الحجاب: هل هو ظاهرة؟

من طرف مصرية السبت 05 يناير 2008, 9:06 pm

الناظر إلى المرأة المصرية في العديد من الأماكن سيجد أن الحجاب في مصر انتشر بحيث أصبح الغريب هو المرأة الغير محجبة. ولكن هل الحجاب هنا هو عن اقتناع أم هو للتقليد أم هي ظاهرة؟

أتسائل عن ذلك خاصة عندما أرى أن الحجاب لدى العديد من السيدات أصبح مجرد إيشارب لتغطية الرأس دون النظر إلى الرداء المناسب للحجاب كما أصبح الحجاب هو الحجة التي تداري بها الكثير من السيدات تدهور الذوق العام في الملبس.

تنتشر أيضا الإشاعات أن الحجاب أصبح لتغطية شعر غير جميل والجديد أن بعض الفتيات يضعون الحجاب للزواج فبعض الشباب يشترط أن تكون العروس محجبة لضمان أخلاقها. ولكن هل الحجاب بالفعل يرتبط بكرم الأخلاق؟ وأعني في وقتنا الحالي وليس ما يجب أن يكون عليه لحال.

هل هذا هو الحجاب؟ هل انتشاره بهذه الطريقة شئ مشجع؟
هل المهم هو تغطية الرأس فقط دون النظر إلى الأخلاقيات والتعاملات والدين بالطريقة الصحيحة؟

هل أصبح الحجاب ظاهرة؟

من طرف مشاعر الأحد 06 يناير 2008, 11:32 pm

الحجاب دلوقتى بقى موضة
الحجاب لازم يكون لة مواصفات وشروط معينة موافقة لأدب الشرع الإسلامي
وهو الذي يجمع الأوصاف التالية:

أولا: أن يغطي جميع الجسم عدا ما استثناه القرآن الكريم وهو الوجه والكفان

ثانيا: ألا يشف الثوب ويصف ما تحته.
اى لابد وان يستر الثياب الجسم

ثالثا: ألا يحدد أجزاء الجسم ويبرز مفاتنه
لانة أشد إغراء وفتنة من الثياب الرقيقة الشفافة.

رابعا: ألا يكون ملبس خاص بالرجال.
بمعنى عدم التشبة بالرجال فى ملا بسنا

غير كدة مش حجاب

من طرف فانتوماس الإثنين 07 يناير 2008, 1:21 pm

والله يا مصرية إنتى فتحتى موضوع يفرس بصراحة. فيه بنات محجبات بيلبسوا لبس ضيق و محزق و قصير و بيبقى شكلها ملفت اكتر بكتير اوى من واحدة لابسة نفس اللبس ده و مش محجبة. يعنى تقلعوا احسن.
اما بقى موضوع الاخلاقيات ده فده موضوع كبييييير اوى. كتير تبقى واحدة محجبة و بتصلى بس كذابة او نمامة و بتشتم و حقودة...يعنى اخلاقيات متمشيش مع الحجاب خالص. انا رأيى إن الحجاب ده يتلبس إخر حاجة بعد مع الواحدة تكون ظبطط اخلاقياتها , حاجات مهمة فى الدين اهم من غطاء الرأس. زى الإيثار و الصدق و الأمانة و الإخلاص فى العمل و حاجات تانية كتير و لما يبقى الحجاب تكملة لده بيبقى له معنى فعلا.

من طرف Hesham الأربعاء 09 يناير 2008, 12:05 am

الحجاب فرض إسلامى صريح على المرأة .. أى أنه ليس إختياراً لها، تقبله أو ترفضه، بإقتناع منها أو على مضض منها

فإن كانت أركان الإسلام خمسة للكل .. فهى ستة للمرأة البالغة .. لأن كلاً من القرآن والحديث الشريف صاغا هذا الركن بصيغة الأمر .. وبادئين للأمر بإستخدام "لا" الناهية .. عن فعل عكسه

إذن لا مجال لنقاش ذلك لأننا سننتهى من أى نقاش حوله من حيث بدأنا .. وهذا أولاً

وثانياً لا يختلف أحد على أن كثيراً من المحجبات فى مصر حالياً .. لا يفعلن سوى تغطية شعورهن فقط .. ولا شئ سوى هذا .. وهو أبعد ما يكون عن فلسفة الحجاب وأسبابه والحكمة منه

والحقيقة؛ أننا نعتبر الحجاب فرضاً وركناً سادساً فى الإسلام، لكونه أتى بصيغة أمرية .. ولو طبقنا نفس المنطق على كل الأوامر الإسلامية .. أى لو اعتبرنا كل أمر فى القرآن والسنة فرضاً .. لاكتشفنا أن عدد أركان الإسلام يزيد كثيراً عن الخمسة الشائعين .. لأن كل أمر إلهى .. هو أمر واجب التنفيذ دون مراوغة أو تردد .. ومن يتركه، فهو يترك شأن أساسى من شؤون الدين دون شك .. لأنه لا يوجد كلام للخالق سبحانه وتعالى دون قيمة، فما بالنا بأوامره؟

وبالتالى؛ فكل محجبة لشعرها فقط، دون الإلتزام بباقى الأوامر الإسلامية، تكون مثلها مثل الرجل المسلم الذى لا يلتزم بنفس الأوامر .. كليهما سواء

وشخصياً أقول: شئ أفضل من لا شئ

الملفت لنظرى كالملفت لنظركم .. هو انتشار الحجاب "فجأة" بهذا الشكل الكبير فى مصر والعالم العربى، بعد فترة تنازل عنه امتدت لحوالى 3 أو 4 عقود متتالية من القرن العشرين

حاولت مرة من حوالى 4 سنوات، أن أسترجع تاريخ الحجاب فى مصر، وكان فى سياق ردى على أحدهم فى موضوع مشابه .. فسأعيد نشر نفس الرد فى المداخلة التالية لتشابه الموضوعين

من طرف Hesham الأربعاء 09 يناير 2008, 4:13 am

كتب الأخ موضوعاً تحت عنوان: الحجاب والنساء فى مصر .. وفيه كتب مايلى

فى السبعينات لم تكن توجد فتاة أو سيده من سكان المدن تلبس ما يعرف بالحجاب ، ومن لأفلام الفديمة وحفلات ام كلثوم القديمة تظهر فيها النساء ، ولا وحده فيهم محجبه ، ثم حدث فجأة
واغلبية النساء المصريات المسلمات يرتدون الحجاب . فهل هذا بدافع من الإيمان والتدين ، أم أشياء أخرى
لأن نفس هؤلاء المحجبات الآن يقومون بمفاسد تصل للجرائم من الناحية الدينية مثل أخذ الرشاوى أو المحسوبية أو عدم الإهتمام بأوقات العمل وأداء العمل بما يرضى الله وهذه جرائم
ترتكبها نساء مصر فى عصور ما قبل الحجاب ، فهل الدافع للبس الحجاب أسباب أخرى مثل

- البحث عن عريس .
- نقص الموارد المادية .
- الخوف من الجماعات الإرهابية .
- حماية الشعر من التلوث الزائد الآن .

أو أسباب أخرى ؟؟

وكان التالى هو ردى عليه .. مع بعض التنقيحات

حقيقة الأمر، أن الجزء الأول من هذا الكلام صحيح بعض الشئ .. وليس صحيحاً على الإطلاق .. ولنعد قليلاً إلى الوراء .. لنرى كيف كانت صورة المجتمع المصرى ونساؤه

1

عندما أتت الحملة الفرنسية على مصر 1798 .. لم تكن هناك إمرأة واحدة غير محجبة .. بل لم يظهر فى كتاب "وصف مصر" غير صورتين أو ثلاثة فقط للمرأة المصرية .. التى لم تكن لتظهر على العامة .. وأظهرتهن الرسومات بـ (البرقع) .. وهو نظير الـ (نقاب) المتداول حالياً. وهذا يعنى .. أنه من 200 سنة تقريباً

كانت كل نساء مصر .. ترتدين النقاب

2
فى ثورة 1919 التى خرجت للمطالبة بعودة سعد زعلول من النفى .. تظهر جميع النساء من خلال الأفلام التسجيلية والصور الفوتوغرافية والزيتية وغيرها .. وهن يرتدين البرقع .. وهو نظير الـ (النقاب) المتادول حالياً. وهذا يعنى .. أنه من 85 سنة تقريباً
كانت معظم سيدات مصر .. ترتدين النقاب
معظم وليس كل لأنه فى هذه الفترة .. كان للمستعمرين من الإنجليز والفرنسيين تأثيرهم على شريحة معينة من المجتمع المصرى

والمعروف للمهتمين بالدراسات الاجتماعية .. أن أحد أهم خصائص الإستعمار البريطانى .. هو تقسيم المجتمع الواقع تحت إحتلاله إلى طبقات .. وعزل "طبقة الخاصة" عن باقى شرائح المجتمع
بينما الإستعمار الفرنسى، فمن خصائصه طمس الثقافة المحلية للبلد المستعمر، وفرض الثقافة الفرنسية عليه

وما حدث فى مصر .. هو مزيج من الإثنين .. فكان للثنائى المستعمر حضوراً قوياً فى مصر، أدى إلى ظهور تلك الطبقة الخاصة، المعزولة عن المجتمع المصرى، والحاضنة للثقافة الأوروبية على حساب الثقافة المصرية
ناهينا عن كون حكام مصر أنفسهم وحاشيتهم ومن فى نطاقهم فى ذاك الوقت .. كانوا من أصول أوروبية ـ ألبان وأتراك

ـ مع حلول الثلاثينات من القرن العشرين .. كان التأثير المذكور قد تمكن تماماً من تلك الطبقة الراقية (الباشاوات والبكوات)، وبدأ فى التغلغل والإنتشار فى شريحة جديدة، هى فئة المثقفين والمتعلمين ـ الأفندية ـ فرأينا قاسم أمين وعلى مبارك وطه حسين وفكرى أباظة وغيرهم ممن سبقوهم ولحقوهم ممن حملوا الفكر الأوروبى "التنويرى" إلى الثقافة المصرية والعربية. وكان لهم بالغ الأثر .. حيث ظهرت على أثره أسماء رائدات مثل أمينة السعيد وهدى شعراوى وغيرهن، وبدورهن .. نقلن فكرهن إلى غيرهن من الفتيات .. وبخاصة المتعلمات منهن، اللاتى رأين فى (البرقع) (عائقاً أمام التحضر والنهضة) .. فهو بالنسبة لهن مجرد تقليد إجتماعى بحت .. متغافلات ومتغافلين لسببه الحقيقى

ـ فى نفس الوقت .. ظهرت أسماء مثل حسن البنا، ومثل محمد حسين هيكل ومحمد فريد أبو حديد وغيرهم ممن حاولوا التصدى بقوة لهذا التغلغل الثقافى الأوروبى الشرس، حيث اعتمدوا التوجه الدينى كوسيلة للتذكير بأصل الثقافة المصرية والعربية، وكان لهم تأثيرهم البالغ أيضاً، لكنه تأثيراً بقى دون أى صدى يُذكر عند أبناء الشريحة الخاصة سابقة الذكر .. فظل تأثيرهم على القطاع الأكبر من الشعب دون خاصته .. خاصةً أيضاً؛ وأن البلاد كانت تعج آنذاك بحالات من النفور الوطنى بقيادة أفراد من الطبقة الوسطى وما فوقها، ضد الإستعمار الأجنبى، وكانت كل حالة منها تستمد أيديولوجية مختلفة عن الأخرى، لكن كانت معظمها واردة الخارج، فلم تكن هناك فرصة كبيرة أمام التوجه الدينى التقليدى المحافظ

ـ فى الأربعينات والخمسينات .. كانت السينما المصرية تعتمد (بشكل أساسى) على بعض الأسماء "اليهودية" من أبناء مصر أو حتى أسماء من "غير المصريين" فى المشاهد الراقصة والتى تعد الآن مشاهد غير أخلاقية .. أما الممثلين والممثلات المصريين .. فكان أغلبهم يقومون بأدوار ملتزمة لحد كبير مقارنة بغيرهم .. مع وجود الإستثناءات بالطبع
وأدت السينما نتيجتها المعتادة فى تغيير مفاهيم الناس وعاداتهم.
وأحد دلائل إختلاف الواقع عن المشاهد السينيمائية العابثة ـ أو المتحررة من القيود الإجتماعية ـ هو أن معظم تلك الأفلام كانت تصور فى داخل الأستوديوهات .. والقليل منها الذى أظهر الشارع .. لا تظهر فيه سيدات؛ إلا نادراً جدا.

ـ مع حلول الستينات .. وهنا .. يجب، وضرورى جداً، لفت النظر إلى أن عقد الستينات هو العقد الذى غير مسار البشرية كلها، ليس فقط فى مصر، بل فى العالم كله
*حيث يعتبر أهم عقد فى التاريخ البشرى الحديث ..
فهو عقد محمد على كلاى ومارتن لوثر كينج ومانديلا والتفرقة العنصرية. وعقد نهاية المستعمرات العسكرية، وعقد تشيه جيبارا وفيدل كاسترو وجمال عبد الناصر ونهرو وتيتو وتشاوشيسكو ولومومبا وعيدى أمين وتشومبى، وعقد خرويتشوف والحرب الباردة، وعقد إغتيال كندى. وعقد ماو تسى تونج، عقد انتشار البوذية خارج حدودها. وعقد جاجارين ووصوله للقمر، وعقد إنتشار التليفزيون وإختراع انترنت واختراع الفيديو والكاسيت والأقمار الصناعية، وعقد السد العالى. وعقد البيتلز وإلفيس، وسيريالية دالى، وإنتشار الوجودية السارترية والهيبز، ومظاهرات الطلبة فى باريس وإغتيال وتعذيب المعارضين فى تشيلى، عقد ظهور الأديان الأمريكية الجديدة، وجماعات الإنتحار الجماعى، وهو عقد نكسة 67 وعقد الميكروجيب والروك أند رول والعتبة جزاز والسلم نايلو فى نايلو
....
وممكن نعد ونتذكر أحداث بعدد أيام العقد كله، وكلها أحداث أثرت ولا تزال تؤثر على كل حياة كل البشر فى كل مكان .. والمؤكد .. أنها أخطر وأغنى فترة فى التاريخ الإنسانى كله
ومن المؤكد أيضاً أنها تركت أثارها على مصر وعلى عادات ومفاهيم شعبها وقيمهم وأخلاقهم، شأنهم كغيرهم من شعوب الأرض

ـ إذن .. فبحلول الستينات .. "حيث كانت هناك بالفعل حركة ديناميكية وعشوائية فى آن واحد داخل خلايا المجتمع المصرى كانت الأفكار الواردة إليه من الكثرة بحيث يصعب تحديد أى نوع من الأفكار كان هو الفكر المسيطر على العقل المصرى وقتها

فمن جهة .. كانت الأمة فى مرحلة بناء الدولة وتأسيسها من خلال الفكر الإشتراكى الذى سمح لها بالإطلاع على كل الثقافات الأخرى
ومن جهة أخرى كانت هناك عداوات خارجية وداخلية تعرقل مسارها
ومن جهة ثالثة كان الشعب نفسه منقسم على نفسه أو لنقل .. كان يعانى حالة من الشيزوفرينيا (إزدواج الشخصية) .. فهو بداخله مؤمن جداً بأصوله الدينية .. لكن من خارجه يحاول شكلياً سلوك المسلك الحضارى حسبما روجته له بعض الأسماء من المثقفين أو كما فهمها منهم .. ليضمن تقدمه، خصوصاً؛ وهو شعب كان مؤمناً وقتها بهدف معين وبغاية محددة وكانت عنده قضية قومية مشتركة. فوجدنا مزيجاً غريباً شيزوفرينيكى تماماً وضح على سلوكه ومظهره .. فظهرت مثلاً الفتاة المرتدية للميكروجيب فى "المدن بالتحديد" .. ثم نراها هى نفسها تذهب إلى الجوامع حيث أضرحة الأولياء للتمسح بها .. (وهى الظاهرة الخاطئة التى كانت منتشرة حتى وقت قريب جداً) .. وهو نموذج يثبت أن النزعة الدينية لم تتلاشى من الداخل .. حتى ولو شابها سلوكيات مناقضة.

يتبع

من طرف Hesham الأربعاء 09 يناير 2008, 4:39 am

تابع ما سبق
ـ فى النصف الثانى من الستينات .. وتحديداً بعد النكسة .. كانت للصدمة أقوى تأثيراتها على الجميع دون إستثناء واحد .. وكنتيجة لها .. حدثت هجرات فردية وجماعية كثيرة بعضها لخارج مصر وبعضها لداخل مصر:

// النوع الأول:ـ لداخل مصر
* وهؤلاء هم من كانوا يعيشون بالفعل فى أوروبا والولايات المتحدة قبل النكسة بفترة طويلة، ووجدوا عليهم إلتزاماً وطنياً وأدبياً يجبرهم على العودة والتواجد فى بلدهم وقت أزمتها .. وهؤلاء أثروا بشكل كبير على الحياة الثقافية المصرية والوعى والحركة السياسية بها، لكن بأفكار بعيدة عن التوجهات الدينية ليبرالية فى الغالب

.
//النوع الثانى: ـ لخارج مصر ..
وهؤلاء أنواع

1

ـ المجموعة الأولى كان معظمهم ـ وهى مصادفة بحتة لا معنى لها ـ من المسيحيين المخلصين لمصر، لكنهم لم يستطيعوا تحمل النكسة وتبعاتها فهاجروا صوب كندا وأستراليا تحديداً .. وكونوا أول جاليات مصرية هناك. ثم لحق بهم آخرين (مسلمين)

2

ـ هم من جاءوا فى المرحلة التالية، وهجرتهم كانت صوب أوروبا والولايات المتحدة والإتحاد السوفييتى، ومعظمهم كانوا من الدارسين الذين حصلوا على منح دراسية، ولم يعودوا

وهذا النوع الثانى .. ينقسم بدوره إلى فئتان

ـ الفئة الأولى .. التى عايشت وتعايشت مع المفاهيم الغربية، وصارت عقليتها مزيجاً من الأصل المصرى الثابت والمتأصل بداخلها والقائم على الدين والروحانيات، وبين الثقافة المادية والعملية والتحليلات العلمية .. وصارت نظرتها للأمور أكثر حيادية من غيرها، ولم يعد أغلبها يتمسك بالمسلمات والثوابت التى تربوا عليها.

ـ الفئة الثانية .. هى المقابلة للأولى .. حيث كان منهم من تعمق أكثر فى دينه، وتقرب أكثر منه حتى يمكن إعتباره أكثر إلتزاماً وتحفظاً ممن لم يخرجوا من مصر أبدأً

3

ـ وهم الفئة التى بدأت فى الظهور والإنتشار السريع فى السبعينات .. وكانت وجهتهم هى الدول الخليجية البترولية، وهم من عادوا بعد سنوات إعارتهم حاملين للأفكار والعادات الوهابية المنتشرة فى الجزيرة العربية، وأيضاً منهم من حمل الأفكار والعادات الشيعية المنتشرة هناك أيضاً .. والفكرين رغم كونهما نقيضين .. إلا أنهما غاية فى التحفظ والتشدد، بعكس المتبع فى مصر دائماً من وسطية معتدلة تشتهر بها. ومن خلالهم إنتشرت التوجهات المحافظة من جديد فى المجتمع المصرى

4

ـ وهؤلاء هم الفئة التى خرج "معظمها" فى الثمانينات والتسعينات إلى قارات أوروبا وأمريكا وأستراليا بحثاً عن مستقبل شخصى أفضل مادياً أو مهنياً وبعيداً عن تلك التوجهات الدينية المحافظة لحد التشدد والغير مستساغة بالنسبة لهم والتى باتت تؤثر على الحياة الإجتماعية المصرية وعلى عاداتها وتقاليدها، وبعيداً عن الظروف الإقتصادية الصعبة التى تمر بها مصر، وعن الوضع السياسى القاتم بكل ماله وما عليه. هذه الفئة الرابعة، هى الأقل تأثيراً على المجتمع المصرى حالياً .. وإن كان لها أى تأثير يذكر، فهو تأثير سلبى قاصر. كأن يكون مثل نقل أحدث صيحات الموضة فى كل المجالات ناهينا عن عدم المشاركة والتفاعل الإيجابى مع مجتمعهم الأصلى .. معظمهم أقل علماً ممن سبقوهم .. فليسوا جميعهم من حاملى المنح الدراسية وليسوا جميعهم أصحاب مكانة أدبية أو علمية أو إجتماعية مرموقة فى مجتمعاتهم الجديدة كمن سبقوهم .. والمتوقع منهم قليل لا يذكر. مع عدم إغفال الحالات الإستثنائية كالعادة.

تلك هى حالات هجرة المصريين العامة من وإلى مصر فى الأربعين سنة الماضية .. ولا يجب أن يغيب عنا حالة الجيل الثانى من أبناء هؤلاء المهاجرين، والذين تربوا فى تلك المجتمعات المختلفة الثقافة، وكثير منهم (إن لم يكن كلهم) على إرتباط بوطنهم الأم، بلد منشأ أهاليهم. هؤلاء .. ومنهم أيضاً من أتوا نتيجة للزواج المخلط مع غير المصريين، يحملون أفكاراً تختلف كثيراً عن أفكار القابعين داخل مصر. ويؤثرون بشكل أو بآخر على سلوكيات المجتمع المصرى، أحياناً بالإيجاب، وأحياناً بالسلب، حسب نوعية التربية التى تلقوها.

من هذا المزيج وهذا الزخم الثقافى الوافد على الثقافة المصرية فى الأربعين سنة الأخيرة ـ على إختلاف مستوياته ـ ومع تسارع إيقاع التغييرات العالمية بعد عقد الستينات .. وسرعة إنتشار المعلومة والخبر من أقصى نقطة على الأرض إلى أقصاها المضاد .. حدث تأثر كبير وبالغ فى التركيبة الثقافية للشعب المصرى، فصارت معرفتهم على سبيل المثال بمجازر السوفييت فى الشعب الأفغانى المسلم فى السبعينات والثمانينات تهيج من مشاعرهم الدينية، والتى توافقت مع رغبة الحلف الأطلنطى وعملاؤه فى إثارة تلك المشاعر أكثر فأكثر لتكون سندهم فى حربها الباردة ضد السوفييت، وهو ما حدث وما نجحوا فيه. وعلى الصعيد المحلى .. كان إتجاه السادات لتوقيع معاهدة السلام، وعلمه المسبق برفضها القاطع من قبل الشعب، أحد أهم أسبابه لإلهاء الشعب بمشاكل أخرى تكفل له التصرف بحرية وتكون نتيجة تلك الفتنة الطائفية المفتعلة لتغطية جريمة توقيع المعاهدة .. أن زادت وبشدة وبدون رقيب الأفكار الوهابية، ولاقت أرضها الخصبة فى المجتمعات العشوائية المتغلغلة داخل المدن الكبرى والمهمشة إجتماعياً .. وخطورة هذا الإنتشار بدون رقابة، تمثلت فى إنتشار أفكاراً خاطئة ومدسوسة على الإسلام لم ينزل بها الله من سلطان، لكن أحد هذه العلامات الإيجابية، كان عودة ظهور غطاء الرأس؛ سواء كان الحجاب بشكله البسيط أو الخمار أو النقاب .. ومن الملاحظ مثلاً .. وكتأكيد على دور هؤلاء المهاجرين للدول الخليجية .. أن أحد ربطات غطاء الرأس "الحجاب" كانت تعرف فى الثمانينات (وربما إلى الآن) بإسم "الخليجية" أو "الكويتية" تدليلاً على مصدرها. فى النهاية .. فمما لاشك فيه (عندى وعند عامة المسلمين من أمثالى) أن الحجاب هو فرض إسلامى مثله مثل الصلاة والصوم

تحياتى

من طرف مشاعر الخميس 10 يناير 2008, 8:53 pm

اللة ينور يا هشام
اهة كدة المداخلات الحلوة ولا بلاش
حقيقى كلام واضح ووافى
الحجاب فرض إسلامى مثله مثل الصلاة والصوم
وبجد انت جبت الخلاصة
وقلت المفيد
تحياتى

من طرف Hesham الجمعة 11 يناير 2008, 5:31 am

طيب يالله اتحجبى وخليكى جدعة
geek

من طرف mooody4 الخميس 17 يناير 2008, 11:33 pm

السلام عليكم ورحمة الله

السيد الحاج الاسبانيولي الحبيب هشام

جزاك الله كل خير
فعلا أوفيت الاجابة وجزاك الله خيرا

واضيف أنه لا نحكم على ان الحجاب أو اللحية (وهي واجبة) هي مربط الفرس لنقول أن الخلق حسن أو لا لكن لا ننسى أن المرأة عليها أن تعرف ان الحجاب فرض وما أمر به القرآن (تصحيح) ليس هو حكم استثناء الوجه والكفين فهي فتوى من بعض أئمة المذاهب الأربعة والامام أحمد بن حنبل له وتلامذته لهم قولان يؤخذ بهما وهو أن الحجاب وتغطية الوجه والكفان واجب مع بقية شروط الحجاب الشرعي واتثنى في قول آخر الوجه والكفين وليس قول القرآن وتفسير الآية التي يقول الله عز وجل فيه (( إلا ما ظهر منها)) فيها اختلاف على انه الوجه والكفين أم لا وظهور الوجه والكفين يكون في المجتمعات الصحية السليمة وهي غير موجودة الآن للأسف) لكن أمر القرآن بالحجاب وفسرته السنة كما علمنا من سير الصحابة أن تغطية جميع أجزاء البدن ولكن بعض روايات اتلفسير روت على أنه يجوز للمرأة أن نبين الوجه والكفين إذا لم تخف على نفسها الفتنة وطبعا دلوقتي الفتنة زي الهواء في الشوارع والنفوس ضعيفة إلا من رحم ربي

ولكن لا يوجد أي دليل أو منطق يقول أن الحجاب يكون آخر حاجة بعد الأخلاقيات لأنه رغم أن الأخلاقيات من أساسيات الدين لكنه ليس المقياس الوحيد للاسلام الذي يؤدي إلى الجنة والنار فلا يمكن أن نجد إمرأة أو رجل كامل أو معصوم ولكن كلنا عصاة ولنا زلات لكنها لا تمنعنا أن نمارس الفروض التي أمرنا الله ورسوله بها فالطاعة والذكر ... الخ ربما يكون سببا في محو زلاتنا أو التقليل منها فممكن أن نجد مسلم ملتحي وعليه مظاهر التمسك بالسنة لكن به بعض الزلات في أخلاقياته وهو شان طبيعي موجوج في جميع البشر خاصة في عموام المسلمين ونفس الشيء يحدث مع المنقبة لأننا بشر يا جماعة مش ملائكة ما شية على الأرض ولكن أن نجد إمرأة غير محجبة وتتبرج بأنواع الماكياج والعطور ونقول هي أفضل من مئة محجبة؟؟؟؟؟؟؟ طبعا كلام مش صحيح فالمجاهر بالمعصية لا يدخل الجنة حتى يتوب كما قال الرسول صل الله عليه وسلم وانه أمرنا فقال: إذا بوليتم فاستتروا... وهي أحاديث صحيحة في ابلبخاري ومسلم لأن من يجاهر بالمعاصي حتى ولو كان أو كانت فيها كثير من الصفات الحميدة لا يستوي مع من يستتر من الناس بالمعصية فعلى الأقل الأخير عنده بقايا من الحياء وان كان من الناس أفضل ممن لا يستحي من الله ولا يستحي من الناس وأيضا أنه لا يئؤذي إلا نفسه أما الآخر فهو يؤذي نفسه ويؤذي الآخرين وأيضا التي تتبرج فهي تظهر جمالها او الشيء الجميل فيها لغير ذي حق من الناس في الشارع والأماكن رغم أنه ينبغي عليها اظهار محاسنها لزوجها فقط لا غير ( معلش لست متشددا ولكني أتكلم بما أمر به سيدي وسيدك وحبيبي وحبيبك فقط لا غير) وهو بالتالي محافظة على عدم نشر الفتن بين الشباب

وجزاكم الله خيرا
أحمد

من طرف mawadee3 السبت 19 يناير 2008, 6:39 am

والله يا مصرية إنتى فتحتى موضوع يفرس بصراحة. فيه بنات محجبات بيلبسوا لبس ضيق و محزق و قصير و بيبقى شكلها ملفت اكتر بكتير اوى من واحدة لابسة نفس اللبس ده و مش محجبة. يعنى تقلعوا احسن.

السلام عليكم ورحمة الله و بركاته
وسلام مخصوص متوصي عليه لفانتو

اولا اتفق معاكي في حكاية ان اليومين دول بقي فيه محجبات لبسهم
ملفت للنظر و غالبا هاي الفئة من المحجبات هي فئة المراهقات
اللي عاوزة تلبس وتستعرض و في نفس الوقت في اسباب اتخليهم يلبسو الايشارب وينسو يغيروا بقية المظهر.

لكن معلش راح اختلف معاكي في حكاية تقلعوا احسن ... لانه في فرصة
انه الله سبحانه يهديها ويوقف ناس الله هاديهم ويساعدوها علي تحسين
حجابها بما يتماشي مع ما يتطلبه الدين

اما بقى موضوع الاخلاقيات ده فده موضوع كبييييير اوى. كتير تبقى واحدة محجبة و بتصلى بس كذابة او نمامة و بتشتم و حقودة...يعنى اخلاقيات متمشيش مع الحجاب خالص. انا رأيى إن الحجاب ده يتلبس إخر حاجة بعد مع الواحدة تكون ظبطط اخلاقياتها , حاجات مهمة فى الدين اهم من غطاء الرأس. زى الإيثار و الصدق و الأمانة و الإخلاص فى العمل و حاجات تانية كتير و لما يبقى الحجاب تكملة لده بيبقى له معنى فعلا.

برضه حاتفق معاكي ان الأخلاق و السلوكيات إلها فترة من أسوأ الي
أسوأ لدرجة ان الواحد بيتهيأله انها انعدمت ... لكن هادا بينطبق علي الجميع من غير استثناء... لكن الكل بصفة عامة بيستنكر قلة او انعدام الأخلاق من اللي مظهره بيوحي بالتدين والطهر رغم انهم بشر و كل ابن آدم خطاء وخير الخطائين التوابين
اما حكاية ان الحجاب يتلبس آخر حاجة بعد ما الواحدة تضبط اخلاقها
وسلوكها فهذا شبه مستحيل لان الواحد مش ضامن عمره والموت بييجي في لحظة وزي ما انت عارفة ان احنا كل يوم لما بندخل ننام بنبقي
مش عارفين اذا كنا راح نصحي واللا لأ ... يبقي الواحد يبتدي واللي كاتبه الله راح يصير ... و أزيدك من الشعر بيت بيقول الشيوخ
ان حكاية انا حألبس الحجاب لما اضبط اخلاقي و سلوكياتي وابطل كذب
ونميمة وغيبة وحقد وغش وانتظم في الصلاة بحيث لما البس الحجاب
يكون مظهري متوافق مع ما في داخلي يعني قلبا و قالبا ... بانه مدخل من مداخل الشيطان الله يلعنه و انا بقولك هادا الكلام عن تجربة حيث انني لبست الحجاب بعد التلاتين من عمري رغم اني من اناصغيرة وانا عاوزة اتحجب و ما كنت عارفة ايش اللي مانعني..
كنت وانا صغيرة اقول كيف اتحجب وانا ساعات بقصر في الصلاة ..
كيف اتحجب وانا بجيب في سيرة الناس وبعدين الفكرة هادي اتخزنت
في العقل الباطن وانشغل الواحد بالدنيا لغاية ما الله اذن وحط شريط عمرو خالد عن الحجاب في طريقي ولقيت ان عدم لبسي الحجاب مالوش دعوة بخوفي من ان العرسان تطفش بالعكس شكلي بالحجاب اجمل
وماكنش ليه دعوة من ان الحجاب راح يتعارض مع الموضة لاني مش مجنونة موضة و برضه ماكانش ليه دعوة بالارصاد الجوية و صرت افكر
ايش اللي مانعني من الحجاب لغاية ماواحدة صاحبتي بعد عمرو خالد
اعطتني الدفعة للبس الحجاب .. عرفت اني اللي منعني هو الفكرة اللي انت بتقولي عنها و هي التحسين اولا وبعدين الحجاب

الحجاب فرض إسلامى صريح على المرأة .. أى أنه ليس إختياراً لها، تقبله أو ترفضه، بإقتناع منها أو على مضض منها

وبما ان الحجاب فرض ليس لنا فيه اختيار وتنفيذ الامر اللي مطلوب
منا دليل علي طاعتنا لله وايماننا به اذا الاخلاق وتحسينها واكتساب
صفات ماكانتش موجودة بييجي بعد تنفيذ الفرض لانه لو اتبعنا نفس
الفكرةوهي تاخير الحجاب لغاية ما الاخلاق تتحسن يبقي في ناس
مش راح تصلي لأنه أخلاقها وحشة إزاي ليهم الجرأة يوقفو بين ايدين
الله ويدعوه وهما بيكذبو وبينمو وبيغتابو وبيزنو
الخلاصة الواحد يعمل اللي مطلوب منه واللي الله كاتبه راح يصير
:flower:

من طرف مصرية الإثنين 21 يناير 2008, 6:11 pm

أنا طبعا متفقة في الرأي إن الحجاب فرض واجب. لكن هو فرض لإنه المفترض يساعد المحجبة إنها تتمسك بأخلاقيات دينها.

لكن أن ترتدي الحجاب ثم تسأم من المفروض عليها في الملبس فتبتدأ في لبس ما لا يليق والحجاب فأظن أنها بذلك إما تسخر من الحجاب الذي ترتديه أو تسخر من الناس الذين يرونها ترتدي الحجاب.

هذا من جهة؛ من جهة أخرى هي بهذه الصورة من الملابس المنافية للدين أو التصرفات المنافية للدين فهي تسئ للإسلام أيضا.
فيراها المعارضون للحجاب على أنها مثال للمسلمة فيكون القول: "هاهي المسلمة؛ تفعل كذا وكذا"

أصبح بذلك الحجاب مجرد زي بل أصبح زي غير مكتمل المعالم.

أنا بالطبع لا أهاجم الحجاب بل إنني والحمد لله محجبة إنما هي غيرة على ما يجب أن يكون عليه وما هو بالفعل علي في الأغلب.

والله أعلم

من طرف farida الأحد 23 مارس 2008, 1:23 am

بعد التشجيع
اسمحيلي يا مصرية اشارك في الموضوع
الحقيقة مشاركتي مش مناقشة الحجاب لان احترام الاديان واجب بفرائضه وطقوسه

مشاركتي بسبب خبركان بمثابة شاكوش خبط علي راسي قريته في جريدة روزاليوسف

لجات مؤخرا احدي الشركات الجديدة التي تعمل في مجال الاعشاب الطبية
الي قطارات مترو الانفاق
للاعلان عن خدمة جديدة تقدمها

اعشاب طبية تساعد في اطالة الشعر وتقويته ..تصلك الي حيث كنت
اللافت ان الشركة التي يتداول الحديث عنها بوصفها "اسلامية"
تقدم خدماتها للمحجبات فقط
المسئولون في الشركة اشاروا الي ان صناعة هذه الاعشاب
تاتي من منطلق ديني ..وانهم لا يقدمون لغير المحجبات

كي لا ياثموا

ويساهموا في تجميل شعر امراة سافرة

ممكن يكون فبركة صحفية مش ده اللي فارق معايا

الحقيقة الخبر في حد ذاته مش هو الهدف لكن قراءتي ليه
خلتني اشعر بضيق من مواقف ومضايقات لغير المحجبات
وفي نفس الوقت محتاجة اسمع كنت وجهات النظر المختلفة

الحقيقة بسمع كتير من بنات وسيدات لمضايقات بيتعرضوا ليها في المواصلات
وضيقي كمان للتفرقة اللي اصبحت سائدة تجعل مجتمعنا ينقسم علي ذاته
زمان مكانش فيه موضوع ادانة الغير بالطريقة المنتشرة حاليا في جميع الاوساط

ليه الحجاب بقي رمز للانسانة المحترمة فقط لكن الغير محجبة
بينظر لها علي انها غير محترمة خصوصا ان استعمال لفظ سافرة
اصبح له معني اخر غير الوجه المكشوف

بتمني تكون وجهة نظري واضحة لاني بناقش انقسام ابتدا يسري في المجتمع مع فرض بعض القيود
علي الاخرين ..
مرات صديق لنا محجبة حكتلي انها في عملها تتعرض لبعض المضايقات
ونقدها انها مش بتصلي معاهم في العمل وقت الصلاة ..
قالتلي مش المفروض حد يجبر حد لان الصلاة دي حاجة بيني وبين ربنا ..

حكايات سمعتها من مسلمات ومسيحيات ..
لكن مش ده برضه هدفي
لكن هو قلق وخوف علي مستقبل بلد ابتدت الناس فيها تحجب نفسها عن محبة بعضها

ابتدا يتخلق نوع من النفور بين البعض اكيد مش بعمم
لكن ظاهرة الانقسام والتفرقة بتسري بشكل رهيب
وهو ده اللي اصبح يقلق

من طرف مصرية الأحد 23 مارس 2008, 4:21 pm

أظن قصدك مفهوم يا فري
الحرية الشخصية على ما أعتقد هي حق مكفول للجميع دون استثناء أما ما يحدث اليوم ما هو إلا تشويه للدين فقط.

اللي أعرفه إن ربنا بيقول "ادع إلى ربك بالحكمة والموعظة الحسنة" يعني مفيش مانع تنصح بس المهم الاسلوب والتوقيت.

يعني لو أنا مقتنعة إن الحجاب فريضة إسلامية وشايفة صديقة أو زميلة في الشغل مش محجبة وعايزاها تعمل الفريضة، يبقى كل اللي أقدر أعمله هو إني أنصحها بيني وبينها ومش كل شوية لأ مرة واحدة ولازم تكون بمناسبة أو في حوار ما.
أما إني أعاملها على إنها إنسانة مش كاملة طبعا ده غلط وبيؤدي للنفور من النصيحة أو العند.

من نفس المنطلق ده صعب أفرق بين الناس في الشارع بالأسلوب ده، ووضع الإعلان بالطريقة دي على ما أظن مقصود لإثارة الفتن بين المحجبات وغير المحجبات سواء مسيحيات أو مسلمات غير محجبات.

من طرف aniD الأحد 23 مارس 2008, 5:17 pm

ليه الحجاب بقي رمز للانسانة المحترمة فقط لكن الغير محجبة
بينظر لها علي انها غير محترمة خصوصا ان استعمال لفظ سافرة
اصبح له معني اخر غير الوجه المكشوف

نقطه نظام يا فريده ...ده انطباع مش صح...و بالتالى السؤال برضه مش صح
مش عشان واحد و لا اتنين بيفكروا كده ..يبقى الناس كلهم كده

من طرف farida الأحد 23 مارس 2008, 5:39 pm

مصرية اشكر تفهمك لمضمون رسالتي
الحقيقة الاعلان مش هدفي لكن الدخان اللي ورا الاعلان
لان زي ما بيتقال مفيش دخان من غير نار
مفيش شك ان الصحافة واجهزة الاعلام عموما بتحوي كتير من الموضوعات
في مختلف المجالات شانها فقط اثارة الناس

لكن اللي بيحزن ان فيه واقع ملموس
مع احترامي يا انيد هما مش واحد او اتنين
انطباعي استحالة هيتبني علي شخض او مية

وعلي فكرة انا كتبت اني مش بعمم
لكن بامانة الموضوع بيتفاقم ..اصبحت التفرقة ملحوظة

ياريت ينفع اجيبلك حكاوي المناطق الشعبية وغير الشعبية
الموضوع مش بسيط لو احنا ما حاولناش ننشر توعية
ان احترام الجميع واجب

لكن لو فضلنا نقول بلاش نعمم ودول قلة
كل حاجة بتبتدي في اي حاجة بهمسة او كلمة او خطوة
وبتصبح كلمات تتوغل وتنتشر

مثل صغير زمان كان الراديو والتليفزيون هم وسيلة الاعلام
كان فيه تحجيم واختيارات دقيقة للمواضيع
لانه كان معروف تاثيرها علي المجتمع
كان استحالة يكون فيه مواضيع تثير بلبلة او حتي مشاهد تخدش الحياء

والاخلاقيات كانت احسن بمراحل

بقي فيه تطور اعلامي عن طريق تعدد القنوات الفضائية
ومعاها كل حاجة اتقلبت مقاييسها

ومن هنا قصدي ان كل حاجة بتكون صغيرة مع الوقت بتتضاعف
وصدقيني التفرقة بتزيد سنة عن سنة

وده لمسينه وعلي فكرة مش كمسيحيين بس لكن مسلمين ايضا
وبسمع الاراء من خلال ندوات بحضرها

علي فكرة بشكركم ااتاحتولي الفرصة اتناقش بهدوء floa

من طرف aniD الأحد 23 مارس 2008, 8:46 pm

اصبحت التفرقة ملحوظة

قصدك اى نوع من التفرقه يا فرى
يعنى انتى بتتكلمى كست مش محجبه
و لا بتتكلمى كست مسيحيه ...عشان تفرق ؟؟

من طرف farida الأحد 23 مارس 2008, 10:23 pm

بصي يا انيد مبدئيا احب اعرف نوعية التفرفة اللي بقصدها
زمان كنا بنمشي في الشارع فيه سيدات محجبات وفيه مش محجبات مش معروف
ديانة اي واحدة ..,مكانش حد بيهتم بطبيعة لبس حد
كان الموضوع عادي..

مكانش فيه تفرقة في النظرة وكان الاحترام شامل الكل

النهاردة التفرقة في المعاملة بالحكم علي المظهر ..

ويمكن وضحت في مداخلتي بان صديقة محجبة ومتدينة ومثقفة
اتعرضت لنقد لانها رفضت المشاركة في الصلاة وقت مواعيد العمل
لانها ضد ان حد يدينها
او يجبرها ..لانها علي حد قولها مش محتاجة حد يعرفها الالتزام بواجباتها الدينيه

وفيه سيدتين اعرفهم معرفة عادية مش عن قرب
في المناسبات بس بشوفهم
واحدة منهم اتحولت داعية
التانية حكتلي مرة انها اضايقت من نقض دائم من الصديقة الداعية
لانها مش لابسة حجاب
قالتلي انا عارفة كويس علاقتي بربنا شكلها ايه
ويوم ما اشعر اني عايزة البسه وانا مقتنعة هلبسه من نفسي

يمكن دول مجرد امثلة توضح وجهة نظري في نقطة التفرقة بالادانة عموما

النقطة دي بوضحها كسيدة مصرية زيي زي اي ست

لكن لو اتكلمت كمسيحية هقول برضه في بعض الاماكن بيكون فيه نظرة
عن نفسي بقت بتتعبني من الجنسين ..
بتشعرني كاني جاية من كوكب تاني
غير طبعا الحكايات اللي بتتحكيلي عن اللي بيحصل في المواصلات او الطرق العامة عموما من نقد دائم ليهم او كلام مش لطيف بيسمعوه

النقطة ان ليه مترجعش زي زمان كل واحد يلبس اللي يريحه
من غير ما ندين بعض والتدخل في الحرية الشخصي
ليه اصبحنا ماسكين دفتر حساب لاخلاقيات بعض

من ترتدي الحجاب تحترم وايضا من لا ترتديه
نفسي اننا منحكمش بالمظهر ونفرق ده وحش وده كويس
علشان نحافظ علي العلاقات والاواصر

غصب عني ياانيد وبكلمك كسيدة عادية بصرف النظر عن الديانة
فيه تمييزاصبح بيفرق في الحكم علي المظهر

واعتقد من وجهة نظري مش علامة صحية لمجتمع مليان مشاكل اكبر من الادانة والحكم علي المظهر

من طرف larno الأحد 23 مارس 2008, 11:07 pm

لانها ضد ان حد يدينها او يجبرها ..لانها علي حد قولها مش محتاجة حد يعرفها الالتزام بواجباتها الدينيه

" وتعاونو علي البر و التقوي " مش معني اني اقول لحد تعالي صلي او تعالي نصوم او بلاش تكدب اني باجبره علي كده ، بالعكس ده الي يحب حد يتمناله الخير ولما هو يفهم ان ده اجبار يبقي في قصور في تفكيرة ، ودي قضيته هو يحلها بنفسه

ويوم ما اشعر اني عايزة البسه وانا مقتنعة هلبسه من نفسي

الحجاب فرض علي المسلمات ، ماحددش اذا كانت مقتنعه ولا لأ ، وهنا مافيش حريه الاختيار

غير طبعا الحكايات اللي بتتحكيلي عن اللي بيحصل في المواصلات او الطرق العامة عموما من نقد دائم ليهم او كلام مش لطيف بيسمعوه

نادر جدااا اننا نسمع عن بنت كانت لابسه محترم ، بالمعني الصحيح للاحترام ونسمع ان حد جرحها بكلمه او ضايقها في مواصله ولا في الشارع، قد يكون في بس نادر اوي،

ليه مترجعش زي زمان كل واحد يلبس اللي يريحه

علشان احنا مجتمع له عادات و تقاليد، الي بيخالف العادات دي بيعتبر شاذ في مجتمعنا
وبعدين لو علي الحريه... بسيطه البنات حرة تلبس الي هي عايزاه و الشباب حر يقول الي هو عايزة... وتبقي خلصت

من طرف مصرية الأحد 23 مارس 2008, 11:27 pm

" وتعاونو علي البر و التقوي " مش معني اني اقول لحد تعالي صلي او تعالي نصوم او بلاش تكدب اني باجبره علي كده ، بالعكس ده الي يحب حد يتمناله الخير ولما هو يفهم ان ده اجبار يبقي في قصور في تفكيرة ، ودي قضيته هو يحلها بنفسه

أيوة يا لارنو بس ده لو النصيحة كانت بالأسلوب اللي بتتكلمي عنه، لكن في أسلوب بيكون منفر.

حوضح قصدي بمثال: يعني لو إنتي وواحدة صاحبتك مسافرين مع بعض لأي سبب وصاحبتك دي مش بتصلي، مش من حقك مثلا تعاقبيها أو تكلميها بأسلوب مش ظريف لإنها مش بتصلي.
وفي نفس الوقت لو كل صلاة بتسمعيها كلام عن تقصيرها في الصلاة برضه حيسببلها نفور.

أما الأسلوب الأمثل من وجهة نظري: "ادع إلى ربك بالحكمة والموعظة الحسنة" يعني ألفت نظرها بس مش كل مرة ولما أقولها يبقى مرة بهزار ومرة بأسلوب حكاية عن شخص تاني وكده يعني.

فاكرة حكاية الحسن والحسين لما شافوا واحد بيتوضى بطريقة غلط، عملوا إيه؟
عملوا نفسهم بيتخانقوا وقالوله افصل بينا، كل واحد فينا بيقول إن هو اللي بتوضى صح والتاني لأ.
قالهم: وروني بتتوضوا إزاي.
اتوضوا هم الاتنين بنفس الطريقة، وبعد ما خلصوا سألوه: إيه رايك؟ مين فينا صح ومين غلط؟
قالهم: إنتوا الاتنين صح وأنا غلط.

ده اللي قصدي عليه، نوصل النصيحة باسلوب لا يثير حفيظة الإنسان اللي قدامنا لإن في الأغلب المقصر بيكون في موقف ضعيف وعلشان يحمي ماء وجهه ويداري إحراجه ممكن يعاند أو يتضايق أو يكابر، الشيطان له دور كبير هنا لذلك أظن إن من واجبنا علشان نتعاون على البر والتقوى إننا نعرف إزاي نقطع الطريق عليه.

الحجاب فرض علي المسلمات ، ماحددش اذا كانت مقتنعه ولا لأ ، وهنا مافيش حريه الاختيار

أنا طبعا معاكي في الكلام ده وأنا الحمد لله محجبة لكن برضه مفيش حاجة بالعافية
الحلال بين والحرام بين
واللي عايز ده ياخده واللي عايز ده ياخده
مازلت عند رأيي حتى في دي مليش غير حق النصيحة

والله أعلم

من طرف farida الإثنين 24 مارس 2008, 2:29 am

" وتعاونو علي البر و التقوي " مش معني اني اقول لحد تعالي صلي او تعالي نصوم او بلاش تكدب اني
باجبره علي كده ، بالعكس ده الي يحب حد يتمناله الخير ولما هو يفهم ان ده اجبار يبقي في قصور في تفكيرة ، ودي قضيته هو يحلها بنفسه

عزيزتي لارنو مش موضوع قصورفي التفكير طبعا زي ما وضحت انها انسانة متدينة جدا لاني عارفاها كويس
وانسانة علي درجة عالية من الثقافة...الموضوع لما يكون نصيحة بود اكيد مش هتكون منفرة

لكن اسلوب النقد ليها انا عن نفسي معاها مش من حق حد يحسس الاخر
انه مقصر ..انصح حد لكن اسلوب الفرض والاجبار مرفوض ..
مين في الدنيا صح مية في المية ..

الحجاب فرض علي المسلمات ، ماحددش اذا كانت مقتنعه ولا لأ ، وهنا مافيش حريه الاختيار

الموضوع مش مناقشة تعاليم وفروض دينية ..لكن عن اسلوب الهداية ..ربنا اللي هيحاسبنا علي تصرفاتنا
مش البشر ...يعني الهداية من الله
مش معني انها رافضة اسلوب من شخص يبقي هي مش ملتزمة

نادر جدااا اننا نسمع عن بنت كانت لابسه محترم ، بالمعني الصحيح للاحترام ونسمع ان حد جرحها بكلمه او ضايقها في مواصله ولا في الشارع، قد يكون في بس نادر اوي،

لارنو حبيبتي لما هتكلم عن التفرقة اكيد بقصد وبقارن مع ناس برضه ملتزمة في سلوكها وفي ملبسها
مش ممكن الكلام هيكون عن لبس خارج او مش حشم
ساعتها مش هيكون من حقي ادافع واطالب بعدم التمييزاللي برضه بيؤدي للتفرقة

علشان احنا مجتمع له عادات و تقاليد، الي بيخالف العادات دي بيعتبر شاذ في مجتمعنا
وبعدين لو علي الحريه... بسيطه البنات حرة تلبس الي هي عايزاه و الشباب حر يقول الي هو عايزة... وتبقي خلصت

اللي بتكلم عنهم باماااااااااااااانة بيكونوا حشمة
لكن بيتعرضوا في وسائل المواصلات من ستات ومن رجالة مش لمعاكسة لكن لكلام ادانة واحيانا جارح علي انها غير مغطاة الراس
عن نفسي لما بنزل من بتنا لازم اتاكد اني مديش فرصة اسمع كلمة
وبالرغم كده بتعرض في بعض الاماكن لنظرات كاني من كوكب اخر..
مش معاكسات
لاني اللي بقصده مش معاكسات شباب لشابات او رجل لامراة نتيجة لبس غير ملتزم ..
ده موضوع تاني
يعني ملوش علاقة اكيد بمخالفة عادات وتقاليد كلنا اتربينا عليها
لكن الموضوع اصبح خاص بنظرة مجتمع
لم نعتدها من قبل

فيه نقطة عايزة اوضحها انا مش بتكلم او اتناقش عن فرائض دينية
بتكلم عن التفرقة في االمعاملة التي سادت مجتمعنا
تفرقه بتقسمه فعلا نتيجة انشغالنا بادانة الغير

ازاي بالتفرقة دي هنربي اجيال متوازنة نفسيا ...

الموضوع ليه فيه تناقض بمطالبة حريات وفي نفس الوقت عدم احترام حريات الاخرين

مصرية كلامك طبعا صح ..

يا جماعة الكلام مش كلام عن صحة الحجاب اكيد مش ده قصدي
لكن عن نظرة مجتمع اصبحت مش من قلة لكن نظرة بتتفشي صدقوني الكلام مش نظري
ولا الكلام عن قلة
مش لوحدي بسمعه ومش لوحدي بقوله ومش لوحدي اللي لمساه
وبحضر ندوات لنخبة مثقفة وعلي درجة عالية من الوعي الفكري من المجتمع
بيحذروا لما سيؤل له حال مجتمعنا

معلش يا بنات انتوا بتعيشوا في مجتمع مختلف تماما عن مجتمع انا عشته
الناس فيه كانت متالفة ومتحابة ..

بدافع عن مجتمع اتمني يرجع ليوم ساعتها هتفهموا انا بقول ايه وليه
كان مجتمع قوي اساسه الحب ومثل ومباديء واخلاقيات وطبعا اساسه التزام ديني

سعيدة بجد بتحاوري معاكم واتمني اكون اتفهم قصدي صح

عايزين نزرع في مجتمعنا وردة الحب صافي

من طرف aniD الإثنين 24 مارس 2008, 11:34 am

مبدئيا انا حأتكلم عن الاحتشام مش عن الحجاب
لان الحجاب كزى شرعى مفروغ من اهميته

لارنو انا متفقه معاكى جــــــــدا فى كل اللى بتقوليه فعلا تعاونوا على البر و التقوى و فعلا اللى بيلبس لبس خارج بيعّرض نفسه لمضايقات و الحجاب فرض
تعالى بقى لكل جزء منفرد
تعاونوا على البر و التقوى و انصحوا بعض...بس ازاااااااااااااااااااااااااااااااى ...هى دى النقطه مش مهم انك تنصحى المهم الطريقه.
"فبما رحمة من الله لنت لهم، ولو كنت فظاً غليظ القلب لانفضوا من حولك، فاعف عنهم واستغفر لهم وشاورهم في الأمر"
يعنى ممكن واحد يكون متدّين جدا و فعلا عايز للى قدامه الخير بس طريقه دعوته للخير دى منفّره ...أو فيها تعالى
و على فكره ده مش الحجاب بس ممكن واحد يقول لواحد قوم صلى(اهم اتنين رجّاله زى بعض الموضوع مفيهوش لا احتشام و لاا حجاب) و تتقبلها من واحد وواحد لأ ...ليه عشان طريقه الدعوه.

أأقرب الفكره اكتر قبل ما اتحجب كنت فى مكان بنضطر نصلى فيه شباب و بنات و كان معانا زميّل أمام فى مسجد و بيصّلى بينا و مكنتش انا الوحيده اللى بشعرى ....عمره ما قال لحد لا متصليش معانا عشان لبس..حتى لما كان يتكلم كان يحطها فى شكل دعابه ...
بعد تفرق السبل ..تصرفه و سلوكه كان دايما فى بالى ..و كان احد الاسباب اللى خلتنى أفّكر اتحجب..رغم ان عمر نصيحته ما كانت مباشره .

الحجاب فرض على عينى و على راسى ...محدش اتكلم ...بس انهى الاحسن تلبسيه مقتنعه انه فرض و صيانه ليكى و لا تلبسيه عشان هو فرد بدون التفكر فى اسباب فرضيته.
يعنى لما الاقى طفله عندها سبع سنين لابسه طرحه بأندهش..لان اهلها صادروا على اقتناعها ..دى الصلاه الطفل الصغير مبيتضربش عليها .
لما انتى بقى تنصحى واحده ..البسى الحجاب لازم تقتنع و الهدايه تكون داخليه يا فرحتى بواحده سمعت شريط لداعيه فلبست الحجاب و بعد يومين زهئت و قلعته..ده ليه عشان هو مش يقين هى خدت من الفرضيه المظهر

اخر حاجه بقى :اللبس دلوقتى بيتقسم من غير الحجاب يعنى يا لابسه محتشم يا مش محتشم
يعنى اتنين معديين واحده لابسه حجاب و تيشرت قصير او بنطلون ضيق..وواحده لابسه تيشرت فضفاض و لامه شعرها ...مين فيهم اللى حتتعاكس!!

خلصا من لارنو :-*-:
فريده بقى
بصى يا فريده بأختصار التعليق على المظهر دلوقتى مبقاش يخص لادين و لا فئه عمريه و لا فئه اجتماعيه معينه
ده بقى ظاهره زى ظواهر كتيره فى حياتنا و انك تتوقفى عندها بصفتّك كشخص غير مبرر
سيبك من مين مسلم و مين مسيحى و مين بشعره و مين محجب..شيلى كل ده و بصى فى العموم
أأقرى الجرايد شوفى كام واحد قتل حد من قرايبه أو من جيرانه (مسلمين زى بعض او مسيحين زى بعض)
كام خناقه و كام حادثه اغتصاب
يا عزيزتى كلمه الــود بمعناها الواسع مفقوده فى مجتمعنا ككل ...فكون انتى تتضايقى فيه افراط فى الحساسيه

من طرف larno الإثنين 24 مارس 2008, 12:36 pm

مصريه، انيد، فري
طبعا الاختلاف في وجهات النظر لا يفسد للود قضيه ولا ايه
انا مش باقول ان النصح يبقي فيه غلظه، لازم يبقي باللين وكل الي انتو قلتوه ده صح، بس الفكرة ان حتي لو حد قالي نصيحه بطريقه وحشه او جامده، لازم انا من جوايا اكون مقتنعه ان ده لمصلحتي
حكايه بقي ان الواحده تتحجب لما تقتنع ....دي انا مش قادرة اقتنع بيها خالص
علشان لازم ننفرق بين الفروض و الطاعات
لما البنت تتحجب وهي مش مقتنعه بتثاب علي تأديه فرض من الفروض، وطول ماهي مش محجبه بتاخد ذنوب، والي اتحجبت علشان سمعت شريط و بعد فترة قلعت الحجاب، طب ماهي لما لبسته ساعه ماسمعت الشرط اقتنعت بيه،بس بعد كده شالته علشان مش مقتنعه بيه ؟؟ ولا علشان شهوة الحياه ؟
طب ينفع نقول الكلام ه في الصلاه ؟ مش هي احد الفروض برضو ؟ ينفع حد يقول انا مش هاصلي الا لما احب الصلاه ؟؟

من طرف aniD الإثنين 24 مارس 2008, 1:00 pm

حكايه بقي ان الواحده تتحجب لما تقتنع ....دي انا مش قادرة اقتنع بيها خالص
علشان لازم ننفرق بين الفروض و الطاعات

يا لارنو محدش قال تتحجب لما تقتنع ..بنقول الحجاب عن قناعه أفضل
الصلاه بناخد الثواب عليها درجات...ممكن كلنا نصلى جماعه و كل واحد ثوابه على الصلاه يكون غير التانى ..صح و لا لأ
كذلك الحجاب..كل ما تكونى مقتنعه كل ما يكون احسن مش فى الحجاب بس على فكره فى كل امور الدين بيتهيألى ان احسن خطوه الواحد ياخدها تجاه ربنا الخطوه اللى هو متأكد انه مش حيرجع فيها مهما كانت صغيره ..يعنى انا قعدت فتره طووووووووووويله افكر اتحجب..مش عشان مش مقتنعه بفرضيته ..بس عشان ساعه ما البسه ابقى عارفه انها خطوه مفيهاش رجوع .

و بعدين الاعمال بالنيات
يعنى واحده جالها عريس اشترط انها تتحجب ..خير و تدين و كل حاجه بس ده حجاب مسبب مش بعيد تشيله بزوال السبب
واحده اتحجبت عشان شعرها وحش..يوم ما الفلوس تجرى فى ايديها حتعمل نيو لوك
واحده على راسها طرحه و صوت ضحكها جايب لاخر الشارع محتشمه على عينى بس فين الاحتجاب فى ده !!
الفنانه اللى بتلتزم بالزى الاسلامى اللى هو اصلا الغرض منه مش االشهره و كل يوم فى قناه فضائيه (هل كده هى بعّدت عن شهوات الدنيا)
الاقتناع هو اللى يخللى ده ميحصلش...الاقتناع يخللى الحجاب سلوك قبل ما يكون مظهر ..يعنى مش بس و انتى بتدورى على هدوم بتفكرى فى حاجه تناسبك كمحجبه
و انتى بتتصرفى و انتى بتتكلمى و انتى بتتعاملى مع الناس.
موافقه معاكى انه احسن من مفيش و ما لايؤخذ كله لا يترك كله
بس برضه مش من حق حد ..يعيّن نفسه وصى الا بالحسنى

من طرف المشـ دفء ـاعر الإثنين 24 مارس 2008, 1:32 pm

انا حتكلم من منظور سنه فاتت لاني منزلتش مصر من سنه بالظبط
اللي لاحظته ان تقليد الغرب اصبح هو الاساس في كل شئ واكتر في اللبس الموضه وفي التصرفات حتي العادات بدات تتغير للغرب صحيح في نسبه كبيره من الناس المنتقبات بدات تظهر ودور تحفيظ القران اللهم زد وبارك لكن برضو التبرج واضح جدا في المجتمع والتبرج مش مقصور فقط علي الناس الغير محجبات لان الحجاب دلوقتي فعلا بعضه اصبح موضه وموضه حقيره حتي النقاب في ناس لبساه موضه لا في احترام للحجاب ولا في احترام للنقاب
تلاقي البدي والبنطلون المحزق وفوقه الطرحه الصغيره والا الاسبنش اللي طلع موضه ده انا عن نفسي المنظر ده بيقززني لان دي صوره سيئه جدا للحجاب اللي امرنا به الله عز وجل (نساء كاسيات عاريات مائلات مميلات ) عين في الجنه وعين في النار عايزين يعملوا اللي ربنا امر به وفي نفس الوقت يواكبوا الموضه وطبعا بما ان الموضه قادمه من الغرب فيستحيل توافقها مع دينا وعادتنا وتقاليدنا. ونرجع نقول الشباب بيعاكس ليه وانشار الاغتصاب والتحرش ليه مهو كله من اللي شايفينه سواء كان في الشارع او في التليفزيون والقنوات الفضائيه والاغاني كل ماهو يحرك المشاعر والشهوات امام الجنسبن اذا كان شباب او بنات مما ادي للزنا وانتشار عادات غربيه محرمه في ديننا. كل اللي في دماغ الشباب حاليا هو الشهوه والتفكير في الجنس الاخر .. مش عايزه اتنقل لموضوع تاني مش بتاعنا
بس في النهايه احب اقول ان فعلا الحجاب اللي انا شفته من سنه فاتت لا يمت للحجاب بصله لا من قريب ولا من بعيد طبعا مش كله بس ده اللي كان دارج وكل فين وفين لما تشوف حد لابس الحجاب ومحتشم اتمني تكون الصوره دي اتغيرت في السنه اللي انا غبت فيها عن مصر.

من طرف aniD الإثنين 24 مارس 2008, 2:00 pm

اتمني تكون الصوره دي اتغيرت في السنه اللي انا غبت فيها عن مصر

طبعااااا اتغيرت بقت أوحش €€€€

الحجاب: هل هو ظاهرة؟

هل الحجاب الآن يمثل الحجاب الإسلامي؟

الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟

رد: الحجاب: هل هو ظاهرة؟