الحجاب: هل هو ظاهرة؟

aniD كتب:

اتمني تكون الصوره دي اتغيرت في السنه اللي انا غبت فيها عن مصر

طبعااااا اتغيرت بقت أوحش

لا حول ولا قوه الا بالله ربنا يرحمنا برحمته

اكييييييييد يا لارنو القضية عمرالاختلاف فيها ما يعمل فورتينة او ياثر في الود
وده ميزة التحاور مع مجموعة متافهمة ...مع اختلافاتها

علي فكرة يا انيد لو قريتي كلامي تاني هتلاقي نفس معني كلامك
كتبت ان المسلمة بتعاني من نوعية تمييز وادانة زي المسيحية
كلامي المقصود بيه المجتمع ككل
مش حساسية خالص بس يمكن انتوا مش بتسمعوا وتشوفوا كتير
علي فكرة الندوات اللي بحضرها لنخبة مثقفة وزراء وصحفيين ودبلوماسيين
اغلبها مسلمين
وبيناقشوا حالة الفوران والانقسام في مجتمعنا ككل

يعني سعادتك متفقين علي المضمون :)

دفء انا مش عارفة انت كنتي فين غايبة عننا من زمان :#~€:

larno كتب:مصريه، انيد، فري
طبعا الاختلاف في وجهات النظر لا يفسد للود قضيه ولا ايه
انا مش باقول ان النصح يبقي فيه غلظه، لازم يبقي باللين وكل الي انتو قلتوه ده صح، بس الفكرة ان حتي لو حد قالي نصيحه بطريقه وحشه او جامده، لازم انا من جوايا اكون مقتنعه ان ده لمصلحتي
حكايه بقي ان الواحده تتحجب لما تقتنع ....دي انا مش قادرة اقتنع بيها خالص
علشان لازم ننفرق بين الفروض و الطاعات
لما البنت تتحجب وهي مش مقتنعه بتثاب علي تأديه فرض من الفروض، وطول ماهي مش محجبه بتاخد ذنوب، والي اتحجبت علشان سمعت شريط و بعد فترة قلعت الحجاب، طب ماهي لما لبسته ساعه ماسمعت الشرط اقتنعت بيه،بس بعد كده شالته علشان مش مقتنعه بيه ؟؟ ولا علشان شهوة الحياه ؟
طب ينفع نقول الكلام ه في الصلاه ؟ مش هي احد الفروض برضو ؟ ينفع حد يقول انا مش هاصلي الا لما احب الصلاه ؟؟

طبعا يا لارنو الاختلاف في وجهات النظر لا يفسد للود قضية

هي بس الفكرة إننا دلوقتي بقينا في دنيا مليانة فتن ومغريات ووصلنا لزمن القابض فيه على دينه كالقابض على جمر من النار، وعلشان نقدر نساعد البنات إنهم يتخطوا المغريات دي ويتمسكوا بدينهم لازم يكون في اقتناع بكل خطوة بيعملوها.
مبقاش ينفع في زمن الفضائيات والنت إننا نقول لبنت حتتحجبي يعني حتتحبي غصب عنك، لإنها حتعمل كده من برة أو من قدامنا لكن جواها هي مش محجبة ومش بس كده هي ممكن كمان تكره الحجاب ونبقى بدل ما ساعدناها قضينا عليها.
في دول ما ينفعش تمشي فيها من غير حجاب، ولإنه فرض وواجب بتلاقي كتير من بنات الدول دي أول ما يخرجوا برة يلبسوا حاجات ملهاش علاقة بأقل قواعد الاحتشام، وتلاقي نسبة الفساد الأخلاقي والانحرافات الأخلاقية في المجتمع كبيرة جدا نسبيا.
ده كله بسبب الفرض الغير الواعي.

وهنا القصد من إن الحجاب في وقتنا الحالي بقى لازم يكون عن اقتناع لإن المحجبة ماشية وهي رافعة علامة عن الغسلام، أي حاجة بتعملها بيترجم في الحال لأخلاق إسلامية أرادت أم لم ترد، علشان كده الحجاب بيايد مش بس في اللبس لكن في التعامل مع الناس والأخلاقيات صفة عامة، يبقى أظن إن اللي تلبسه لازم تكون أد المهمة الموكلة لها.

والله أعلم

أتفق مع كلام aniD فى المداخلتين الأخيرتين بدون أى تحفظ


ولاحظت وجود "شبهة" سوء تفاهم بين فريدة من جهة، والباقين من جهة أخرى بعد تعليقها على المنشور فى مجلة روز اليوسف .. على الأقل فى البداية.

وأعتقد أنه من الضرورى أن يحاول أحدنا التوضيح لجعل الكلام والآراء أكثر فهماً وتفهماً من كل الأطراف .. فمعلهش استحملونى شوية وأنا أحاول القيام بهذا الدور فى السطور التالية:



لو لاحظ الجميع، فغالبية المنزعجين لما يجرى فى مجتمعنا العربى عامةً والمصرى خاصةً فى هذه الفترة، من تغيرات إجتماعية حادة، ومظاهر راديكالية فى كل المجالات .. هم فى غالبيتهم من كبار السن نسبياً.
بينما المتحمسين لصالح النقيض، ولصالح بعض تلك المظاهر والسلوكيات .. هم فى غالبيتهم من مرحلة عمرية صغيرة نسبياً .. أو من نطلق عليهم لفظ: الشباب.

من هنا، رأيت حاجتنا جميعاً لفهم ظروف نشأة "الكبار"، والجو العام الذى أحاط بهم من طفولتهم وحتى عقدين ماضيين من الزمان .. ليفهم "الشباب" أسباب إمتعاضهم ونقدهم المستمر للأوضاع الحالية.


هؤلاء؛ هم من نشأوا وسط مجتمع متآلف، متوحد بكل أطيافه وقطاعاته، جمعتهم آمال وأهداف واحدة، حزنوا معاً وفرحوا معاً .. عاشوا صعود برج القاهرة للسماء كرمز لمصر الحديثة، كما عاشوا بدء البث التليفزيونى من ماسبيرو كإشارة لإرتفاع صوت مصر فى العالم. تعاونوا فى بناء السد العالى وفرض هيمنة المصريين على الفيضان وكوارثه، فجروا المناجم، شقوا الطرق، بنوا المصانع، كونوا النقابات، تبنوا مشروع محو الأمية وتعليم الكبار، تبرعوا للمدارس والجامعات ودور العبادة. انفعلوا وتفاعلوا مع أقوى نهضة ثقافية عرفتها مصر فى تاريخها كله. حافظوا على الجيرة، والعشرة، والحياة الأسرية .. كان أهل الفتاة مطمئنين إن تركوها بمفردها، لأن أولاد البلد كانوا "جدعان"، لم يخشى أحد من أى خلاف أسرى لأن يؤدى للطلاق، فهذه الكلمة لم تكن متداولة، لم يكن أحد يتذكر ديانة الآخر إلا يومى الجمعة والأحد، فالدين كان لله والوطن كان للجميع دون تفرقة، المسلم مسلم مع نفسه، والمسيحى مسيحى مع نفسه، وفى الأعياد والمناسبات يتزاورون منهنئين بسعادة حقيقية واضحة. كان الشباب يتسارع لتأدية الخدمة العسكرية لأنه شعر بأهميتها وبواجبه تجاه وطنه، كما سارعت الفتيات للخدمة العامة لنفس الدافع .. كانوا يشتركون جميعاً صباح كل يوم لسماع أخبار عائلة مرزوق، ويتجمعون مساءً يومياً كأسر وكأصدقاء لمشاهدة القاهرة والناس، وأول خميس من كل شهر موعدهم مع أم كلثوم، والمسارح القومية تعرض عليهم كل نهاية أسبوع رائعة من روائع الأدب العالمى والعربى، والأطفال كان من حظهم مسارح الجيب والعرائس والسيرك بما يعرضوه من أعمال هادفة ..

إيــــــــــــــــــــــه .. دنيا

هو جيل أو أجيال .. ظهر فيها ومنها أسماء مثل الباز وزويل، والباقورى والشعراوى وكيرلس، وجاهين ودنقل وحداد، وأم كلثوم وعبد الحليم، والجوهرى وحسن شحاتة، وعبد المنعم رياض والجمسى، ألفريد فرج ولويس عوض وسعد الدين وهبه والشرقاوى، ومصطفى محمود ويوسف إدريس ... عــــــــــــــــــــــــالم تانى خالص ... عالم لم يكن لديه وقت يضيعه فى العبث وفى الأمور الشخصية كالدين والموضة وغيرهما .. ناس تربت على أن العمل فضيلة، وأن النظافة من الإيمان، فكانت البلد نظيفة، والعمل فى كل مكان أشبه بخلية النحل .. كان من يشترى مجلة الصياد أو الشبكة أو البوردا، يصنف على أنه شخص فاضى ليس لديه ما يفعله..

هل فهم "الشباب" الآن كيف كانت مصر، وكيف تربت ونشأت الأجيال السابقة لهم مباشرة؟؟
هل عرفوا لماذا يحتجوا على كل ما نعيشه اليوم؟؟ ولماذا يستغربون تلك الظواهر الفتاكة بمجتمعنا والتى تزداد يوماً بعد يوم بشكل إضطرادى؟؟
هل يحاول أحدهم مقارنة تلك الأمثلة البسيطة جداً السابق ذكرها، بما نعيشه اليوم ليقف على حقيقة المآساة؟؟ وعلى زيف ما نحن غرقى فيه؟؟
هل نقارن أم كلثوم بهيفاء مثلاً؟؟ أم نقارن مشروع السد العالى بــــ ... بماذا؟؟ لا أجد له مقابل حالياً!!

المقارنة غير معقولة بين الحقبتين .. وأعذر جيل الشباب فى عدم إستيعابهم لما تقوله الأجيال الأكبر منهم .. فما يحكونه .. يصعب عليهم مجرد تخيله ..
لا عجب إن ظن بعضهم أنه كلام خيال فى خيال، فواقعنا البشع لا يسمح لهم حتى برفاهية هذا التخيل وتصديق أنه كان حقيقة وواقع وإختفى هكذا فجأة.

كيف لهم اليوم أن يتخيلوه؛ وهم قد نشأوا فى مجتمع نصفه تقريباً عاطلاً عن العمل؟ ومرافقه لا تصلح للإستخدام الآدمى، وحالات الإنفكاك الأسرى سواء بين الزوجين أو بين الأبوين والأبناء هى السائدة، والتعليم الذى هو أساس أى أمل .. يعتبر أفشل تعليم بين كل بلاد الأرض، والفساد هو الطبيعى، والشرف والنزاهة والجدية والأمانة والصدق والنخوة والحب .. كلها مصطلحات لا وجود لها فى واقعهم، ومن يفعل شئ منها ينال تقديراً وجائزة، وكأنه فعل المستحيل .. كيف لهم أن يتخليوه، وهم محاصرون بمدعين للأديان المختلفة، ممن يحفظون نصوصاً لا يفهمون منها شيئاً على الإطلاق .. كالحمير يحملون أسفارهم .. والمساكين من الشباب الذين لم ينالوا أى حظ فى أى تعليم جيد يجعلهم قادرين على التمييز الصحيح بين الغث والثمين من كل ما يسمعونه ويرونه .. يقعون فريسة لهؤلاء المدعين، يتلقفونهم ويشكلونهم كيفما يشاؤا، فهم فى سن التشكل مدعومين بالحماس، والحديث الدينى هو الأكثر تأثيراً فى النفوس.

وليكتمل سواد الصورة .. يجدون من جهة:
"قمص" فاسق لئيم كاذب .. لا هم له سوى تشويه الإسلام والتحريض ضده مستخدماً كل الوسائل القذرة فى حربه تلك التى أشعلها هو وأبى لها أن تخمد ..
ومن الجهة الأخرى ..
"شيخ" يدعى العلم وهو أبعد ما يكون عنه، يستغل وقاحة القمص ليظهر وقاحة مماثلة لا تعبر إلا عن ما بداخله من مرض نفسى وجهل تام بالدين الإسلامى الذى يدعى أنه يمثله، ومقت كامل للمسيحية.
ولا يجد الإثنان أى صعوبة فى حشد أتباع لهما، ولا يجدا أى موقف رادع من أولى الأمر فى الدولة، ولا من المثقفين فيها .. فيستمرا .. وتستمر الضغائن بين أهل الشعب الواحد، وتزداد الأفكار الشاذة شذوذاً
.
وكرد فعل تلقائى .. تزداد السلوكيات المتخلفة الهدامة إنتشاراً، بزعم أنها هى الدين
وكأن الدين الذى يحكم بلادنا من مئات مئات مئات السنين .. لم يكن ديناً ~~~
وكل من عاشوا على هذه الأرض طيلة ما يقرب من 1500 سنة .. لم يكونوا متدينين .. ومصيرهم جهنم وبئس المصير :QQ:
ولم نعرف الدين الصحيح إلا فى الخمسة وعشرين سنة الماضية فقط .. بفضل حضراتهم



قلتها كثيراً وسأقولها كثيراً ... الموضوع كبير .. كبيـــر .. كبيـــــر .. وربنا يستر.



أتمنى .. أن يعى كل جيل، ظروف نشأة الجيل الآخر .. ليسهل عليه فهم مرجعياته ومنطلقاته وأسباب كلامه وشكاواه ..
علنا بهذه الطريقة .. نصل إلى أقرب ما يمكن من فهم الآخر ..
بفرض أنه فعلاً آخر


وعمتم مساءً












دلوقت حأكل بيتزا صنعة إيديا وحياة عينية .. ومش حأديكو حتة :-*/+./*-:

الحقيقة أنا استمتعت أثناء قراءة رأيك في توضيح الاختلاف اللي حصل في مجتمعنا في الكام سنة اللي فاتوا واللي عملوا فجوة كبيرة بين فئات المجتمع المختلفة.

أسلوب فعلا جميل وممتع يا إتش، متغيبش علينا كتير.

عندي تعليق واحد مش عارفة لو في حد متفق معايا فيه ولا لأ.
حضرتك بتقول:

وأعذر جيل الشباب فى عدم إستيعابهم لما تقوله الأجيال الأكبر منهم .. فما يحكونه .. يصعب عليهم مجرد تخيله ..
لا عجب إن ظن بعضهم أنه كلام خيال فى خيال، فواقعنا البشع لا يسمح لهم حتى برفاهية هذا التخيل وتصديق أنه كان حقيقة وواقع وإختفى هكذا فجأة.

أفهم أن بعض الشباب قد يكونوا كما أوضحت، لكن لا أظن أن كل جيل الشباب ينطبق عليهم ذلك، لأن هناك من يسمعون من أهلهم أو الأكبر سنا أو لديهم بعض القدرة على المقارنة والتحليل بين الماضي والحاضر والذي قد يستدلون عليه بالأفلام القديمة مثلا باعتبارها أحد الطرق لبيان حال المجتمع في فترة زمنية معينة.

مش عارفة قصدي واضح ولا محتاجة أوضح أكتر.

أتمنى .. أن يعى كل جيل، ظروف نشأة الجيل الآخر .. ليسهل عليه فهم مرجعياته ومنطلقاته وأسباب كلامه وشكاواه ..
علنا بهذه الطريقة .. نصل إلى أقرب ما يمكن من فهم الآخر ..
بفرض أنه فعلاً آخر

هشام بشارك مصرية ومشاعر في الاعجاب بمداخلتك

عن نفسي عبرت بطريقة منظمة في وصف ماذا نتفتقد وبماذا نطالب ولماذا نحزن الان

اشكرك بشدة علي كلماتك القوية

انا عايزاكو تعترفوا ...مين فيكو عامللى عمل؟؟ كل ما أفكر بس أكتب فى الموضوع , فى حاجه تحصل و تعطلنى ~~~

المهم...
أنا مش حطول كتير فى موضوع الحجاب فى حد ذاته لان أنتم ما شاء الله مغطيين الموضوع..فحقول نبذه بس و انقل بعد كده على النقطه اللى عايزه
الفت انتباهكم لها ..

مبدئيا اعتقد أن الحياء من الفطرة السليمة للانسان.و ان الأصل هو طلب الستر.تماما كما حدث مع ادم و حواء فى بداية الخلق.
و حتى قبل ان يفرض الحجاب, كانت النساء قديما يلبسن ما يستر أكثر مما يكشف بل ان بعضهن فى مناطق معينه و حضارات معينه كن يلبسن طبقات من الملابس.
و بالحضارات أقصد الحضارات الشرقيه و الغربيه و غيرهم..
اذا دائما ما يبدو لى أن مفهوم الاحتجاب و الأحتشام متمشيا تماما مع طبيعتنا البشريه عامه و طبيعة المرأة خاصة.

و الحجاب كما أفهمه على الأقل هو السلوك و المظهر العام الذى يحفظ للمرأة كرامتها و أحترام الاخرين لها و يقيها أنظار الذين فى قلوبهم مرض.
و بالتالى ما لا يؤدى هذا الغرض لا يعتبر حجاب "بالمعنى الصحيح له".

و الحجاب طبعا فرض لا خلاف عليه و لكن حتى تصل الفتاة لتأدية هذا الفرض عندما تكون مكلفه و عن أقتناع, يجب أن يبدأ بترسيخ معانى الحجاب مثل احترام الذات و الثقه بالنفس , العفاف
و ترسيخ اهمية أرضاء الله .

اما عن أسباب أنتشار الحجاب بصوره لا تمت للحجاب بصله هى اسباب كثيره و قد تكون مركبه.
منها أن أغلب الفتيات يردن الحجاب و لكن أيضا لا يردن ان يتخلين عن أسلوبهن فى اللبس قبل الحجاب, فهو ما تعودن عليه.
و منهن من تريد "الحجاب" و لكن فى نفس الوقت تسعى للفت أنظار الشباب !!! (أنظار الشباب الغير محترمه )
هناك من ترتدى الحجاب لان خطيبها قالها تعمل كده..و هناك من تنتظر حتى تجد من يتزوجها و يشوف شعرها ثم تتحجب
و هناك من ترتدى الحجاب ظنا انها ستجد عريس بهذه الطريقه..
و منهن من تتحجب بمظهر لائق ثم تتعرض لضغط صديقاتها فى انها لازم تغير" الستايل" بتاعها...
و منهن من تخاف من العنوسه و بدل ماكانت متحجبه كويس..تبتدى مثلا تطلع القصه من تحت الطرحه و المناظر دى...خصوصا لما مثلا حد يتقدملها أو يكون عايز يتقدملها و يطلب و يلح عليها توريه شعرها..
ده بسميه حجاب تايوانى

و كتير بقول طب ماهو حاجه احسن من لا شىء و بعدين ربنا يدى كل واحده على قد نيتها لكن برجع أقول طب ماهو ده بيسوأ صورة الحجاب و بيضيع معناه..


لكن بشوف عشان نجابه ظاهرة الحجاب التايوانى...
أن كل ما واحده تتمسك أكتر بالحجاب الصحيح و كل ما عدد المتمسكين كتر,,الباقى حيتبع. اللى بيحصل دلوقتى هو العكس و المفروض نرجع التيار للصح تانى.


بالنسبه بقه لمداخلة فريده..

بصى يا فروتوس فى كل زمان و مكان....أكيد فيه التيار المتشدد, و التيار المعتدل و التيار المنحل.
أنت شايفه و اللى تعرفيهم شايفين أن التيار المتعصب و المتشدد ده شادد حيله و هو ده اللى ماشى اليومين دول..و ده عن تجربتك و تجارب اللى تعرفيهم و أكيد انا شفت تجارب
خصوصا لما بعض مسلمين بيدعو لحاجه معينه بطريقه منفره...
لكن فى نفس الوقت أنا و بعض اللى أعرفهم بتعرضوا لمضايقات و تعسف و تفرقه بسبب الحجاب بل فيه حملات كامله و قويه ضد الحجاب..
مثلا.. فى اماكن عمل لم امنح فيها مقابله شخصية فقط لأنى محجبه و اتقالتلى صراحه فى وشى.. و مكنتش بقدم فى التليفزيون..
دى كانت بنوك و مره فى الفور سيزونز..برضه مكنتش بقدم على وظيفه تحتاج شكل معين..دى كانت حسابات و back office .

طيب بلاش الوظايف..خلينا فى الناس اللى حوالينا..
سمعت من ناس "ايه اللى حطينو فوق راسكو ده؟ ده بيكتموا بيه القمل " أو تعليق زى..شيلو اللى فوق راسكو ده بدل ماهو كاتم على أفكاركو و كلام كتير زى ده
ده غير النظرات اللى تحسسك انك جايه من كوكب تانى..

و بلاش الحجاب...انت تعرفى أن فيه أماكن حكوميه و أماكن تبع الجيش بتمنع دخول اللى عندهم دقن؟؟ الملتحين يعنى
و اعرف واحد و راجل وقور و كبير فى السن و سافر من اسكندريه للقاهره عشان يجيب ورق معين من مؤسسه تبع الجيش و رفضوا يدخلوه يقابل المختص !!

لكن فى الاخر سواء الناس دى او دى ..مش همه دول الغالبيه العظمى..على الأقل لحد دلوقتى..لكن دول التيارات المختلفه اللى بتبقى موجوده فى أى مجتمع..صحرا ان كان أو بستان..

صحيح بتضايق و بحس انى فى بلد غريبه لكن برجع أفكر نفسى أن ده موجود لكن لا يلغى الغالبيه الكويسه.

أوقات لما بتكلم مع أجانب أقصد ناس مش مصريين، بيسألوا حاجات عن الإسلام، ودايما الحمد لله بلقي الإجابات اللي أرد بها وتقنعهم.

لكن السؤال الوحيد اللي مش بيقتنعوا بأي إجابات عليه بيكون عن الحجاب. محدش عنده إجابة على السؤال ده:

لماذا الحجاب فرض؟
ماهي الحكمة من ورائه؟

أنا الحقيقة بجاوب باللي فاهماه ومقتنعة به، إن المرأة في الإسلام جوهرة يجب الحفاظ عليها، ومن ضمن طرق الحفاظ عليها إنها تكون محتجبة عن الأغراب ومش معنى كده إن محدش يشوفها، لكن المقصود إن أي فتنة فيها تكون محتجبة عن الأغراب، وده بيدي المرأة شعور جميل بالراحة والستر والأمان.

والحجاب كمان على حد فهمي مسئول عن تذكير المرأة إنها تكون محتجبة عن أي فعل خاطئ أو غير ملائم، مش معنى كده إن غير المحجبات بيعملوا حاجات غلط -علشان محدش يقولني كلام مقلتوش- لكن بقول إن ده من إحدى حكم الحجاب الصحيح.

هل اللي فاهماه صحيح؟
هل في إجابات تانية على الأسئلة أكثر إقناعا؟

سيسامي انا مش فاهمة انتي ليه مش بتكتبي كتير حقيقي بستمتع باسلوبك جدا
من فضلك بلاش تبخلي بردودك الجميلة ..

مداخلتك جميلة يا سيسامي وعلي فكرة انا كتبت ان الاتنين بيعانوا
المحجبة والغير محجبة

وبصراحة انا ضد اي انتهاك لاي حرية يعني انا معاكي انك تضايقي
لاني عارفة كويس الاحساس ده
وسمعت برضه من ناس مقربين ليا اترفضوا في وظائف لانهم مسيحيات

فمداخلتي كان المقصود بيها عموما اننا لازم نحارب التفرقة والتمييز قبل ما يتفشي
حقيقي طول عمر فيه تيارات مختلفة لكن عمرنا ما حسينا انها بتميز او بتفرق..
زي دلوقت
عموما الادانة وعدم احترام الحريات من اي جانب عن نفسي ضدها
وبعتبرها ضعف ايمان لانها لم تستمد قوتها من محبة ربنا لينا
ربنا بيحب خليقته بدون تمييز
خلقنا مختلفين في اللون والدين اكيد بغرض انه يعلمنا نحب بعض
رغم اي اختلاف
وكل واحد مننا مسئول عن تعاليم ديانته قدامه هو
لانه هو وحده اللي هيحاسبنا
بقوانيه المحبة الرحومة علي خليقته

يا اما ليه لم يجعل كل الخليقة زي بعض من عرق للون ودين

مشاركتي كانت بغرض الدفاع عن حريات الكل وده وحده كفيل يخلق محبة بين الجميع

....الادانة عكس تعاليم اي ديانة

sesame ..
مداخلة جامدة جداً .. مداخلة إوعى يعنى ..

صحيح بتضايق و بحس انى فى بلد غريبه لكن برجع أفكر نفسى أن ده موجود لكن لا يلغى الغالبيه الكويسه.

صحيح انى توقفت عند أكثر من جملة فى مداخلتك، ما بين معجب جداً ومتحفظ شوية ..
لكن هذه الجملة بالذات؛ كانت حتخلينى أنحرف وأتجه للإدمان على رأى حضرتك


نحن نتحدث عن مصر بالتحديد ..
ومصر "حوالى" 75 مليون نسمة .. يعيش منهم فى الخارج، "حوالى" 5 مليون نسمة، ويعيش "حوالى" 70 مليون داخل أراضيها.
القاهرة والأسكندرية والإسماعيلية .. هم الثلاث مدن الأكبر والأكثر تعداداً للسكان، حيث يعيش فيهم "حوالى" 25 مليون نسمة.
باقى السكان أى "حوالى" 45 مليون نسمة .. يتوزعون على باقى المحافظات.

إذن .. غالبية السكان، لا يعيشون لا فى القاهرة ولا فى الأسكندرية ولا فى الإسماعيلية

ملحوظة: كلها أرقام ونسب تقريبية. *

فإن تحدثنا عن "الغالبية" .. فمن الضرورى أن نحدد عن أى غالبية نتحدث.

هل نقصد غالبية المصريين؟ أم نقصد غالبية سكان المدن؟

وأكثر من هذا ..
فى المدن نفسها .. لا تتساوى الظروف.

فهل يمكن أن نتحدث مثلاً عن "مجتمعات" (ولا أقول "مجتمع") حى مصر الجديدة أو حى "الزمالك" فى القاهرة، أو حى "رشدى" فى الأسكندرية ..
بنفس الكلام والأوصاف والتحليلات التى نتحدث بها عن حى "بولاق أبو العلا" أو حى "الوايلى" أو حى "دار السلام" فى القاهرة؟؟؟؟

ملحوظة: كلها أحياء "مفترض" أنها منظمة وليست عشوائية.*

ناهينا عن الأحياء العشوائية .. فعنها .. حدث ولا حرج.


الإجابة بالطبع هى: لا، لا يمكن المساواة فى الحديث عنهم.

حسناً ..

لنرى الآن نوعية المتحدثين هنا .. أى أنا وأنت وفريدة ومشاعر وكل الأفاضل المشاركين سواء بالكتابة فى الموضوع أو بقراءته فقط ..
إلى أى من تلك المجتمعات المذكورة عاليه ينتمون؟؟
للمجتمعات المنظمة المتأصلة؟ أم للمجتمعات المستحدثة؟ أم للمجتمعات العشوائية؟
لمحافظتى القاهرة والأسكندرية؟؟ أم لمحافظات الوادى الجديد والبحر الأحمر وأسيوط والدقهلية؟؟
هل ينتمون إلى مجتمعات حضرية مدنية؟؟ أم لمجتمعات ريفية؟؟ أم لمجتمعات بدوية؟؟ أو لغيرها؟؟

الإجابة: .... ؟؟؟؟

يعرفها كل واحد منا. أى يعرف كل منا نفسه، وإلى أى شريحة ينتمى .. وهذا يكفينا.

لـــــــــــــــــــــــــــــكن .. المؤكد، هو أننا جميعاً نتحدث "فقط" عن المجتمعات المدنية .. أى عن القاهرة والأسكندرية، وبالكاد، الإسماعيلية.
أى أننا نتحدث عن "حوالى" 25 مليوناً من جملة الـ "75" مليوناً من المصريين ..
أى .. عن "حوالى" ثلث الشعب المصرى فقط، مع إغفال الفروق الكبيرة والواضحة بين الشرائح المختلفة داخل المجتمعات المدنية ذاتها.

صح؟؟

والثلث .. أقل من الثلثين بكثير

ويا ليته كان كله متساوى أو حتى متشابه!! لكن ثبت أنه مختلف فى مكوناته.

إذن ....

لكى نقول أن "الغالبية كويسة" .. يجب وضرورى، أن نحدد بالضبط: غالبية من؟
غالبية المصريين؟ أم غالبية أهل المدن؟ أم غالبية بدو سينا؟ أم غالبية الصعايدة؟ أم غالبية البحراوية؟
غالبية سكان حى الشروق فى القاهرة؟ (حى إنفتاحى إستثمارى مستحدث)
أم غالبية سكان حى كوم الدكة فى الأسكندرية؟ (حى عمالى متأصل)
أم غالبية سكان حى العجوزة فى الجيزة؟ (حى فئوى متأصل)

ملحوظة: لا أستخدم تعبير حى "شعبى" لأنه يوحى بأن من يعيشون فى غيره، ليسوا من الشعب .. خواجات وأجانب.*



خلاص .. كده وضحت لنا التقسيمة نوعاً ما .. ويبقى سؤالى عن الجملة المقتبسة فوق:


*ده موجود لكن لا يلغى الغالبيه الكويسه*


1ـ (ده موجود) .. فين بالظبط؟؟
2ـ و(الغالبية الكويسة) .. غالبية أى شريحة بالضبط؟؟


وحاسبى .. إوعى تقعى فى الغلطة الشائعة، وتقولى: (فى مصر كلها) .. لأنه غير صحيح على الإطلاق.






وسؤال آخر فى السريع على فقرة أخرى من كلامك:

هل كان أصحاب العمل أو المديرين الذين رفضوكى لأنك ترتدين الحجاب .. مسلمين؟؟

مثلا.. فى اماكن عمل لم امنح فيها مقابله شخصية فقط لأنى محجبه و اتقالتلى صراحه فى وشى.. و مكنتش بقدم فى التليفزيون..
دى كانت بنوك و مره فى الفور سيزونز..برضه مكنتش بقدم على وظيفه تحتاج شكل معين..دى كانت حسابات و back office

وسؤال آخر فى السريع على فقرة أخرى من كلامك:

هل كان أصحاب العمل أو المديرين الذين رفضوكى لأنك ترتدين الحجاب .. مسلمين؟؟

فعلا كلام سيسامي في الموضوع ده صحيح ، لان في اماكن كتير بترفض تعيين بنات محجبات بغض النظر عن المؤهلات والشهادات و الخبرة ، حتي ان بعض عناوين الوظائف في الجرايد بيكون فيها تحديد بجمله < مطلوب انسه للعمل و "يفضل" واحيانا "يشترط" غير محجبه> بغض النظر عن ديانه المدير
وفي شركات تم الاتفاق بينها داخليا علي عدم تعيين مسلمين والبعض الاخر عدم تعيين مسيحين، بدون ذكر اسامي للشركات، بس لو حد يحب يتأكد من صحه كلامي ممكن ابعتله اسم الشركات

بس في جانب مشرق، ان في بعض الشركات الاجنبيه الكبيرة مش بتبص لموضوع الحجاب نهائي بالعكس بيكون فيه احترام و حريه في طريقه وشكل اللبس، و الانتقاض الوحيد الي ممكن تقابليه هايكون في حاله تقصيرك في شغلك

انا بأتفق معاهم يا هشام ..اشتراط الحجاب أو لأ مالوش دعوه بديانه صاحب العمل و لا حتى درجه تدينه
و برضه فى اماكن بتكتب (يشترط محجبات)
كل مكان و ظروفه بقى

بس في جانب مشرق، ان في بعض الشركات الاجنبيه الكبيرة مش بتبص لموضوع الحجاب نهائي بالعكس بيكون فيه احترام و حريه في طريقه وشكل اللبس، و الانتقاض الوحيد الي ممكن تقابليه هايكون في حاله تقصيرك في شغلك

لارنو
أنا فامة الجاب المشرق قصدك إن لسة في ناس ممكن يشتغلوا بالحجاب والحكم عليهم يكون بمستوى الشغل مش بالمظهر.

بس للأسف أن شايفة إن ده مش جانب مشرق، لإن هل معقول نبقى في دولة عربية إسلامية ويبقى الزي الإسلامي الشرعي يمنع البنت عن الشغل والمكان اللي تقدر تشتغل فيه يكون شركة أجنبية؟!

الحقيقة إن واقعنا أصبح مؤلم.

اشتراط الحجاب أو لأ مالوش دعوه بديانه صاحب العمل و لا حتى درجه تدينه

الفكرة مش في ديانة صاحب الشغل يا أنيد، الفكرة إن إسلام بعض البشر أصبح لا يعدو كلمة مكتوبة في خانة الديانة ولا تحمل روح الإسلام.

تابع خواطرى السابقة حول الحجاب:


من كذا سنة، وقفت بنت مصرية عايشة فى أمريكا لما كان عندها 14 سنة، علشان ترد فى ندوة على ناس كبار بيتناقشوا فى موضوع الحجاب وقالت: لما ربنا خلق آدم وحواء، خلقهم عرايا .. ومع تقدم الإنسان وتحضره، بدأوا فى تغطية أجسامهم جزء .. جزء .. جزء .. يعنى .. لما نشوف الموضوع بالعكس .. نشوف، إن كل ما "نعرى" من أجسامنا، كل ما بنرجع للبدائية وبنبعد عن التحضر .. يعنى .. أنا بأشوف ان الحجاب هو دليل رمزى لتقدم المرأة مش لتخلفها زى ما بتقولوا!
(انتهى كلام البنت)

جايز نتفق مع كلامها أو نختلف .. لكن مؤكد أن فيه شئ يلفت نظرنا ويجعل كل واحد من اللى بيفكروا كثير، يفكروا فيما قالته.

لما نبص فى التاريخ الإجتماعى .. نكتشف ان كل الحضارات بدون إستثناء واحد .. كانت تغطى رأس المرأة، ولما نبحث فى السبب، نكتشف أن كل الحضارات قامت على أسس دينية، ولما نبحث فى أصل وفصل الأديان، نكتشف أنها كلها خرجت من مصدر واحد وإن إختلفت فى بعض التفاصيل .. ولما نتأمل شوية فى معنى هذا الكلام .. نصل إلى أن فكرة "الدين" فى هذا الموضوع تحديداً، هى فكرة واحدة دائماً.

نشطح دلوقت بعيد شوية ..

نجد أن ربنا بيقول لآدم ان الجنة كلها لك ما عدا شجرة واحدة .. ونسأل .. إشمعنى يعنى؟ حتفرق ايه مع ربنا؟ ما كانش يقدر يخبيها منه مثلاً؟ أو ما كانش ممكن يخلق غيرها كثير؟ أو ما كانش ممكن يعمل أى حاجة، بحيث يسيب آدم براحته فى الجنة؟ جت عالشجرة دى يعنى وخلاص مواعيد العمل الرسمية للخلق انتهت؟
أكيد طبعاً مش كده وحاشا لله.

طيب .. لما نلاقى ربنا بيقولنا ما تأكلوش لحم الخنزير .. ونبص نلاقى الدنيا كلها بتاكل الخنزير ويخرب بيوتهم لا بيعيوا ولا بيموتوا وصحتهم 100 .. 100 .. وبيعيشوا فى المتوسط لحد سن الخمسة وثمانين، ومش زى احنا ما بنحاول نفتى ونقول أصل الخنزير بيجيب أمراض وبيعمل مشاكل وكل الهبل بتاعنا ... اللـــــــــــــــه .. أومال فيه ايه؟؟ اشمعنى الخنزير يعنى؟؟ طيب ليه خلقه لو هو زفت أوى كده؟؟ معقولة يعنى ربنا ماكانش قادر يقول كن فيكون فيسهل علينا الموضوع شوية؟
أكيد الموضوع فيه إن ..

طيب والجواز .. إشمعنى يعنى الراجل يكون من حقه الجواز بأربعة، والست لأ؟ حنتفلسف ونقول علشان نسب الأطفال ومش عارف ايه وايه كمان؟؟ يا سلاااااااام .. وهو يعنى ماكانش قادر يخلق لنا طريقة تظبطلنا موضوع الأنساب ده؟؟ إحنا حنهرج؟؟
ده ربنا يا جدعان .. يعنى قادر على كل شئ .. يعنى لو عاوز يعملها كده حيعملها، ولو عاوز يعملها كده برضو حيعملها.

همممم .. إذن .. الموضوع موضوع مختلف .. مش موضوع بحث فى أسباب وحكمة الأوامر الإلهية .. لكنه موضوع أنا شخصياً بأسميه: إختبار الإيمان ... إمتحان للطاعة .. يعنى بيشوف مين فينا اللى حيكون من ضمن الفئة التى : قالوا سمعنا وأطعنا .. ومش من الفئة التابعة للأخ الذى: أبى واستكبر.

أنا بأشوفها كده.

يتبع ...

تابع ما سبق ..


ومع هذا ... بأسمح لنفسى برضو إنى أفكر كثير، "مش أطيع عميانى".

ولما بأفكر .. بألاقى ان المذاهب الإسلامية كثيرة جداً .. مش بس الأربعة المشهورين فى مصر .. حنفى ومالكى وشافعى وحنبلى .. لأ لأ لأ .. لأ خالص .. المذاهب على قفا من يشيل زى ما بيقولوا .. والدنيا مليانة مذاهب، وكل واحد عاقل مفكر، من حقه .. شرعاً .. انه يعمل المذهب الخاص به .. "تخيلى" .. ودى بالمناسبة .. من أجمل وأقوى العناصر المميزة فى الإسلام، واللى بتقنع "كل" الأجانب على التحول للإسلام .. لأنهم بيجدوا فيه تحرر من قيود وسيطرة أديانهم على الفكر .. اللى للأسف .. عندنا بقى مقيد .. بمزاجنا .. بواسطة مذهبين تلاتة اتفرضوا علينا بواسطة الدولة الأموية المفترية وكل من أتوا بعدها ..
واحنا قاعدين :)

مش معنى كلامى إنى ضد هذه المذاهب على فكرة .. بالعكس .. أنا باخد منهم كثير، وبأعشق المذهب الحنفى بالذات، لأنه مذهب العقل، وبأخذ من المذهب المالكى ورعه، ومن المذهب الشافعى تعادليته، ومن الحنبلى إيمانه بالمسلمات .. إلخ .. لكن فى الأول وفى الآخر .. فاهم ان هذه المذاهب ليست سوى رؤية شخص واحد .. إنسان زيي زيه .. وتفسيره .. للآيات القرآنية .. ولو كان الأول منهم صح جداً ومقنع للى جُم بعده، ما كانوش جُم وعملوا تفسيراتهم ولا مذاهبهم، لكن هما ناس اجتهدوا فى فهم الدين بطرق مختلفة، وكلامهم عجب ناس، فعملوا تفسيراتهم "مذاهب" ,, وهكذا ..

بعد كده .. نبص لموضوع الحجاب فى تفسيرات المذاهب دى كلها .. المعروف منها والمش معروف:
نلاقى أن بعضها بيصمم على أنه فرض زيه زي الصلاة والصوم على نساء النبى فقط، والبعض يجده فرض على الحرائر من النساء بس، يعنى على علية القوم فقط، والبعض يجده فرض على كل النساء بدون إستثناء، والبعض يجده فرض فى ظروف محددة لو مش موجودة ما يبقاش فرض .. والبعض بيشوف إنه مرتبط بالحالة العامة للمجتمع، والبعض بيقول إنه مش وارد كفرض أساساً وانه إختيارى !!

طيب .. نصدق مين؟؟ مين فيهم صح ومين مش صح؟؟

طبعاً الأسلم للعامة من الناس .. هو إتباع الأكثر تشدداً تجنباً للشبهات .. لكن ده مش منطقى انه يحصل من أصحاب العقول وأولى الأباب

إستفتى قلبك ....... لكن قبل ما تستفيه .. لازم يكون قلبك مؤهل للفتوى!

يعنى لازم تبحثى الموضوع من كل جوانبه وبمنهج علمى (يا أختاه)، ولو إحترتى .. ساعتها إبقى استفتيه.

لاحظت من ضمن ملاحظاتى .. ان فيه منطق بيقول: انه مش ذنب المرأة، ان فيه ناس حتبص عليها .. وهو منطق أوافق عليه تماماً وبأنادى بيه كمان وبأقول اننا مالناش دعوة بكلام الناس لأن عمرنا ما حنسلم من كلام الناس مهما عملنا .. لا فيفى عبده سلمت من الناس وهى رقاصة، ولا سلمت منهم وهى حاجة لبيت الله، وده مجرد مثال ..
زى قصة جحا وابنه والحمار .. لو عارفينها ,,


لكن .... السؤال هنا .. هل صاحبات هذا المنطق من النساء .. لابسين أو حيلبسوا الحجاب علشان الناس؟
والا لابسينه علشان هو أمر إلهى؟
لو علشان الناس .. طظ فى الناس، واقلعيه فوراً
إنما لو علشان ربنا أمر بكده .. يبقى معلهش يعنى .. مش من حق حضرتك يا هانم انك تقلعيه.

والسؤال التالى بناء على السؤال اللى فوق .. هل ربنا فعلاً أمرك بالحجاب؟
هو ده السؤال اللى لازم ولابد وحتماً وضرورى .. تتأكدى منه، قبل ما تقررى أى شئ ..

أنا شخصياً .. أعتقد .. واعتقادى غير ملزم وغير مسئول أمام ربنا عن أى حد يعمل به .. أنه فرض حسب المجتمع ..
يعنى .. لو بتعيشى فى مجتمع يعانى من الحرمان، فيكون ضرورى لدرء الفتنة .. أما لو بتعيشى فى مجتمع طبيعى .. سواء كان مسلم أو كافر .. لكن مابيعانيش من مشكلة الحرمان .. يبقى مش ضرورى، لأن الغرض منه غير متوافر ... وده فى حالة إننا بنبحث عن أسباب وحكمة الحجاب، ومش بنتعامل معه على أنه إختبار إيمان وإمتحان طاعة زى ما قلت فى البداية.


بعد الرغي بتاعى ده كله ..

الخلاصة أنه موضوع معقد زيه زي غيره من المواضيع الحساسة، والمرأة بس .. هى صاحبة القرار فيه، وعلى مسئوليتها الخاصة.

شخصياً .. موقفى دائماً معروف لما بأتسئل عن الحجاب وهل حأطلب من مراتى أو بنتى أو أختى أو زميلتى .. إنها تلبس الحجاب أو تقلعه؟ .. فدايماً ردى واحد .. وهو: انى ماليش دعوة .. لأن ده موضوع شخصى جداً بينها وبين ربنا .. أنا دورى الوحيد هو انى أساعدها فى التفكير لو هى طلبت .. أحط قصادها كل المعلومات اللى ربنا يقدرنى عليها، وهى حرة تقرر ما يناسبها بعد كده. .. لأن هى كمان عندها عقل، وفيه علاقة بينها وبين ربنا .. فهى صاحبة قرارها الوحيدة فى موضوع زى كده.

وبس مؤقتاً ..