى خطيبك وإلا حنحرمك من الميراث

سواء عملتى فرح او لا لازم تعملى معانا هنا فرح يا رتنى ساكنه جنبك

كنت جيت لك وجبت معايا الفرقة النحاسية بقيادة المايسترو هشام سحاب

وعلى البونجز اخينا الفاضل سئ سئ اللى شايفنى على الهوت ميل ومش عايز

يدحرج السلام ، ومعانا مطربة الرقة والإحساس فيرى وحتقدم لنا أغنية

" انا بحب كل الناس حتى ولو قطعو كل الناس "

ومعانا مصوراتى الحفل الساهر لارنو

ومعنا ايضا صاحبة الإحساسات المرهفة سيسامى بس لازم الاول ترشيها بدبدوب هدية
اما انا ومواضيع حنكون مسئولين عن النقطه


واخيرا اهديى لك اغنية
قمورة سنيورة خطبوها دسته " وكلمة تانيه مش عارفها "
قالت انا عيزة حبيبى ده حبيبى جميل الصورة
عيزاه عيزاه ولا عيزة سواه تمممممم تم تممممممممم تمممممممم

سبحان الله ازاي وصلكم احساسي انا مش سعيده كانه واجب لازم يتعمل وخلاص

قمورة اسمعي كلام ايمي افرحي واوعي تسمعي كلام الناس اللي بتغني وتقول







قوليلهم ومهما نتعب نقول تعب الحبيب راحة

ههههههه بجد ضحكتيني يا ماما

و بعدين وصلتى لايه يا عروسه يا جميله؟؟