فيديو يؤكد تلفيق التهمة للمتهمة بقتل هبة ونادين

«المصرى اليوم» تنشر «فيديو» معاينة قضية «هبة ونادين» قبل المونتاج

كتب شيماء القرنشاوى وفاروق الدسوقى ومصطفى المرصفاوى ١٢/ ٣/ ٢٠٠٩

حصلت «المصرى اليوم» على نسخة من أسطوانة الفيديو «سى دى» التى قدمها دفاع المتهم بقتل «هبة ونادين» إلى هيئة المحكمة خلال جلسة الأمس، معتبراً أنها تمثل دليلاً دامغاً على براءة المتهم محمود عيساوى، على اعتبار أن الفيديو «قبل المونتاج».
تتضمن الأسطوانة ٥ مشاهد من المعاينة التصويرية التى أجرتها النيابة لموقع الجريمة، إضافة إلى حوارات بين أحد ممثلى فريق النيابة والمتهم، أثناء سرده تفاصيل ارتكاب جريمة السطو على الفيلا.
ويتضح من نسخة الفيديو أن المتهم لم يكن قادراً أثناء سرده على تذكر تفاصيل الجريمة، لذا ظهر صوت أحد ممثلى فريق النيابة يذكره دائماً بما ينساه، ويقول صاحب الصوت: «أنا مش عايز صوتى يطلع خالص فى المونتاج».
وعندما بدأ المتهم فى السرد، قاطعه الصوت: «إيه يا محمود إنت هتصحى وتصحصح وللا أخلى حد يصحصحك».. ويضيف: «عايزك تحكى اللى حكيته هناك فى النيابة، يعنى لا ينفع تزود ولا تنقص» ويقول فى موضع آخر: «ياللا وإنت عارف كويس إحنا قلنا إيه هناك.. بقالنا ٨ ساعات عمالين نعيد ونزيد

رابط الفيديو أفضل مشاهدة على الإكسبلورر:

http://www.almasry-alyoum.com/files/hebaaa.wmv

الفيديو فيه حاجات كتير وكلام ضد بعضه مش مفهوم.

لمزيد من التفاصيل:

http://www.almasry-alyoum.com/article2.aspx?ArticleID=202493

الفيديو المعروض اتضح إنه مش كامل؛ الحوار كامل كان كالآتي:

«المصري اليوم» تنشر تفريغ «سى دى» معاينة النيابة قبل المونتاج

كتب شيماء القرنشاوى وفاروق الدسوقى ومصطفى المرصفاوى ١٢/ ٣/ ٢٠٠٩

حصلت «المصرى اليوم» على الـ«سى دى» الذى قدمه دفاع المتهم فى قضية «هبة ونادين» للمحكمة فى جلسة أمس، والذى تضمن مشاهد كاملة للمعاينة التصويرية التى قامت بها النيابة للجريمة قبل إجراء مونتاج بها. يتضمن الـ«سى دى» مشاهد للمتهم محمود عيساوى وهو يروى تفاصيل الجريمة وسط حراسة أمنية مشددة من قبل ضباط مباحث ٦ أكتوبر فى حضور وائل صبرى، مدير نيابة حوادث جنوب الجيزة، الذى أجرى المعاينة التصويرية للجريمة فى موقع الحادث بشقة المجنى عليها الثانية نادين خالد فى حى الندى بمنطقة الشيخ زايد. السطور التالية تحمل نص الحوار الذى دار فى المعاينة بين المتهم والحاضرين من رجال المباحث وممثل النيابة، كما حمله الـ«سى دى» الذى قدمه الدفاع للمحكمة، وضم ٥ مشاهد متقطعة للمعاينة.
المشهد الأول: ومدته ٤ ثوان ظهرت فيه صورة لشرفة الشقة التى وقعت بها الجريمة وليس به أى أصوات.
المشهد الثانى: مدته ٦ دقائق و٢٧ ثانية، بدأ بظهور المتهم وسط حراسة أفراد الأمن وصوت لأحد الأشخاص يقول للمتهم: «لأ حنا ابتدينا إيه».. ثم يوجه حديثه للمصور: «إنت هتعمل معايا مونتاج عشان أنا مش عاوز صوتى يطلع خالص»، ويكمل الصوت حديثه للمتهم: «انت هتبتدى معايا إنك كنت بتمر بضائقة مالية، وإنك قابلت أصحابك اللى بيشربوا مخدرات اللى هم السو دول، وقالولك إسرق الصاج.. مش كده.. مش انت حاكيت لنا الحاجات دى كلها.. كمل بقى ياللا.
المتهم يومىء برأسه ويقول: «آه.. جم بقى أصحابى اللى فى السبتية.. وجت عليا أيام مريت بأزمة مالية، قالولى خد لك حتة من الصاج ده قولتلهم لأ المهم جيت هنا بقى» فقاطعه صوت الشخص: «لأ استنى استنى.. ها وبعدين بعد ما قالولك إسرق الصاج: قالولك إيه.. قالولك اطلع على ٦ أكتوبر.. مش انت حاكيت على الفلل اللى كنت بتركب فيها مش عارف إيه.. انت إيه بقى يامحمود هتصحى وتصحصح ولا أخلى حدد يصحصحك».. تتداخل الأصوات ثم يظهر الصوت نفسه مرة أخرى: «اللى انت حاكيتوهولنا يا محمود هنا» المتهم: «مش انت عايز اللى هنا ياباشا».
الصوت نفسه: «لأ أنا مش عايز اللى هنا.. أنا عاوز من أول اللى حاكيتهولنا بالتفصيل وزى ما حاكيته للنيابة.. واللى ثبت على لسانك فى الورق».
صوت آخر: «اللى حاكيته هناك بالضبط يعنى لا ينفع تزود ولا تنقص، وأى حاجة زيادة افتكرتها دلوقتى ما تقولهاش.. انت تقول اللى إحنا سألناك هناك فيه وانت جاوبت عليه.. أى حاجة زيادة عن كده حبيت تغير رأيك فيها افتكرتها ما تقولهاش خالص متجبش سيرتها نهائى.. فهمت.. اللى إحنا قولناه هناك بس».
الصوت الأول: «ياللا.. وانت عارف كويس اللى إحنا قولناه هناك إيه.. بقالنا ٨ ساعات اللى إحنا قولناه هناك ده عمالين نعيد ونزيد فيه، ولا تنقصه ولا تزوده».
صوت ثالث هادئ: «أيوه بس المكان ممكن يفكره بحاجة يقولها» أصوات متداخلة: «ماشى.. أوكيه».
المتهم: «أصحابى دول قالولى شفلك طرد صاج، قولتلهم لأ.. قالولى خلاص شفلك فيلا واضربها».
الصوت الأول: «فيللا فين»
المتهم: «فى ٦ أكتوبر».
الصوت نفسه: «اشمعنى ٦ أكتوبر»
المتهم: «عشان هى دى اللى مليانة فيلل هناك وعماير وشقق»
الصوت: «تمام».
المتهم: «طلعت على كوبرى ١٥ مايو، وقمت راكب عربية ٦ أكتوبر».
الصوت: لأ.. الأول اشتريت إيه.. اشتريت إيه الأول».
المتهم: «السكينة.. اشتريت السكينة».
الصوت: «منين».
المتهم: «من السبتية من واحد بياع ماشى بتروسيكل».
الصوت: «بكام».
المتهم: بـ«١٥ جنيه».
الصوت: «شكلها إيه».
المتهم: اليد بتاعتها سوده، يقاطعه الصوت أيوه. ويكمل المتهم: لميع، ثم الصوت: النصل بتاعها كبير ولا صغير. المتهم: لأ صغير، وبعدين أخذتها حطتها فى شنطة وطلعت ركبت عربية.. يقاطعه الصوت: إنت قلت صغير فى التحقيق؟، المتهم: لأ كبير.. الصوت: طب ما تصحصح بقى.
المتهم: مش فاكر برضه. وطلعت ركبت عربية من فوق كوبرى ١٥ مايو وبعدين نزلت هنا، كانت حوالى الساعة ١١.٣٠، فضلت أمشى أمشى لحد ما جيت هنا.
ـ يشير للعمارة التى وقعت بها الجريمة ـ كانت الساعة بقت ٤.
الصوت: كنت ماشى بتدور على إيه بقى.
المتهم: فضلت ماشى لحد ما رجليه جابتنى هنا.
الصوت: أيوه يعنى ماشى بتدور على إيه.. على فيلا.. ولا على إيه؟
المتهم: أيوه على فيلا.
الصوت: طيب ما تقول.. كنت بدور على فيلا عشان أسرقها.
المتهم: وجيت أدام الفيلا دى ووقفت قصادها عشان أسرقها.. وفضلت قاعد من الساعة ٤ لحد الساعة ٨ بالليل.
الصوت: قلعت الجذمة الأول.
المتهم يحرك رأسه بالنفى.
الصوت: مقلعتش الجذمة.. طيب تمام، نطيت من بره يعنى؟
المتهم آه.. متلخبطنيش بقى.. يبتسم الحرس، ثم يقول الصوت: طيب حاضر أنا آسف.
المتهم: رحت قاعد شوية، وقعدت عند الحوض، ورحت قالع الجذمة، كانت جت الساعة ١٠ كده ولا ١١، قمت طالع وقمت ناطت الساعة بقت ١١، هما البنتين كانوا صاحيين كانوا قاعدين جوه، قمت واقف ورا الستارة كده بتاع ساعة.
الصوت: طلعت إزاى.
المتهم: طلعت بقى من على الشباك الحديد.. طلعت ونطيت ووقفت ورا الستارة، طبعاً هما البنتين كانوا صاحيين، فقلت سيبهم لحد ما يناموا، وفضلت واقف لحد الساعة ١٢ كده، كانوا البنتين دخلوا ناموا.. دى كانت دخلت نامت ودى كانت دخلت نامت. يتوقف المتهم عن الكلام.. ثوان ثم يقول: «نسيت».
يعاود الكلام مرة أخرى: بعد كده البنت الثانية اللى هية دخلت الأوضه تنام دى.. طبعاً أنا كنت خدت الـ ٢٠٠ جنيه.
صوت آخر: ٢٠٠ ولا ٤٠٠؟
المتهم: ٤٠٠، هما معلهش مرة بيجوا معايا ٢٠٠ ومرة ٤٠٠، زى ما حصل كده لما كنت عند حضرتك.
المتهم: وبعد كده البنت دى لما قامت زعقت..طبعاً ما كنتش عارف، أنا كنت جاى أسرق سريقة على قدى.
الصوت نفسه: إحنا قلنا إيه.
المتهم: أنا قلتلك لو افتكرت حاجة هاقولها.. وينتهى المقطع الثانى.
المقطع الثالث: مدته ٨ ثوان داخل الشقة مسرح الجريمة تظهر به أصوات تقول «اتفضلوا لو سمحتوا».
المقطع الرابع: مدته دقيقة و٥٤ ثانية، ويظهر فيه المتهم وسط حراسته أسفل شرفة الشقة، مشيراً إليها، وهو يقول: أنا حطتهم هنا، بس طلعت فوق مع الهزة راحوا واقعين بقى، مبصتش عليهم. ثم يقف المتهم أمام ممثل النيابة الذى يملى ما يقوله المتهم على سكرتير التحقيق، حيث قال: «كان معاه المحمول والسكينة.. كان معاك إيه تانى؟»، المتهم: بس.
ممثل النيابة: نزلت بكام محمول من فوق، المتهم: ما الموبايل الثانى كان فى جيبى، ممثل النيابة: يعنى إنت نزلت بموبايلين وسكينة، واحد كان فى جيبك، والموبايل والسكينة، كانوا فى إيديك.. تمام.
المتهم: تمام.
ممثل النيابة: وصلت لغاية هناك كده، إيه اللى خلاك سبت الموبايل والسكينة على الـ...، المتهم: عشان أطلع، ممثل النيابة: ما إنت كان ممكن تحط الموبايل الثانى فى جيبك.. المتهم: والسكينة، هما دول كانوا فى إيدى بقى ما فكرتش بقى إنى أحط الموبايل اللى فى إيدى.
ممثل النيابة: سندت بقى على الكابل بتاع الكهربا عشان تعرف تسقط عليه وبعدين نزلت ع الشارع.
المتهم: بالضبط.
صوت: قول بقى اللى أنا قولته عشان المعاينة.
المتهم يكرر وصف نزوله من شرفة الشقة.. ثم يلتفت إلى أفراد الحرس قائلاً: فين الهدوم.
أصوات متداخله: هنجيبلك الهدوم.
المتهم: هاخدهم بقى لحسن عملوا معايا حوار ابن ..... فوق، ثم يبتسم وضباط المباحث والحرس، ويهمس أحد الأشخاص فى أذن المتهم ويبتسم الاثنان.. وينتهى المقطع.
المقطع الخامس والأخير: مدته دقيقة و٢٨ ثانية عبارة عن لقطات من داخل الشقة موقع الحادث فى الغرف، وآثار الدماء على الأثاث دون أصوات تتحدث، ولا يظهر فيه المتهم.