الضريبة على العقارات المبنية

من أطرف ما تعيشه مصر هذه الأيام..
هو الضريبة على العقارات المبنية..
والتي لابد من تقديم الإقرار عنها قبل نهاية العام الحالي ..

وبالطبع ..
تم طبع 27 مليون استمارة ..
وقد نفذت جميعها..
في حين لم يتم استلام سوى 2 مليون ونصف استمارة فقط..
بينما لم يزل حوالى 25 مليون ونصف مواطن لم يقدموا الاقرار الذي استلموه..
وبالطبع يوجد الملايين الذين لم يسحبوا الاستمارة ولم يقدموها ..
وباقي على الزمن المتبقي أقل من ثلاثة أسابيع ..

والطريف أن القانون مبهم ..
بمعنى.. هل يمكننى تقديمه بالبريد العادى؟
هل يمكنني تقديمه بالانترنت؟

وإن كان كذلك.. فكيف وموقع وزارة المالية لا يعمل!!
وإن كان كذلك.. لماذا مكتوب في الاقرار السؤال عن صفة مقدم الاقرار القانونية بالنسبة للمالك؟

وماذا يفعل العبدلله الذي يملك وحدة سكنية في القاهرة ولكنه يعيش في الخارج؟
وماذا يفعل المواطن الغلبان الذي فوجئ بأنه وارث لشقة عن والده أو جده..
وفجأة أصبح مطالب بسداد ضريبة عليها وهو مرتبه لا يكفيه العيش؟

يا تري..
اللى عمل القانون دا عاقل والمستمع مجنون يعني ولا ايه؟

غالباً الإثنين (المتحدث والمستمع) مجانين

الحاج بطرس غالى، مهندس ميزانية مصر، هو أنجح وزير فى الحكومة دون منازع، لأنه أكثر واحد "دايس" بقراراته التى تخدم سياسات الحكومة، دون النظر لأى إعتبارات من أى نوع .. مطلوب منه ملئ خزانة الدولة بأى ثمن، فبيشتغل الله ينور .. بيع، تخصيص، ضرائب، رفع أسعار، فرض رسوم، لعب فى المعاشات، لعب بالتلات ورقات وفى المقابل، تخفيض ميزانية التعليم، والزراعة والبحث العلمى وكله كله .. مش مهم إزاى يملأ خزانة الدولة، المهم تمتلئ، وماذا سيحدث غداً أو بعد ساعة؟
مش مهم .. إحنا ولاد النهاردة

فما جاتش على الضريبة العقارية يا عم سمارت ..
لازم نضحى بالأب والأم والجنين علشان الحكومة تعيش

تشتكى إنت، وأشتكى أنا والناس كلها تشتكى!!
وإيه يعنى؟ طــــــظ .. فيا وفيك وفى الناس .. الحكومة هى الأبقى

بس أنا متفائل ..
كلها سنة وشوية، والناس حتنتخب المعارضة فى مجلس الشعب والشورى، وحتنتخب رئيس تانى وكل القوانين الهبلة دى حتتغير 

عقلي الباطن: ما تعشمش سمارت يا إتش، إبقى قابلنى لو حصل أى تغيير

سمارت فيك الخير والله ...أنا كنت عايزه أفتح الموضوع ده من كام يوم
كل ما أجى أكتب الاقى نفسى بكلم نفسى و مش فاهمه حاجه..ده بجد والا ده برنامج الكاميرا الخفية
و فى الاخر باتنرفز و أقفل....

المصيبة انى شفت بعينى محدش قاللى...شفت بطرس غالى باشا فى برنامج 90 دقيقة يتحدث عن اخر اختراعاته و مش حلاقى تعليق ابلغ من اللى والده قالهوله و هو ناشره بكل فخر و اعتزاز...والده قاله:ايه اللى انت بتهببه ده يا يوسف؟؟!

من التعليقات المستفزه جدا....لما سفير على المعاش بيقوله ان الشقه اللى ساكن فيها جابها بعد سنين من العمل و دلوقتى هو على المعاش و معهوش يدفع الضريبه عليها..يعمل ايه؟

ببساطه شديده قاله يسكن على قده ! يعزل فى شقه تانيه على قده !!

واحد تانى عنده شكوه شبيهه...قاله يقدم شهادة فقر للشؤن الاجتماعيه و همه يبقوا يدفعوا له الضريبه !!

أنا طبعا بتفرج و جالى الضغط و السكر..و نفسى اعرف ايه اللى جاب البحر جنب القلعة؟؟!!

الطبقه الغالبه فى مصر ..نقول مجازا انها الطبقة المتوسطه زى الاحصاءات ما بتقول مش الفقيرة و شديدة الفقر...قاللك طب و ده اسمه كلام...لازم الشعب كله يبقى تحت خط الفقر احقاقا للحق و امعانا فى المساواة بين ابناء الشعب الواحد..يبقى الحل.الضريبة العقارية.

القانون ده بيقضى على الطبقة المتوسطه.
الناس حتشترى شقق ليه طالما حيفضل يدفع عليها ضريبه مدى الحياة كأنه مأجرها.
أموت وأعرف بيودوا فلوس الضرايب دى فين؟؟ الا ما فى حد بياكل ولا يتعالج و لا يتعلم ولا يركب مواصلات ولا أى حاجه ادميه هنا....

انت يا سمارت تعمل فيها اجنبى و كأنك ماسمعتش عن الضريبه دى ...واحنا مش حانفتح بقنا

الفكرة أن أصل الضريبة أنها تفرض على المنفعة ..
يعنى لما ابيع حاجة واستنفع بفلوسها ..
يبقى لازم أدفع ضريبة..

لماأشترى حاجة واستنفع بيها..
يبقى أدفع ضريبة..

لكن انا عندى شقة تمليك..
يقوم يفرض عليها ضريبة بأثر رجعي؟؟؟؟

وبعدين..
لما هو القانون كان بيناقش في مجلس الشعب..
إزاى النواب اللى انتخبناهم وافقوا؟؟

وبعدين كمان ..
مش أسهل من أن الـ 80 مليون مصري يروحوا يقدموا اقرار ضريبي وبعدين يطلع ان 90% منهم معفى..
الأسهل كان أن المصلحة هي اللى تبلغ أصحاب العقارات المستحقة للضريبة بدل البهدلة دى؟

أو يسهلوها ويخلوها بالبريد أو بالانترنت ..
وحتى للمغتربين .. ما يخلوا السفارات المصرية تقوم بالمهمة ..


حاجة آخر هبل بصراحة ..
بصراحة نفسي الناس ماتسكتش ..
لأن كدة بقى كتير أوى ..