حريق في المسرح القومي في القاهرة

للاسف حزنت جدا لاني كنت بحب جدا عراقة المسرح القومي
واخر مسرحية حضرتها كان زكي في الوزارة للفنان حسين فمي
وبالصدفة كنت صورت يومها المسرح في الموضوع ده

https://masreyat.yoo7.com/montada-f5/topic-t128.htm


العجيب بقي ان عمرو اديب بعد حديث تليفوني مع وزير الثقافة
اللي اكد ان الحريق محدود بسبب قرب المطافي من المسرح



اذهلني تعليق عمرو اديب بعد حديثه مع الوزير
قال اننا لازم نجمع بعض العلماء الدينيين الموثوق في تقواهم
ان يقوموا بالدعاء لمصر
وقال بالحرف اصل اللي بيحصلنا مش طبيعي وده غضب من ربنا
لان مفيش بلد من حوالينا بيحصلها الكوارث اللي بتحصلنا


بصراحة كنت مذهولة ..اكيد الدعاء لحفظ بلدنا بيكون مع كل صلاة
سواء بوجود كوارث اوحتي لوكان الامن مستتب
والدنيا وردي

كان المفروض يقول لابد من بذل مجهود اكتر من الكبير والصغير
المفروض نتحمل كلنا مسئولية بلدنا نعمل اللي علينا الاول
من الامير للغفير ويكون اتكالنا علي ربنا واحنا بنقوم بواجبنا

مش كل ما تحصل حاجة نحمل الحكومة ونقول غضب ربنا
يعني البلاد اللي بيحصلها اعاصير وزلازل ودمار
دي نقول ثورة غضب ربنا عليهم
بجد الكلام ده بيستفزني

بصراحة لازم نعمل اكتر ما بنتكلم

طول ما احنا بنهاجم وبس هنرجع عشرات الاميال للخلف

سوري معلش مستفزة اصلي من كلام عمرو بصراحة

اللهم انى صائم ~~~ :QQ:

أوسكا

شكرا على الموضوع أنا فعلا عرفت من هنا قبل ما أعرفه من أي مكان تاني.

فريدة
قبل ما نتكلم دي وصلات برنامج عمرو أديب علشان لو حد مشفهوش:

الجزء الأول

الجزء الثاني

الجزء الثالث

الجزء الرابع

الجزء الخامس

الجزء السادس

كان المفروض يقول لابد من بذل مجهود اكتر من الكبير والصغير
المفروض نتحمل كلنا مسئولية بلدنا نعمل اللي علينا الاول
من الامير للغفير ويكون اتكالنا علي ربنا واحنا بنقوم بواجبنا

ما هو قال كده فعلا في أول البرنامج والوزير كمان قال إن في ناس معندهمش ضمير هم السبب في وجود أسلاك ضعيفة وهي اللي أدت للحريق.

بس اللي قاله عمرو بدون تحميل الحكومة أي حاجة إن الكوارث المتلاحقة دي مش طبيعية، يهني الجبل اللي وقع فوق أصحابه ومجلس الشورى اللي ولع والمسرح اللي اتحرق، أيوة كلها من الإهمال لكن ربنا بيسبب الأسباب بيسلطنا على نفسنا، مجرد قلة الضمير اللي متفشية في المجتمع دي تعبير عن غضب ربنا علينا، الحرب اللي دايرة بين الأهالي والشرطة في الدويقة واسطبل عنتر دول غضب من ربنا.

الموضوع مش تحميل كل حاجة للحكومة بس هو فعلا الإهمال بسبب قلة الرقابة، حسين فهمي قال إنه بلغ أكتر من مرة عن أصوات خارجة من لوحة الأسلاك وكان تعبيره: "أصوات مرعبة" طيب فين الإدارة علشان تتابع وفين الإدارة المسئولة عن الإدارة وتدرجي بقى في الهرم الإداري لغاية رأس الإدارة المسئولة.

يعني لما ييجي الوزير يقول "مفيش حاجة اتحرقت غير المسرح والستارة" ولما يتكلم عزت العلايلي يقول" أهم حاجة في المسرح هي المسرح نفسه والمنطقة المحيطة به بما فيهم الستارة"، يبقى الوزير بيتفه الموضوع علشان لا يثير الرأي العام.

نتكلم على الكوارث التانية بقى ودور الحكومة فيها،
فين الحكومة من احترق مجلس الشورى؟
مفيش رد لغاية دلوقتي ولا تقرير بيقول عن الأسباب ومفيش حد متهم وحتى الأخطاء اللي اتعرفت محدش اتعاقب عليها.

عملت إيه الحكومة للناس بتوع الدويقة؟
حاصروهم لدرجة إن الأهالي بيقولوا عن إنفسهم إنهم "أسرى حرب"

عملت غيه الحكومة للناس بتوع اسطبل عنتر؟
طردتهم وهدت بيوتهم ورمت المسنين في الشارع.

النتيجة:
أهالي الدويقة يهددون بقطع الأوتوستراد
أهالي اسطبل عنتر يهددون بنسف الطريق الدائري بأنابيب البوتجاز ويهددون بتفجير أنفسهم.

يعني ممكن تتحول لمصيبة مذبحة من أهالي العشوائيات.

لما عمرو قال ندعي، قال أنا بقول كده من اليأس، والوزير رشيد زعل من الكلمة دي، لكن أنا حاسة برضه مش بيأس عل قدر ما هي إحباط شديد.

أعذريني بس الموضوع تعبني اوي خصوصا بعد أخبار الدويقة واسطبل عنتر اللي في الجرايد ومبتهداش كل يوم أضيفي ده للصدمة من اللي حصل من أحد كبار رجال الأعمال في مصر وأعضو مجلس الشعب هشام طلعت مصطفى، واللي بيحصل مع القضاة وتهمة الرشوة الموجهة لفريد خميس أحد أكبر رجال أعمال مصر أيضا وأحد أعضاء مجلس الشعب أيضا وغيره وغيره.
ومع كده أنا على فكرة مش مع عمرو أديب في موضوع الدعاء لإنه ممكن يعمل مشكلة كبيرة مع الحكومة، مصر في غنى عنها في الوقت ده، كل واحد يدعي لوحده ويصلح نفس وربنا يهدي الجميع ويرحمنا ويهدي أصحاب الضمير الميت.

هشام

اللهم انى صائم

في انتظار ردك بعد ما تفطر.