الاشتراكية والرأسمالية

تختلف الدول في أنظمة إدارتها لشئونها فمنها الاشتراكي ومنها الرأسمالي. أيهما تفضل ولماذا؟

كانت مصر وحتى العام الماضي دولة اشتراكية وفي التعديلات الدستورية الأخيرة تحولت إلى النظام الرأسمالي فكيف تراها مستقبلا؟
وما هي مميزات هذا التحول وما هي مساوؤه؟

والله يامصرية الموضوع ده كبير جدا جدا

وفى نيتى والله اعلم بقى هتحصل ولالا و ربنا كرمنى وعملت رسالة ولا حضرت عفاريت هيبقى عن الموضوع ده

عموما النظامين ليهم مزايا وعيوب ويعتبروا نظامين معاكسين
واكيد عارفين عيوب النظامين ومزاياهم
وعلى فكرة مصر فى طور التحول للراسماليه اى مازالت فى مايسمى بالنظام الاقتصادى المختلط يجمع بين الاشتراكية والراسمالية وطبعا ده كل دول العالم التالت الساعية للخروج من المرحلة المظلمة بتكون فى المرحلة دى منها ربنا يكرمه ويفرجها عليها وتطلع ومنها الى بتفضل فيها وتنزل وطبعا ده بيكون حسب الخطة الموضوعه للدولة .

انا عموما رغم دراستى المحدودة انا لى ليا رئي صغير
ان الحل الوحيد بجد للمشكلة الاقتصادية فى مصر هو النظام الاقتصادى الاسلامى ده فى رئيى مش بقو دولة اسلامية بقول نظام اقتصادى اسلامى
من وجهة نظرى المتواضعه ان ده اسلم واحسن حل اقتصادى هيخرجنا من الضياع الى احنا فيه لا ان احنا زى الى بيرقصوا على لسلم لا بيطلعو ولا بينزلو بنتزحلق .
هو النظام الاسلامى قريب من المختلط بيجمع مابين مزايا الاشتراكية ومزايا الراسماليه لكن بحدودو لكل حاجة الى جانب نظم تعاليم اسلامية بتحافظ على العدل فى المجتمع
ده رئيي الشخصى

تعالى هنا إنت رايح فين
بتقول دراستك حتكون فيه وعايزني أسيبك

واحدة واحدة كده ومن الأول علشان حاسة بكروتة

إيه مزايا النظام الاشتراكي وإيه مزايا الرأسمالي؟
وإيه هو النظام الاقتصادي الإسلامي اللي بتتكلم عليه؟

شوية تفاصيل كد علشان أنا كمان مهتمة بالموضوع ده

وبعدين فين التصويت؟

هي الصين مش اشتراكيه برضه

لو الصين اشتراكية يبقى الاشتراكية هي اللى صح
بس احنا اللى طبقناها غلط

قولولي علشان بكره اروح للحلاق يرفع حواجبي

هي الصين اشتراكية فعلا يا أوسكا

بس المشكلة بينها وبينا في التطبيق
علشان كده بتكلم من حيث المبدأ ونتكلم على التطبيق الصحيح للاشتراكية أو التطبيق الصحيح للرأسمالية
ساعتها بس ممكن نقارن بينهم

معلش يامصرية اتاخرت وهتاخر شوى معلش والله لانى والله فى دوامة وظروف كل يوم سفر وبهدلة علشان اخلص ورقى واسافر فمش عارف اهرش والله .
بس علشان اجيبلك معلومات كاملة بس تكون نظرية وعملية كاملة . بس ممكن يعنى نقول كلمتي كده تفتيح للموضوع كده . هو لسا مبقاش مجال دراستى بس هيكون انشالله ناوى عليه نشالله .

الاشتراكية نقول بالبلدى كده : ان كل حاجة فى البلد ملك للدولة يعنى الفرد ليه حق الانتفاع وليس الامتلاك

الراسمالية : ان كل شخص فى البلد بيقدر يملك اى حاجة هو عايزها فى اى وقت المهم يكون معاه التمن حرية مطلقة فى العرض والطلب دون اى تدخل من جانب الدولة دور الدولة فى الراس مالية بيقتصر على الخدمات العامة فقط .
النظام المختلط : وطبعا ده الى احنا المفروض نكون فيه وكل الدول النامية فيه ببيجمع بين الاشتراكية والراسمالية بيحاول انه يجمع بين مزايا الاتنين وكنظام نظام جيد صعوبته فى تنفيذه .
النظام الاقتصادى الاسلامى : يعتبر تؤم النظام المختلط ولكن بالفعل يجمع بين مزايا الاشتراكية والراسمالية ولكن تحكمه ضوابط وضوابطه هيا سر فعاليته .
بالنسبة للاقتصاد العاملى الحالى الدول النامية بتكون ى النظام المختلط والصناعة هيا العامل الرئيسى فى تطور الدول النامية والصعود الى مرتبة الدول المتقدمة بمعنى انها بتتحول للنظام الراس مالى عند\ وصول الدولة لهذا النظام وتطبيقه فانها وصلت لمرتبة الدول المتقدمة .

قريب يامصرية هجيبلك الشرح الوافى انشالله ولو فى اى استفسار يمكن اقدر عليه

ربنا يوفقك يا هروم إن شاء الله.

شوف يا سيدي

اللي أعرفه إن الشيوعية هي امتلاك الدولة لكل الأصول والموارد وإن الشعب لا يملك شئ والكل سواسية تبعا لهذا النظام.

أما الرأسمالية فهي عدم امتلاك الدولة لشئ بمعنى آخر ما نطلق عليه في مصر اسم الخصخصة أي أن كل الأصول ملك لأفراد أو هي أملاك خاصة. وتبعا للنظام الرأسمالي فهناك الغني وهناك الفقير وهناك متوسط الدخل كما تختلف السلع ما بين جودة عالية ومتوسطة ورديئة ووتتنوع الماركات بالنسبة للسلعة الواحدة ويختلف العرض والطلب بالنسبة لكل سلعة أو مجال تبعا لحاجة السوق.
وهنا تنتفي صفة أن الكل سواسية الموجودة في النظام الشيوعي.

أما النظام الاشتراكي فهو الاشتراك ما بين النظامين أو نظام مختلط يعني شيوعية ورأسمالية مع بعض.

مش عارفة كلامي صح ولا أنا فاهمة غلط؟

أما عن النظام الاقتصادي الإسلامي فالحقيقة مش فاهمة تقصد إيه بالضبط يا ريت توضح أكتر لما يكون عندك وقت.

أؤيد الإشتراكية

بس المحكومة والمطبقة صح .. مش اللى فيها تجاوزات تودى فى داهية

يعني احنا في مصر ايه بالظبط
اشتماكية
ولا راسموقية

Hesham كتب:أؤيد الإشتراكية

بس المحكومة والمطبقة صح .. مش اللى فيها تجاوزات تودى فى داهية

إيه الكروتة دي؟

عايزة اعرف أسباب تأييدك للاشتراكية وإزاي في رأيك تكون محكومة ومطبقة صح؟

أوسكا

يعني احنا في مصر ايه بالظبط

اللي فاهماه -وياريت لو غلطانة حد يصلحلي- إننا كنا لغاية التعديلات الدستورية الأخيرة عام 2006؛ ماشيين على النظام الاشتراكي. أما التعديلات الدستورية الأخيرة حولتنا لدولة رأسمالية.

ده اللي أعرفه لكن أظن إننا مش مطبقين ولا النظام الاشتراكي صح ولا الرأسمالي صح.

براحة ياجماعة

زى ماذكرت مصرية ان فى نظام شيوعى ونظام اشتراكى وراسمالى وفى مختلط
الشيوعى وده مافيش اى حد بيطبقه فى الوقت الراهن ومن زمان برده لانه بجميع المقايس الاقتصادية نظام فاشل

الاشتراكية يامصرية هيا الى انتى ذكرتى تعريفها فى الشيوعية
للاسف الاغلب بيخلط بين الشيوعية والاشتراكية
الشيوعية فى الاساس هيا نظام دينى وهو عدم وجود إله (استغفر الله) وطبعا دى وجودت فى الاساس فى الاتحاد السوفيتى سابقا والنظام الاشتراكى هو النظام الاقتصادى للشيوعين وده غيرلا النظام الاقتصادى الشيوعى .
بامانة الناظم الاشتراكى حلو لكن للاسف تطبيقه صعب جدا
لانه بيحتاج دولة قوية ومواردها قوية والدولة تكون ملمة بجميع الامور فى اديها ويكون افراد الشعب راضيين وحبين النظام ده .
بعد سقوط الاتحاد السوفيتى المؤسس للنظام الاشتراكى طبعا سقط النظام واثبت فشله
بالنسبة للنظام الراس مالى مؤسسة لنظام امريكا وبيكمن سر النظام او هدفه حرية الملكية الفردية
يعنى اى فرد يقدر انه يملك اى حاجة فى اى وقت المهم يكون معاه تمن السلعة وبيكون دور الدولة مقتصر فى لخدمات العامة زى الدفاع الجيش يعنى الشرطة الشئون الخارجية وخلافه
لاسف بدئت تظهر مساوئ النظام الراس مالى واهم مظهر هو الاحتكار وده الى ظهر حاليا فى كل دول الراسماليه والاحتكار بيترتب عليه زيادة نسبة الفقراء واختفاء الطبقة المتوسطة لان وقتها بيكون غنى جدااااااااااا وفقير مفيش وسط .
فى مصر بقى احنا المفروض اننا فى المختلط المختلط ده بيكون نتيجة لتحول الدولة من الاشتراكية الى الراس مالية وده بياخد فترة طويلة لان علشان تتحول للراس مالية لازم يكون عند الدولة صناعات متعددة وانتاج غزير وزيادة فى نسبى الصادرات تقدر من خلالها تدخل عملة صعبة ده المفروض
لكن للاسف فى مصر لا عارفين نطبق ده ولا ده وطبعا الاسباب معروفة للجميع بسبب الفساد الادارى على جميع المستويات
ولو نلاحظ فى مصر ان مع التغيرات الاقتصادية الى حصلت ان نسبة الفقراء زادت وارتفتع نسبة الاغنياء الى هما اصلا اغنياء وزاد ثرائهم وغناهم وكمان ظهر اغنيا كتير على الساحة بصورة مفاجاة

يا هرم بك

تقول أن هذا الموضوع سيكون موضوع دراستك قريباً إن شاء الله .. فربنا معك ويقويك عليه كى تفيدنا وتفيد البلد كلها فيه
مين عارف .. يمكن فى يوم تكون وزير الإقتصاد، وتحل مشاكلنا كلها .. بس ابقى افتكرنا ساعتها وسلم علينا لما تشوفنا

ومؤقتاً وحتى تبدأ دراستك للموضوع وتتأكد .. اسمحلى أختلف مع تفسيراتك لتلك المسميات .. لأنى أفهمها بشكل مختلف تماماً

الشيوعية: ليست نظاماً دينياً فى الأساس .. بل هى نظاماً إجتماعياً وإقتصادياً وثقافياً فى الأساس .. تستطيع الإستدلال عليه من اسمه وهو "الشيوع". أى أنه يوجه كل عناصر الحياة داخل مجتمع إلى كل الناس فيه
فمثلاً: عندما يقول الإسلام بأننا كلنا شركاء فى الماء والكلأ .. وهو كلام عن الإقتصاد .. وعندما يقول بأننا كلنا كأسنان المشط .. وهو كلام عن الحقوق الإنسانية .. فهو كلام عن الشيوع، أى عن المساواة فى التوزيع بين الشائع من عناصر الطبيعة على شيوع الناس، أى على عموم الناس
وعندما تقول الماركسية؛ وهى إحدى مناهج تطبيق الفكر الشيوعى، وليست أساسه كما يظن الكثيرون .. بأن الأرض لمن يزرعها .. فهى أيضاً تعطى حق الإنتفاع من الموارد الطبيعية للكل .. أى لشيوع الناس .. وتقصر الإستفادة منها على من يبذل جهداً فيها

الشيوعية إذن ليست نظرية دينية كما روج لها إعلام النظام الرأس مالى للتأثير على الشعوب المرتبطة بأديان معينة .. بل هى فكر إقتصادى إجتماعى حقوقى ثقافى بحت .. يتضمن نظريات وأفكار ومناهج مختلفة، يتسطيع كل فرد وكل مجتمع وكل نظام حاكم، إختيار ما يناسبه منها، لكن دائماً داخل الفكر الشيوعى نفسه .. لذلك تجد المنهج الماركسى فى الإتحاد السوفيتى السابق، وهو منهج ينكر الأديان السماوية، لكنه لا يمنع أحد من إتباع أى دين بشرط عدم إعاقة هذه القناعة وما يتبعها من ممارسات دينية لحركة العمل فى المجتمع ... وأيضاً تجد النظام الشيوعى الصينى الماو تسى تونجى، والذى ساوى تماماً بين كل أفراد الشعب وحقق نجاحاً أكبر من النظام الماركسى على أرض الواقع حتى وقت قريب .. ثم تلاه النظام الشيوعى الصينى المعاصر، والذى أتى كنتيجة طبيعية لتطور الأمة الصينية فى ظل النظام الشيوعى المذكور .. وسمح بمزيد من الحريات التى كانت مقيدة فى البداية لضمان سلامة تأسيس الدولة


والإشتراكية ببساطة إحدى مناهج الشيوعية أيضاً .. حيث تنادى بنفس الأهداف الأساسية، لكنها تختلف نوعاً ما فى المنهج، حيث تتيح للأفراد فرصة أكبر فى التملك الفردى فى حدود معينة لا تسمح بها مناهج شيوعية أخرى


أما الرأسمالية؛ (نظرياً وليس واقعياً) فهى لا تقر بمركزية الدولة ولا بالمساواة بين الناس، حيث يكون مبدأ "البقاء للأقوى" هو الأساس فيها، فهى تعطى الحق لكل فرد فى التملك الكامل والغير محدود والإحتكار وتحديد السياسات .. وتكتفى الدولة فى هذا النظام، بدور المنظم لطبيعة العلاقة بين المتنافسين وبعضهم البعض، إضافة لتحصيل الضرائب لتحويلها لمرافق للخدمات العامة .. وهو ما يجعل الهوة بين الطبقات داخل المجتمع الرأسمالى واسعة جداً .. على أن الرأسمالية أيضاً تتضمن نظريات مختلفة، تطبقها الدول حسب المناسب لطبيعة تكوين شعويها .. فتجد المنهج الرأسمالى فى الدول الأوروبية، يختلف كثيراً عن المنهج الرأسمالى المتبع فى الولايات المتحدة، عنه عن النظم الرأسمالية المتبعة فى الدول المتخلفة مثل مصر .. حيث تكون الرقابة الحكومية فى النظم الأوروبية على أعلى درجة وبمشاركة شعبية .. بينما تقل تلك المراقبة فى الولايات المتحدة، .. وتنعدم فى الدول المتخلفة


وبالنسبة للحديث عن الإقتصاد الإسلامى؛ فهى تسمية "موضة" فى رأيى، ولا معنى حقيقى لها .. لأن الإسلام يقول بأننا أدرى بشؤون دنيانا .. أى أن كل ما ينظم حياتنا، إقتصادياً وسياسياً وإجتماعياً وغيره .. طالما لا يتعارض مع حدود الله، فهو من شأننا، ومن حقنا أن نبدل فيه حسبما يتراءى لنا وحسب الظروف .. لكن لا توجد فى الإسلام روشتة بنصوص محددة 1 ـ 2 ـ 3 ـ 4 ـ ... إلخ، لنظام إقتصادى محدد



فى رأيى أن كل بلد، لها موروثاتها الثقافية، ولها عاداتها وتقاليدها وأعرافها ومعتقداتها .. وبالتالى، يصعب إن لم يكن مستحيل، أن نطالب بتطبيق نظام واحد أو عدد محدود من الأنظمة على كل شعوب الأرض على حد سواء .. يجب على كل دولة أن تقرر المناسب لها هى .. فتجربة الصين الناجحة دون شك، يستحيل أن تنجح فى مصر، وكذلك تجربة الولايات المتحدة يستحيل أن تنجح فى اليونان، وتجربة ألمانيا يستحيل أن تنجح فى كينيا


مش كده والا إيه؟

يا اتش باشا

بالنسبة للشيوعية مش حاجة وحشة ولا حاجة بس على حسب الى عرفته وقريته وحتى فى كتبا لجامعة ان اساسها نظام دينى والنظام الدينى بيشمل كل حاجة بعد كده كان نظام اقتصادى او اجتماعى او ثقافى
واثبت فشله لان الدولة المؤسسه له لاتحاد السوفيتى انهارات بسبب انهياراها يبقى نظامها الاقتصادى انهار ومعاك النظام الصينى سواء القديم او المعاصر ناجح لحد الان بس صعوبة الاشتراكية فى تطبيقها صح . وعلى فكرة فى فى الاقتصاد نظام شيوعى واشتراكى .

الراسمالية زى مانا قولت قبل كده وانت قولت برده هو فنس لكلام وانت جبت المختصر المفيد (البقاء للاقوى ) وقريبا يعنى فى السنوات الجاية هنسمع او هنشوف بداية انهياره اعتقاد شخصى

النظام الاقتصادى الاسلامى مش مسمى موضه ولا حاجة
وانا اول لما سمعت عنه فى الكلية من كام سنة برده استغربت ومفهمتش بس فى نظام اقتصادى اسلامى
بيقوم على تحقيق المساوة والعدل الاجتماعى بين جميع افراده مفيش فيه ضرائب بس فيه زكاة وخراج
فيه ربح ولكن محدد بنسبة تقدر تمتلك وتتاجر فى اى شئ غير محرم وبالحجم الى انت عايزه بس نسبة ربحك لاتتجاوز النسبة المحدده
تحديد نسبة الربح حاجة كويسة بتعالج نقطة ضعف النظام الراس مالى وحرية الامتلاك بتعالج نقطة ضعف الاشتراكية
فكر كده وقولى

طيب واحدة واحدة علشان نقرب كلامنا شوية

بالنسبة للشيوعية مش حاجة وحشة ولا حاجة بس على حسب الى عرفته وقريته وحتى فى كتبا لجامعة ان اساسها نظام دينى

أعتقد انك تقصد تقول "الماركسية" وليس "الشيوعية" لأن "الشيوعية" موجودة من بدء الخليقة تقريباً .. إنما "الماركسية" وهى ليست سوى إحدى الفلسفات أو النظريات التى تميل إلى الفكر الشيوعى وتطبقه حسب مفاهيمها الخاصة .. ظهرت فى آواخر القرن التاسع عشر .. جديدة يعنى .. ومنهج شيوعى أينعم .. لكن ليست هى الشيوعية كلها .. وهى فلسفة كبيرة وعالم تانى له حساباته وأفكاره ونظرياته .. وهى المنهج الذى تتحدث عما يُعرف باسم "المادية الجدلية" وهى الفكرة التى تتعارض مع الأديان، لأنها بمنتهى الإختصار اللى مفيش إختصار أكثر منه تقول بأن المادة هى الأصل وليس فكرة وجودها .. يعنى الدنيا بما فيها هى الأصل وليس فكرة وجودها .. يعنى رفض لوجود أى شئ سابق للدنيا، وبالتالى هو رفض لوجود الخالق .. وهو ما يتعارض بالتأكيد مع كل الأديان السماوية .. وبالتالى: فالماركسية فقط هى الملحدة وليس الشيوعية كلها

والنظام الدينى بيشمل كل حاجة بعد كده كان نظام اقتصادى او اجتماعى او ثقافى واثبت فشله لان الدولة المؤسسه له لاتحاد السوفيتى انهارات بسبب انهياراها يبقى نظامها الاقتصادى انهار

مش قادر أقولك موافق يا أحمد لأن إنهيار الإتحاد السوفييتى لا يعنى أن النظريات التى قام على أساسها كانت خاطئة أو فاشلة بالضرورة .. وإلا ما كانوش أول ناس يوصلوا القمر، ولا كانوش قدروا يكونوا أقوى قوة عظمى فى وقت ما .. وكذلك ما نقدرش نقول ان انهيار دولة أو نظام كان بسبب فشل النظريات والأفكار التى قام عليه .. وإلا .. سنجد من يقول لنا أن إنهيار الإمبراطورية الإسلامية من الصين إلى الأندلس، وفقر وضعف الشعوب الإسلامية حالياً .. هو بسبب فشل الإسلام طبعاً غير صحيح .. وإنهيارهم كان بسبب فساد نظام الحكم و .... أشياء أخرى

وعلى فكرة فى فى الاقتصاد نظام شيوعى واشتراكى

أكيد، وما اختلفناش

انت جايز تعرف أكثر منى لأنك لسه دارسها طازة .. فمش حأقاوحك

لكن على أيامى (ليت الشباب يعود يوماً) كانت الإشتراكية جزء من الشيوعية .. أو بمعنى أدق .. كانت مرحلة تمهيدية للإنتقال للشيوعية الكاملة .. لكنها تظل كما سبق وقلت سابقاً: إحدى مناهج الشيوعية .. فهى تنادى بنفس الأهداف الأساسية، لكنها تختلف نوعاً ما فى المنهج، حيث تتيح للأفراد فرصة أكبر فى التملك الفردى فى حدود معينة لا تسمح بها مناهج شيوعية أخرى

النظام الاقتصادى الاسلامى مش مسمى موضه ولا حاجة
وانا اول لما سمعت عنه فى الكلية من كام سنة برده استغربت ومفهمتش بس فى نظام اقتصادى اسلامى
بيقوم على تحقيق المساوة والعدل الاجتماعى بين جميع افراده مفيش فيه ضرائب بس فيه زكاة وخراج
فيه ربح ولكن محدد بنسبة تقدر تمتلك وتتاجر فى اى شئ غير محرم وبالحجم الى انت عايزه بس نسبة ربحك لاتتجاوز النسبة المحدده
تحديد نسبة الربح حاجة كويسة بتعالج نقطة ضعف النظام الراس مالى وحرية الامتلاك بتعالج نقطة ضعف الاشتراكية
فكر كده وقولى

قاعد أفكر من ساعتها .. ومازلت لا أفهم الفرق .. والأهم من الفرق .. لازلت لا أتذكر النصوص الدينية التى بنوا عليها هذا النوع الجديد من الإقتصاد

يعنى هل هى مشكلة مسميات؟؟ كأن نغير اسم الضريبة ونجعلها خراج؟؟ أم ماذا؟؟
وهل هى منع التجارة فى السلع المحرمة دينياً كالخمور ولحم الخنزير؟؟
لو كان الأمر كذلك .. فلا يوجد إقتصاد جديد .. بل أسلمة لمسميات إقتصادية متداولة .. مش وحش برضو، ياريت يعربوا كل العلوم وسأكون أول المؤيدين
أما لو كانت له قوانين ونظريات مختلفة فعلاً .. فأرجو مزيداً من التوضيح لأنى فعلاً أجهل مما تتخيل فى هذا الموضوع الجديد وأحب أعرف نبذة بسيطة عنه على الأقل


تحياتى

بعد الكلام ده طبعا بدات أدور على معنى شيوعية

لاقيت مواقع كتير على النت منها مواقع إسلامية ومنها مقالات لكتاب ومنها ترجمات؛ المهم كلها بتتكلم عن الشيوعية على أساس إن مؤسسها هو كارل ماركس.

وعلشان أتأكد دورت على الشيوعية بالإنجليزي وعلشان أجيب الخبر اليقين ومن الآخر دخلت على موقع الموسوعة البريطانية (Encyclopedia Britannica)

وكان تعريفهم للشيوعية هو:


يعني مجرد نظام سياسي أو اقتصادي؛ ملوش دعوة بماركس.

أما ماركس فحطوا اسمه بعدين في تطور الحركة الشيوعية مش في تأسيسها؛ قالوا:


يعني ماركس وإنجلز يعتبروا الشيوعية هي تطور للنظام الاشتراكي.
النظرية حسب ما فهمت إن تطبيق النظام الاشتراكي بيوصل لمرحلة إن السلع توزع بناء على الاحتياج لها مش طلبها وساعتها -في رأي ماركس وإنجلز- بتتحول من اشتراكية لشيوعية.

http://www.britannica.com/eb/article-9117284/communism

ده اللي فهمته مش عارفة صح ولا غلط.

كان لازم بعد كده أدور على معنى الاشتراكية

دورت في المواقع العربي وبرضه الحقيقة ملاقيتش حاجة تريحني واللي لاقيته مفهمتوش.

المهم رحت على الموسوعة البريطانية ودورت وده تعريف الاشتراكية:



يعني كل حاجة ملك المجتمع ككل مش الدولة ومش المؤسسة الحاكمة زي الشيوعية.

http://www.britannica.com/eb/article-9109587/socialism

عن نفسي أؤيد التعريفات الغربية للمصطلحات الغربية؛ يعني سواء شيوعية أو اشتراكية أو رأسمالية هي في الأصل مصطلحات غربية مش عربية علشان كده التعريفات الصحيحة لها هي التغريفات الغربية.

ولو اتفقنا على كده؛ يبقى "الشيوعية" وهي ترجمة لكلمة "Communism" وأصلها "Common" يعني كل الناس زي بعض أو متشابهين.

أما كلمة "اشتراكية" وهي ترجمة لكلمة "Socialism" وأصلها "Social" معناها اجتماعي يعني تعبير عن المجتمع أو إن المجتمع كله متفق في اتخاذ القرار.

بس كده ده اللي فهمته والله أعلم.

تعريف علم الاقتصاد الإسلامي





النموذج السائد للاقتصاد :

الاقتصاد هو دراسة لسلوك الإنسان وعلاقة هذا السلوك باستعمال الموارد الإنتاجية النادرة في إنتاج السلع والخدمات وكيفية توزيعها ما بين الأفراد للاستهلاك .

ويتكون هذا التعريف من ما يلي : ـ

ـ سلوك الإنسان والموارد النادرة :

ـ سلوك الإنسان في كيفية إدارتها للوصول إلى الهدف المرسوم .

وهناك عدة مجموعات من التعاريف ولكن جميعها تعاريف ناقصة أو غير كاملة ، ولكن هناك تعريف يجمع جميع المؤلفين .

العلم للاقتصاد والإسلامي :

هو دراسة تحليلية لسلوك الفرد في المجتمع الإسلامي والمتعلقة باستعمال الموارد النادرة وتوزيعها واستعمالها في إنتاج السلع والخدمات في إطار من سعي المجتمع نحو تحقيق العبودية لله عز وجل ومرضاته .

وهناك ثلاثة أجزاء أساسية في ذلك التعريف :

(1) الجانب العقدي والذي تتحدد معالم التصور الاقتصادي ( التوحيد ) .

(2) وهو المبادئ والقواعد العامة التي تحدد الإطار الخارجي ( الفقه ) .

(3) موضوع ( علم الاقتصاد ) يستخدم المبادئ والقواعد العامة .

1ـ2 الفرق بين العلم والنظام :

تنقسم العلوم إلى مجموعتين :

ـ المجموعة الأولى : وهي لا تتعلق مباشرة بالسلوك الإنساني وبالتالي فلا تتباين مع العقائد والأهداف السلوكية .

ـ المجموعة الثانية : وهي التي تتعلق مباشرة مع السلوك الإنساني المرتبطة بالمسلمات العقائدية .

الفرق بين علم الاقتصاد الإسلامي والنظام الاقتصادي الإسلامي :

تعريف ( النظام الاقتصادي الإسلامي ) : هي مجموعة القواعد والأنظمة والأحكام المنبثقة من الشريعة الإسلامية المتعلقة بمختلف مراحل ومستويات الفعاليات الاقتصادية الفردية والجماعية .



* النظام الاقتصادي الإسلامي :

1ـ2ـ1 أهداف النظام الاقتصادي الإسلامي :

يهدف النظام الاقتصادي الإسلامي إلى تحقيق العبودية الكاملة لله عز وجل ويرتبط بهذا المبدأ بمدى التزام مختلف الوحدات الاقتصادية .

العبودية : هو كمال القبول والانقياد المختلف قواعد الشريعة .

الأهداف الأساسية :

1- التخصيص الأمثل لكل الموارد الاقتصادية :

شروطها : ـ

1- عدم إنتاج السلع المحرمة الضارة .

2- لا يعطي رأس المال عائداً إلا بقد ارتباطه بالمخاطرة .

3- التركيز على الضروريات وعدم الإسراف وعدم الإفراط .

4- الابتعاد عن إنتاج السلع والخدمات ذات طبيعة اسرافية .

5- الكفاءة في استخدام الموارد الاقتصادية .

2- توفير الحادات الأساسية للمجتمع :

يتم الإنتاج حسب الأولوية والضرورة للمجتمع وتقسيم إلى ثلاث مستويات:

1- السلع الضرورية : وهي كافة السلع والخدمات التي تخدم في صيانة الأركان الخمسة وهي ( الدين ـ النفس ـ العقل ـ النسل والمال ) ومن الأمثلة الشراب والطعام .

2- السلع الحاجية : وهي لا تتوقف عليها مياه الفرد وهي سلع يمكن الاستغناء عنها ولكن بشيء من المشقة . مثل استهلاك اللحوم والأجبان .

3- السلع التكميلية : وهي الأمور التي لا تتحرج الحياة ولا تصب بدونها ولكن وجودها يسهل الحياة وتحسنها وتجملها مثل ممارسة الرياضة واستخدام الحاسب .

3- تحقيق توزيع عادل للدخل الثروة :

تعريف : هو التوزيع الناتج من عملية التوجيه التلقائي بواسطة الزكاة الصدقات والإرث وغيرها . بجزء كاف ما الدخل والثروة والتي تم تخصيصها أوليا بالشكل الأمثل عن طريق السوق الإسلامي ، وذلك لإشباع الحاجات الضرورية العامة والخاصة للأفراد وشرائح المجتمع .



برنامج الوصول إلى التوزيع العادل :

يشمل على ما يلي : ـ

1- نظام الزكاة : وهي الحد الأدنى من الصدقات المفروضة سنوياً على الأموال الكتنزة والأموال المعدة للتجارة والغلات الزراعية والحيوانية والصناعية وغيرها .

وتتجه الإيرادات منها إلى أصناف ثمانية ( الفقراء والمساكين ، والعاملين عليها والمؤلفة قلوبهم وفي الرقاب والغارمين وفي سبيل الله وأبن السبيل ) .

2- نظام الصدقات : والصدقات وهي الإنفاق التطوعي في سبيل الله على جميع أوجه الخير ، ولا يلزم لها نصاب أو حد أدنى وهي غير محددة بحد أعلى . وقد أكد القرآن والسنة على ذلك .

3- نظام الإرث : ويهتم هذا العلم بعلم الفرائض في الفقه الإسلامي والشريعة الإسلامية وقد أكدت الشريعة الإسلامية على كيفية توزيع الإرث .



4- تحقيق القوة المادية والرمية للأمة الإسلامية :

مقومات النظام الاقتصادي الإسلامي :

ويعتمد على ثلاثة مبادئ أساسية وفلسفية وهي : ـ

1- الاستخلاف : ويعكس طبيعة ملكية وسائل الإنتاج والاستهلاك , وهي الوظيفة الاجتماعية المناطه بالفرد أو المجموعة بالفرد أو المجموعة بحكم شرعي يتمكن بواسطات الملكية المطلقة لوسائل الإنتاج والاستهلاك على سبيل المنفعة ومن أمثلة ذلك : ـ

* أن يحتجز إنساناً أرضاً مواتاً بإذن من إمام بغرض إحيائها ولا يقوم بإحيائها .

2- مبدأ الاختيار والحرية الاقتصادية : والحرية الاقتصادية الإسلامية هي التصرفات الاقتصادية في إطار الشريعة الإسلامية . وتبني الحرية على تعظيم الثواب الأجر لمحاولة تحقيق عبودية الفرد والمجتمع لله سبحانه وتعالى . وتحقيق العبودية بكمال المحبة والتعظيم لله عز وجل .

3- مبدأ الإحسان والتعاون : يهدف على تحقيق العدالة داخل المجتمع في الإسلام وتتضمن العدالة عنصرين أساسين هما : منهج الظلم والعدوان والأمر بالبر والإحسان بين الأفراد .



1-4 المنهج في دراسة الاقتصاد الإسلامي :

يجب الجمع بين ثلاثة علوم : علم التوحيد ـ وعلم الفقه ـ وعلم الاقتصاد



الخلاصة :

تم في هذا الفصل تحديد تعريف أمثلة لعلم الاقتصاد الإسلامي وتحصيل عناصره الرئيسية التي أجمعها النظام الاقتصادي الإسلامي . وثم معرفة الفروق الأساسية منها .

وفي نهاية الفصل تم إلقاء الضوء على كيفية إعداد علم الاقتصاد الإسلامي بالنظر إلى عناصره الرئسية والمنهج الحالي لهيكل علم الاقتصاد الإسلامي وعلاقته بالهياكل الاقتصادي غير الإسلامية ثم المشاكل التي تظهر في الكتابات في الاقتصاد الإسلامي وعلاقتها بعلم الاقتصاد الإسلامي

كلااااااااااااااام جميل
كلاااااااااااااااام معقول
مقدارشى اقول
حاجة عنة
بس يا هرم صعب اوى تطبيقة فى ظل الفساااااااااااد السائد
عموما تستاهل دةعلى المعلومات القيمة

مشاعر كتب:كلااااااااااااااام جميل
كلاااااااااااااااام معقول
مقدارشى اقول
حاجة عنة
بس يا هرم صعب اوى تطبيقة فى ظل الفساااااااااااد السائد
عموما تستاهل دةعلى المعلومات القيمة

مشاعر وأنا مليش وردة

هروم شكرا على المعلومات دي وحرد عليك قريب بس لازم أقراها بتمعن أكتر.

وردة بس
احلى بوكية ورد لاحلى مصرية
وخصوصا انك تستاهلية عن جدارة لنجاحك وتفوقك

يا سلام ربنا يخليكي يا مشاعر

مش نسياني أبدا

أشكرك على نفلك لهذا الشرح الموجز يا هرم

لكن ما لاحظته منه، أنه هو نفسه النظام الإشتراكى المتعارف عليه، لكن بمسميات إسلامية .. أو قل، أنه هو نفسه النظام الإشتراكى لكن بصبغة دينية .. وهو شئ ممتاز دون شك، لكن لم ألاحظ فيه جديداً "إقتصادياً" لنعبتره إقتصاداً مختلفاً عن المتداول حالياً. وبصفتك أكثرنا علماً بعلوم التجارة والإقتصاد .. هل لك أن توضح لنا الجديد فيه إن وُجِد؟؟