يوميات بلا حدود..

يـــا جماعه تيجوا نفكر هنعمل اكل ايه اول يوم رمضان ؟ انا هبدا كمان
هو دايما اول يوم يا اما بيكون مكرونه بالبشاميل يا اما حمام محشي
وانتوا؟

(((من طرف bosaina في الثلاثاء 27 يوليو 2010, 12:22 pm

يـــا جماعه تيجوا نفكر هنعمل اكل ايه اول يوم رمضان ؟ انا هبدا كمان
هو دايما اول يوم يا اما بيكون مكرونه بالبشاميل يا اما حمام محشي
وانتوا؟ )))



معقول كدة من اول يوم , ايه مكرونة بشاميل وحمام محشى ده انتى كده على اخر رمضان حتبقى اتنين بثينة فى بعض ومش حتعرفى تدخلى من باب المنتدى .

هى الشوربة وبعد الصلاة بتكون حتة فرخة او بفتيك مع طبق السلطة ودمتم , وممكن بعدها نحلى بخشاف او فاكهه .

ماهو ده بيتعمل بس انا مباكلش ههههه
ده انا عايشه علي الهواء بس بتنفس واتخن اتنفس واتخن هههههههه

كل سنة وأولدنا العزيز طيب وبخير، وأدهمنا العزيز طيب وبخير وبثينتنا العزيزة طيبة وبخير وسمسميتنا العزيزة طيبة وبخير، وكل الغايبين مؤقتاً عنا طيبين وبخير

واتفضلوا معايا مؤقتاً على ما رمضان يوصل إن شاء الله

قاعد بأكلمكم هنا وبأكلم بثينة فى ياهوو ومعطلانى عن انى أبدأ أتغدى من الطبق ده ..
صنعة إيديا وحياة عينيا
أكياس جزل سمك جاهزة وتسخين فى الميكروويف وعالطبق عدل

بجد احلي حاجه الشوكه والسكينه ههههههه
انا مبحبش السمك اتفضل ايه؟
ومبحبش اللمون اتفضل ايه؟
كمان بتقول اني بكلمك يبقي هتفضل ليه؟؟
كوبه

بس يا بنت

حد يفهمها القيمة الغذائية للسمك يا اخواننا .. أنا تعبت

مسكت السمك وسبت اللمون

حكمة اليوم:

الناجحون يبحثون دائماً عن الفرص لمساعدة الآخرين ، بينما غيرهم يسأل اولاً : ما الذي سأستفيده من تقديم يد المساعدة.

براين تريسي‬

يعني انت عايز ايه دلوقت؟

مساء الخير علي كل الصحبة الحلوة ويارب كلكم تكونوا بخير
حاضرين وغايبين وسلام خاص للعزيز اولد مان الغائب

غيابي الفترة اللي فاتت انا كتبته من صفحتين وكنت كتبت كده

يوم الخميس سي السيد يا حرام هيعمل عملية مش لذيذة في اسنانه للاسف شوية معقدة
فاعصابه بايظة وطبيعة الرجالة وهي عيانة لازم تعامل معاملة الاطفال

والاسبوع اللي بعده هسافر
فلو اتارت في الكتابة اعرفوا انه اسباب عائلية قهرية
لكن هحاول اخطف تخاطيف كل ما يكون قدامي فرصة

والفترة اللي فاتت كانت فعلا مرهقة جدا يومي كان بيبتدي من ستة الصبح فكنت بوصل بالليل مش قادرة افتح عيني

لكن اشكر ربنا الامور استقرت

انا دخلت مخصوص النهاردة اعيد علي كل الصحبة الحلوة بمناسبة حلول شهر رمضان
وبعيد من قلبي علي كل اسم حاضر وغائب و
بقولكم


مسافرة يوم الجمعة الساعة 6و نص صباحا رحلة لسوريا ولبنان
ويمكن ارجع بعد اول رمضان

ورمضان كريم علي كل الصحبة الحلوة واشوفكم يارب دايما علي خير

صدقوني دخلت مخصوص اعيد عليكم لان وقتي بكرة مش في ايدي

ونهاركم سعيد

ميرسى يا ارق فيرى صباحك سكر وعسل
وكل رمضان وانتى بألف خير

تروحي و ترجعي بالسلامه يا فيري
حاتوحشينا كتير و حانفتقد مداخلاتك الحلوه
وزي ما انتي معودانا .. حانستني منك اخبار الرحله بالصوت و الصورة
ويعني ماتتأخريش .. يوم في سوريا و يوم في لبنان وترجعي علي طول ..قشطه الكلام !

فرافيرووووووووو

توثيق كامل للرحلة بالصور كالعادة ... مش حأوصيكى

مساء الفل ..

العزيزة فريدة .. اجازة سعيدة ومتطوليش كتير واكيد اكيد حتوحشينا

ومتنسيش الكاميرا وتحطيها فى الشنطة من بالليل وحنستنى التغطية الصحفية الرائعة دايما واللى اتعودنا عليها

سوريا ولبنان حينوروا بيكى تكرم عينك

ونشوفك على خير يعطيكى العافية

سسسسسسسسسسسسسسسسسسسسسسسسسالخيييييييير عالصحبة الحلوة
وعالموجودين هنااااااااااااااااااااا وحشتووووووووني جدااااااااا جمعااااااااااااااء
حاضرين وغايبين
وجاااااااااتي بجد وحشااااااااني ومش عارفة هي ليه علي بالي اوي اليومين دول و مش عارفة اتصل بيها خاااااااالص

انا بعتذر طبعا كان المفروض انزل الرحلة واشارك بمداخلات بس للاسف بجد كل يوم بيكون فيه حاجة وبيطير اليوم
واكيد معاكم كمان بيحصل نفس الشيء

ومشغولة شوية برعايتي لمامتي وسي السيد عنده اليومين مشكلة في الفقرات فمحتاج شوية رعاية
بصراحة صعبان عليا عملية اسنانه ووراها موضوع الفقرات

بس اشكر ربنا بيتحسن

بجد نفسي انزل الرحلة بس محتاجة اظبط وقتي علشان اعرف اركز علشان اقول قوالة عن سوريا ولبنان

يارب تكونوا كلكم بخير
وسعيدة برجوعك يا هرم جدا

والي ان نلتقي

تصبحوا علي خييييييييييير ونهااااركم سعييييييييييييد

سعيدة مبارك يا ضرب الودع وحشتينا ووحشتنى تؤمك سكينه جداّ بس انا شفت لها

صورة جميله جدا جدا على الهوت ميل لان إميلها مضاف عندى ومن موقعى هذا

سعيدة بتواجد الهرم من جديد وتواجد اوسكا ويارب ميكنش بس بيهل علينا زى بابا

نويل مرة واحده فى السنه

تواجد كل الاعضاء بيعطى للمنتدى حيويه ونشاط

وغياب اى عضو عن جروب المنتدى بيخلى فى روح ناقصه تخص فقط هذا

العضو وتميز المنتدى بتواجده دون غيره فكل واحد منكم له طريقته الخاصه فى

الكتابه والتعبير عن وجهات نظره إزاء المواقف المختلفه اجمل حاجه أمبارح لما

بفتح المنتدى وجدت على اليمين شريط اخر الأشتراكات وجدت اوسكا اوسكا اوسكا

ويا عينى فكرنى بالتلميذ اللى كان عنده واجب نصف العام وقبل انتهاء الاسبوعين

بيوم واحد مسك كل الكراسات وفضل يكتب فيهم بسرعه

وده غير الهرم الموهوب جدا فى إعادته فتح القصر من جديد

صباح الخير على كل الموجودين فى المنتدى فردا فردا اللى فاتحين دلوقتى حالا واللى حيفتحوا بعد ساعه يلقو نظره واوام اوام يقفلو تانى من غير ولا كلمه سكتم بكتم
يا ترى فين اراضيك يا د. ادهم للدرجه دى غضبان علينا ومش راضى تدخل هنا ولا مرة واحده طيب تحب اوقع مثلا واقول عيد ميلاد لارنو وسيسامى عدى من غير اى تهانى قلبية وكمان قمروة وكتب كتابها

عموما انا حبيت بـــــــــــــس أهدى النفوس مش أكثر ولا أقل

أحلى صباح وأجمل مِسا على كل المصريين وكل ٦ أكتوبر وأنتم في عز وكرامة وأمان وسلام

تهنئة من القلب لاخواننا المسحين بمناسبة عيد الغطاس
اللهم أجعل كل أيامنا القادمة مليئة بالخير
وأذهب عنا يا الله برحمتك الغمة إن فرجك قريب
كل سنة وانت طيبة يا فيرى ويا اوسكا ويا سمارت وكل عيد وانتم بخير دائماّ

يا عالم طَمِّنوني عليكم .... فينكم يعني لو انشغلتو الأيام اللي فاتت قبل 25 يناير متهيألي ورغم الظروف اللي بتمروا فيها هلأ من التاريخ ذاته فأنا عاوزة أطمئن عليكم وعلى أحوالكم .... انتو وكل اللي في مصر أهلي فما توجعوش قلبي أكتر ما هو موجوع

شكرا لك يا مواضيع عن سؤال فينا كلنا
انا اهو بتكلم نيابة عن نفسى انا بخير ولو انى كنت اتنمى اكون مع الشهداء اغادر تلك الدنيا بما فيها
وحشنى جدا المنتدى العظيم ده والله العظيم وحشنى الكتابه اليه يعنى هل المنتدى الذى شهد الطكثير من النقد لكل ما يحدث فى بلدنا من بلاوى يعنى مالوش نفس يحتفل معانا ويتنفس بهواء الحرية
لو انا حطيت المنتدى ده فى دماغى وقررت ان لازم نتحمس من جديد صدقونى روح الحماس سوف تنتقل لكم بتعويزة سحرية مظبوطه

وسلام لاجمل جروب على وجه الارض جروب مصريات

اسف جميعا على عدم وجودى فى الفترة الماضية واعتذر عن التقصير.

اتمنى الكل يتواجد من جديد ونرجع من تانى اسرة واحدة تحب مصر.